«Я вельмі ганаруся сваёй маці». Гарадзенку, якая сарвала маску зь ціхара, затрымалі ноччу. Яна чакае суду ў ізалятары
Гарадзенка Людміла Таранок падчас жаночай акцыі 12 верасьня зьняла зь міліцыянта ў цывільным маску. Цяпер яна чакае суду ў ізалятары. Сын Міхаэль Шаўчэнка расказаў пра сваю маці.
Жаночая акцыя праходзіла ў Горадні на прыступках унівэрмагу «Нёман» удзень 12 верасьня. Некалькі дзясяткаў дзяўчат і жанчын вадзілі карагоды, сьпявалі пратэставыя песьні, скандавалі лёзунгі: «Саджайце дрэвы, а не людзей», «Верым, можам, пераможам», «Жыве Беларусь». Іх здымаў хлопец у цывільным. Дзяўчаты засьпявалі: «Я всегда с собой беру видеокамеру».
У Гомлі прайшла акцыя ў падтрымку арыштаванага выкладчыка
Выкладчыка БелДУТ Яўгена Малікава міліцыя затрымала 11 верасьня. Ён быў на акцыі ў падтрымку іншага затрыманага выкладчыка — Вадзіма Бельскага. Ён працуе ў ГДТУ ім П Сухога. Суд пакараў яго за адзіночны пікет арыштам на 3 сутак.
Студэнты і ня толькі выйшлі 14 верасьня да будынку БелДУТ. Да іх прыйшла міліцыя, затым — рэктар Юры Кулажанка. Ён загадаў пікетоўцам «пакінуць маю тэрыторыю». Тыя перайшлі на другі бок дарогі, але рэктар прыйшоў і туды.
Рэктар сказаў, што Яўген Малікаў затрыманы за правапарушэньне і «гэта блага». Рэктар адмовіўся адказаць, ці звольніць ён выкладчыка.
У Гомлі супрацоўнікі АМАП пры затрыманьні пашкодзілі нагу 22-гадовай мэдсястры
У Гомлі 13 верасьня пасьля «Маршу герояў» затрымалі 27 чалавек, у тым ліку траіх байкераў і іх пасажыраў. 22-гадовай мэдсястры, якая была пасажыркай, моцна пашкодзілі нагу.
«Нас схапілі супрацоўнікі АМАП і жорстка цягнулі ў мікрааўтобус, „сіні бус“. Мяне штурхалі і пашкодзілі нагу. Аднаго майго прыяцеля білі пры затрыманьні. З Цэнтральнага РАУС мяне забралі на „хуткай“, дыягнаставалі расьцяжэньне зьвязак. Цяпер я хаджу на мыліцах», — расказала Ганна Астаф’ева.
Яна напісала заяву на супрацоўнікаў АМАП. Ноччу 13 верасьня Ганну ўжо апытвалі супрацоўнікі Сьледчага камітэту.
Амбасадар Беларусі ў Нідэрляндах: Беларусі патрэбны рэформы, але не пад кіраўніцтвам Ціханоўскай
Амбасадар Беларусі ў Нідэрляндах Андрэй Еўдачэнка ў інтэрвію нідэрляндзкаму тэлеканалу выказаўся за дыялёг паміж рознымі палітычнымі сіламі ў Беларусі і асудзіў гвалт з боку сілавікоў, піша Tut.by.
Еўдачэнка заявіў, што ў Беларусі насьпела неабходнасьць маштабных рэформаў. Дыплямат тлумачыць, што краіна знаходзіцца паміж саюзнай Расеяй з аднаго боку і ЭЗ з другога: «Мы на 95% эканамічна залежныя ад Расеі. Прыдумаць новы сьцяг ці новы гімн даволі лёгка, але адносіны з Расеяй — самая складаная частка жаданых зьменаў»
Дыплямат ня бачыць іх пасьпяховай рэалізацыі пад кіраўніцтвам Святланы Ціханоўскай: «Я ня ведаю спадарыню Ціханоўскую, ніколі не сустракаў яе. Яна, пэўна, добрая гаспадыня. Але маёй краіне патрэбен іншы лідэр — зь вялікім досьведам».
Пасол заявіў, што гатовы прыняць выбар беларускіх грамадзянаў, калі большасьць не падтрымае Аляксандра Лукашэнку.
