Рыхтуючыся да візыту ў Маскву, сёньня Аляксандар Лукашэнка даў інтэрвію расейскім СМІ. Сярод іншага былі закранутыя такія тэмы:
Выдаць Краўцова і Раднянкова
«Гэтых двух мы просім украінскіх памежнікаў, каб яны вярнулі нам у краіну — будзем разьбірацца, што адбылося».
«Яны на посьце адзначыліся, памежнікі праверылі і мытнікі. Але ж сама мяжа там яшчэ 10 кілямэтраў, ці 8. І яны вось праз гэты ўзмоцнены пост, яны напралом праехалі і схаваліся ва Ўкраіне».
«Мяжа ўзмоцнена ахоўваецца, таму мы выставілі пост. Натуральна, іх спынілі. Яны на сваім аўтамабілі па газах. Яе ці то выкінулі з машыны — ну, на хаду. На хаду».
Калі «Беларусь рухне»
«Ведаеце, мы да чаго прыйшлі разам з расейскім істэблішмэнтам і кіраўніцтвам? Калі сёньня Беларусь абрынецца, наступная будзе Расея».
«Калі вы думаеце, што багатая Расея з гэтым справіцца, памыляецеся. Я размаўляў з многімі прэзыдэнтамі, са сваім старэйшым сябрам (старэйшым братам я яго называю) Пуціным, я яго папярэдзіў: гэтаму супрацьстаяць нельга».
«Прыбраць інтэрнэт і іншае... Нават калі інтэрнэт сёньня прыбраць, тэлеграм-каналы гэтыя з Польшчы будуць працаваць. Таму вы не расслабляйцеся. У вас таксама хутка пэўныя палітычныя падзеі, а можа, і на роўным месцы».
Крыўдна, што галасавалі супраць яго
«Вядома, для мяне гэта вельмі крыўдна і трагічна, калі хочаце. Але гэта ня значыць, што я апусьціў рукі, таму што я па-філязофску на гэта гляджу. Ну, калісьці Ён мяне туды пакліча».
«Я павінен абараніць тое, што створана нашымі рукамі, абараніць тых людзей, якія гэта стваралі, і вось гэтых — пераважная большасьць (...) а іх большасьць, якія за мяне прагаласавалі, хоць бачаць мяне кожны дзень у прасе, тэлевізары і ў лядоўні».
«Можа, недзе ім надакучыла, але яны мяне падтрымалі. Гэтым я цяпер жыву».