Андрэй Еўдачэнка займаў пасаду першага намесьніка міністра замежных спраў Беларусі з чэрвеня 2016 да ліпеня 2020, а таксама намесьніка міністра -- з 2006 па 2011. Таксама быў амбасадарам Беларусі ў Вугоршчыне, Бэльгіі і пастаянным прадстаўніком Беларусі пры Эўразьвязе.
МУС праводзіць праверку факту таго, як жодзінскі міліцыянт ударыў жанчыну
«Мы абавязкова гэты інцыдэнт пракамэнтуем і не пакінем яго без увагі. Цяпер праводзіцца праверка. Самае галоўнае, каб уся гэта сытуацыя, якая сёньня актыўна абмяркоўваецца ў інтэрнэце, атрымала абʼектыўную ацэнку», – сказала Чамаданава.
13 верасьня падчас акцыі пратэсту ў Жодзіне міліцыянт ударыў жанчыну ў твар.
Чаму расейская інтэлігенцыя маўчыць пра падзеі ў Беларусі
Журналістка расейскай службы Радыё Свабода Алена Рыкоўцава спрабавала знайсьці адказ на пытаньне Сьвятланы Алексіевіч: Чаму расейская інтэлігенцыя маўчыць пра падзеі ў Беларусі?
У менскай гімназіі выступіла лектарка зь міліцыі. Бацькі выклікалі на размову дырэктара
Раніцай 14 верасьня больш за сотню бацькоў сабраліся на тэрыторыі менскай беларускай гімназіі № 4, каб выказаць прэтэнзіі дырэктару навучальнай установы Андрэю Гоцману.
Прычынай стаў пятнічны прыход у гімназію супрацоўніцы інспэкцыі ў справах непаўналетніх Фрунзэнскага РУУС Менска Вікторыі Рудой. 11 верасьня школьнікаў 8-х клясаў сабралі ў актавую залю, дзе прадстаўніца праваахоўных органаў папярэдзіла дзяцей пра адказнасьць за ўдзел у несанкцыянаваных мерапрыемствах, расказала пра «фашысцкія сымбалі», пад якімі ходзіць апазыцыя, а таксама папярэдзіла, каб больш за двое не зьбіраліся, бо гэта ўжо «масавая акцыя».
У дзень візыту Лукашэнкі ў Сочы Каардынацыйная рада зьвярнулася да Расеі, яе грамадзкасьці і афіцыйных асоб
«Выбары, якія прайшлі ў Беларусі 9 жніўня і якія трагічныя падзеі, якія пайшлі пасьля іх — забойствы, зьбіцьцё і катаваньні мірных дэманстрантаў — кінулі Беларусь у глыбокі палітычны крызіс. У цэнтры Эўропы ў XXI стагоддзі разьвязаны тэрор у дачыненьні да мірных грамадзян Рэспублікі Беларусь, якія выказваюць альтэрнатыўны да ўлады пункт гледжаньня,— заяўляе Каардынацыйная рада ў лісьце да грамадзкасьці і афіцыйных асоб Расеі.
У Міністэрстве падаткаў прызналі хакерскія атакі
Сайт Міністэрства падаткаў і збораў і электронныя сэрвісы «працуюць у штатным рэжыме», сьцьвярджае прэс-служба міністэрства ў камэнтары Tut.by.
У міністэрстве прызнаюць, што хакерскія атакі ідуць, але сьцьвярджаюць, што збояў у працы сэрвісаў няма, хіба «нязначныя праблемы з уваходам у асабістыя кабінэты карыстальнікаў». Паведамленьні пра збоі ад саміх карыстальнікаў былі неадназначныя: некаторыя пісалі і пра збоі ў асабістым кабінэце, і аб праблемах з АРІП.
МУС паведаміла пра затрыманьне ў Менску ўдзельнікаў пратэсту, якія напалі на супрацоўнікаў АМАП
Як паведамляе МУС, 13 верасьня на вуліцы Ціхай у пасёлку Дразды пратэстоўцы аказалі супраціў праваахоўнікам, якія «ахоўвалі грамадзкі парадак».
Сьцьвярджаецца, што ў нападнікаў у арсэнале былі гумовыя палкі і водаправодныя трубы. Пратэстоўцы закідалі міліцыянтаў камянямі і бутэлькамі. Цялесныя пашкоджаньні рознай ступені прычыненыя 4 супрацоўнікам АМАП, пашкоджаны службовы транспарт.
Паводле МУС, адзін з дэманстрантаў схапіў міліцыянта за куртку, паваліў на зямлю і выхапіў траўматычны пісталет «Аса». Падчас бойкі сілавіку ўдалося яго вярнуць і зрабіць папераджальны стрэл. 46-гадовага мужчыну затрымалі. Другому затрыманаму 26 гадоў.
Нічога са згаданага не зафіксавана на відэа, якое распаўсюдзіла МУС. Затрыманы гаворыць толькі пра ўдар па міліцэйскай машыне.
Расейскія навукоўцы выказаліся за новыя выбары ў Беларусі
Расейскія навукоўцы выказалі салідарнасьць з пратэстоўцамі ў Беларусі, якія дамагаюцца новых, сумленных выбараў.
«Мы абураныя рашэньнем кіраўніцтва Расеі аб прызнаньні Аляксандра Лукашэнкі абраным прэзыдэнтам Беларусі. Мы патрабуем адмяніць гэтае рашэньне і ўстрымацца ад любога сілавога ўмяшаньня ў справы суседняй краіны», — пішуць навукоўцы ў заяве, апублікаванай на сайце Scientific.ru.
Заява адкрытая для новых падпісантаў. Да гэта часу свае подпісы паставілі пад ёю каля 200 расейскіх навукоўцаў.
У Гомлі асудзілі выкладчыкаў унівэрсытэтаў, у тым ліку намесьніка дэкана
11 верасьня выкладчык Гомельскага дзяржаўнага тэхнічнага ўнівэрсытэту імя Сухога Вадзім Бельскі выйшаў да ВНУ з адзіночным пікетам у падтрымку шахтара Юрыя Корзуна. Яго затрымала міліцыя, а суд пакараў арыштам на 3 сутак.
У падтрымку Бельскага выйшлі студэнты, выкладчыкі і неабыякавыя людзі. Пасьля акцыі затрымалі выкладчыка Белдзяржунівэрсытэту транспарту, гісторыка і краязнаўца Яўгена Малікава і намесьніка дэкана тэхнічнага ўнівэрсытэту імя Сухога Ўладзімера Быстранкова.
Малікаву прысудзілі сёньня 5 сутак арышту. Быстранкова, па сьведчаньні тых, хто быў зь ім у ізалятары часовага ўтрыманьня, забралі проста зь лекцыі супрацоўнікі міліцыі. Сёньня суд Навабеліцкага раёну пакараў намесьніка дэкана штрафам у 270 рублёў.
У палітзьняволенай Марыі Калесьнікавай пагоршылася здароўе, — адвакатка
Адвакатка Людміла Казак наведала ў жодзінскім ізалятары сябра прэзыдыюму Каардынацыйнай рады Марыю Калесьнікаву.
Юрыстка расказала Tut.by, што ў Марыі Калесьнікавай абвастрылася алергія. Таксама да яе падабароннай не даходзяць лісты.
«Прывезьлі яе сюды ў пятніцу, яна ў агульнай камэры на шэсьць чалавек. У Марыі алергія на пыл, напэўна, яе забясьпечылі ня вельмі сьвежымі матрацам, падушкай і пасьцельнай бялізнай. Яна моцна кашляе, нос закладзены, ацёк насаглоткі, сьвярбяць вочы. Мэдычную дапамогу аказваюць, але мы напісалі заяву на імя начальніка турмы, каб памянялі інвэнтар і забясьпечылі перадачу лекаў».
Пры гэтым, паводле Людмілы Казак, стан здароўя Марыі ніяк не адбіўся на яе настроі.
Прэзыдэнтка Эстоніі нагадала беларускаму кіраўніцтву пра Гаагу
Адказныя за гвалт у Беларусі павінны ўсьведамляць магчымасьць таго, што іх прыцягнуць да Міжнароднага крымінальнага суду, але ўмяшаньне ў справы Беларусі звонку недапушчальнае, заявіла прэзыдэнтка Эстоніі Кэрсьці Кальюлайд.
«Вельмі важна, каб асобы, якія прымаюць рашэньні ў Менску, разумелі, што Гаага ў сапраўднасьці знаходзіцца ня так ужо далёка», — сказала Кальюлайд.
Паводле яе, «вінаватыя ў гвалце супраць беларускай апазыцыі павінны быць як мага хутчэй пакараныя».
МУС растлумачыла, чаму міліцыянт у Жодзіне ўдарыў жанчыну ў твар: падумаў, што можа ўдарыць яна
«Нечакана з натоўпу выйшла жанчына і накіравалася да супрацоўніка міліцыі, — тлумачыць МУС. — Наблізіўшыся, яна рэзка накіравала камэру тэлефона міліцыянту ў твар. Зыходзячы з сытуацыі, той выказаў здагадку, што пасьледуе ўдар. Імгненнай рэакцыяй зьявілася ўжываньне фізычнай сілы для самаабароны і затрыманьня».
У Гомлі затрымалі журналістаў
У Гомлі затрымалі журналістаў Яўгена Меркіса і Марыну Драбышэўскую. Пра гэта Драбышэўская паведаміла ў сваім Фэйсбуку.
Міліцыя вязе іх у Чыгуначны РАУС.
Перад «Маршам герояў» міліцыя ў Гомлі ўзяла журналістаў пад пільную ўвагу. Так, зь пятніцы пад дамамі Меркіса, Драбышэўскай і Марыі Булавінскай дзяжурыла міліцыя.
Ларысу Шчыракову затрымалі ў пятніцу. Да суду яна была ў ІЧУ. Сёньня, у панядзелак, суд аштрафаваў яе на 675 рублёў.
Ціханоўская: Лічу сябе народна выбраным прэзыдэнтам
Пра гэта Сьвятлана Ціханоўская заявіла 14 верасьня ў інтэрвію тэлеканалу «Настоящее время», адказваючы на пытаньне пра свой «статус».
Ціханоўская пацьвердзіла сваю ранейшую пазыцыю, што найлепшы выхад зь цяперашняга супрацьстаяньня ў Беларусі — дыялёг, вынікам якога стануць новыя прэзыдэнцкія выбары.
Апазыцыю ў дыялёгу павінна прадстаўляць Каардынацыйная рада, якая цяпер праходзіць «трансфармацыю».
Лукашэнка заяўляў, што Расея дасьць мільярд, Пуцін даў нават больш
Падчас сустрэчы ў Сочы кіраўнікоў Беларусі і Расеі Аляксандра Лукашэнкі і Ўладзіміра Пуціна расейскі лідэр паведаміў, што Расея дае Беларусі крэдыт у памеры 1,5 мільярда даляраў. Раней Лукашэнка казаў, што Расея дасьць 1 мільярд.
Аднак да канца году Беларусь павінна заплаціць па зьнешніх крэдытах 2 мільярды даляраў, прыкладна чвэрць ад наяўных валютных рэзэрваў. Паколькі гэтая запазычанасьць — пераважна перад Расеяй, то атрымліваецца, што РФ проста прафінансуе запазычанасьць Беларусі самой сабе.
Міліцыя затрымала Дзяніса Каляду, былога кансультанта юрыдычнага ўпраўленьня Міністэрства фінансаў Беларусі
Ён спачатку абвясьціў страйк, а потым сышоў з пасады на знак пратэсту супраць гвалту ў краіне пасьля выбараў.
Днём 13 верасьня ў Менску яго і жонку спынілі міліцыянты. Дзяніс і Тацяна гулялі ўдалечыні ад шэсьцяў, але зь бел-чырвона-белымі сьцягамі на плячах. Ім сказалі, што яны ўдзельнічаюць у несанкцыянаваным мітынгу. Жонку ўвечары адпусьцілі, бо ў хаце засталося непаўналетняе дзіця, а Дзяніса павезьлі ў турму нумар 8 гораду Жодзіна.
Што расказала жонка, чытайце тут.
Затрымалі яшчэ аднаго сябра Каардынацыйнай рады — юрыста Канстанціна Цітова
Затрымалі яшчэ аднаго сябра Каардынацыйнай рады дзеля ўрэгуляваньня палітычнага крызісу ў Беларусі — юрыста Канстанціна Цітова.
Пра гэта паведаміла прэс-служба зьняволенага прэтэндэнта на прэзыдэнцтва Віктара Бабарыкі са спасылкай на адваката.
Канстанцін Цітоў уваходзіць у асноўны склад Каардынацыйнай рады. Абставіны зьняволеньня не ўдакладняюцца, але сябры кажуць, што затрыманьне адбылося яшчэ перад пачаткам Маршу герояў 13 верасьня. Яго прозьвішча ёсьць сярод асобаў, якія ўтрымліваюцца ў турме № 8 у Жодзіне.