Да 15 сутак арышту і штрафы. Суды над удзельнікамі акцый пратэсту 4-6 верасьня. Сьпіс
7 верасьня ў Менску і іншых гарадах Беларусі прайшлі суды над затрыманымі ўдзельнікамі акцый пратэсту, якія адбываліся з 4 па 6 верасьня. Вынікі судоў зьбірае і публікуе праваабарончы цэнтар «Вясна». Сьпіс выракаў па гарадах за 7 верасьня глядзіце тут.
Літоўскія дэпутаты заклікалі вызваліць мірных грамадзян у Беларусі і правесьці новыя выбары
Група літоўскіх дэпутатаў зьвярнуліся ў амбасаду Беларусі ў Вільні з заклікам неадкладна вызваліць удзельнікаў пратэстаў і правесьці новыя выбары.
«Мы, члены літоўскага Сэйму, патрабуем неадкладнага вызваленьня ўдзельнікаў мірных акцый пратэсту і іншых мірных грамадзян, выкрадзеных невядомымі сёньня, учора і ў папярэднія дні ў Беларусі. Патрабуем вызваліць прадстаўнікоў СМІ, акадэмічнай супольнасьці, грамадзкіх аб’яднаньняў і рухаў, у тым ліку актыўнага крытыка праекту Беларускай АЭС, эколяга, члена савета арганізацыі „Экадом“ Ірыну Сухій, а таксама аднаго з лідэраў пратэсту Марыю Калесьнікаву», — гаворыцца ў заяве.
Шчырае інтэрвію са студэнтам, які расплакаўся на пратэсьце
1 верасьня Максім Сысоенкаў разам зь іншымі студэнтамі менскіх унівэрсытэтаў удзельнічаў у забастоўцы. Празь некалькі гадзін шэсьце жорстка разагнаў АМАП, некалькі студэнтаў затрымалі. А ў сацыяльных сетках зьявілася відэа таго, як Максім плача пасьля разгону акцыі. Мы пагутарылі з Максімам, і ён расказаў, што выклікала такія эмоцыі і якія словы ён хацеў бы сказаць Лукашэнку.
МЗС Нямеччыны і Вялікай Брытаніі занепакоеныя лёсам Марыі Калесьнікавай
Кіраўнік МЗС ФРГ Гайка Маас зноў папярэдзіў Аляксандра Лукашэнку ў сувязі з паведамленьнямі аб падаўленьні пратэстаў у Беларусі. «Калі Лукашэнка ня зьменіць свой курс, мы будзем рэагаваць», — напісаў нямецкі міністар у сваім твітэры.
«Сур'ёзна занепакоены сытуацыяй з Марыяй Калесьнікавай», – заявіў Дамінік Рааб, міністар замежных спраў Вялікай Брытаніі. «Рэжым Лукашэнкі павінен зрабіць яе бясьпечнае вяртаньне сваім галоўным прыярытэтам. Рэжым павінен спыніць жорсткае абыходжаньне з дэманстрантамі, вызваліць палітвязьняў і пачаць дыялёг з апазыцыяй», цытуе міністра Reuters. Падрабязнасьці тут.
Арганізатары #BY_help запускаюць збор сродкаў на падтрымку незалежных СМІ і журналістаў у Беларусі
«Журналістыка — не злачынства. Журналісты — не злачынцы. Салідарнасьць мацнейшая за рэпрэсіі!», — падкрэсьліваюць у прэс-рэлізе арганізатары кампаніі MediaSOL, якая будзе зьбіраць грошы на дапамогу незалежным СМІ і журналістам.
У межах кампаніі MediaSOL будуць зьбіраць грошы на:
- Ахоўныя сродкі для журналістаў, якія працуюць на вулічных акцыях.
- Стыпэндыі і дапамогу журналістам, якія зазналі рэпрэсіі за працу ў незалежных мэдыя: штатным, фрылансэрам, а таксама іншым мэдыяработнікам.
- Аплату часовага пераезду для тых, чыйму жыцьцю і/або здароўю пагражаюць за журналісцкую працу.
- Легальныя спосабы падтрымкі бізнэс-устойлівасьці незалежных выданьняў, якія нясуць страты з прычыны рэпрэсій.
Падрабязьней пра кампанію чытайце па спасылцы.
Гітанас Наўседа: Абавязак Літвы – стаць пасярэднікам паміж уладай і апазыцыяй у Беларусі
Паводле прэзыдэнта Літвы Гітанаса Наўседы, Літва гатовая ўзяць на сябе ініцыятыву і стаць пасярэднікам паміж пратэстоўцамі і ўладамі Беларусі. Гэта абавязак Літвы як вольнай дзяржавы – члена ЭЗ, пацярпелай ад рэпрэсіўных і акупацыйных рэжымаў, сказаў прэзыдэнт Літвы ў тэлефоннай размове з прэзыдэнтам Украіны Ўладзімірам Зяленскім 7 верасьня.
Кіраўнікі Літвы і Ўкраіны сышліся ў тым, што дыялёг паміж урадам і грамадзянскай супольнасьцю ў Беларусі для трансфэру ўлады і правядзеньня новых, справядлівых і дэмакратычных прэзыдэнцкіх выбараў пад эгідай АБСЭ зьяўляецца мірным спосабам выхаду зь цяперашняй сытуацыі.
Суд накіраваў на дапрацоўку справу эколяга Ірыны Сухій
7 верасьня справу Ірыны Сухій вярнулі ў РУУС для ліквідацыі недахопаў, паведаміла ў Фэйсбуку яе дачка Сафія Садоўская.
Ноч Ірына Сухій правяла ў ізалятары на Акрэсьціна. Сёньня ў судзе Савецкага раёну Менску разгледзелі яе справу — Сухій вінавацяць ва ўдзеле ў «несанкцыянаваным масавым мерапрыемстве» 3 верасьня. Як казала Свабодзе раней дачка Ірыны Сухій, «яна ў гэты вечар зьехала на хутар, шмат людзей гэта ведаюць».
Суд прайшоў онлайн. Судзьдзя дала адвакату 10 хвілін на абмеркаваньне з Ірынай Сухій матэрыялаў справы. Пасьля суду Сухій ня выпусьцілі з ізалятара і, паводле дачкі, сёньня ня выпусьцяць. Фармальна паводле закону затрыманых па адміністрацыйнай справе могуць утрымліваць да 72 гадзін.
Сваякі Калесьнікавай падалі заяву ў міліцыю аб яе зьнікненьні
Сваякі Марыі Калесьнікавай падалі заяву ў міліцыю па факце зьнікненьня. У міліцыі сказалі, што заява прынятая і Марыю шукаюць, паведаміў афіцыйны тэлеграм-канал Віктара Бабарыкі.
Сябра прэзыдыюму Каардынацыйнай рады Марыю Калесьнікаву раніцай 7 верасьня каля Нацыянальнага мастацкага музэю ў Менску невядомыя людзі пасадзілі ў мікрааўтобус з надпісам «Сувязь» і павезьлі ў невядомым кірунку.
Каардынацыйная рада паскардзіцца на дзеяньні сілавікоў у Сьледчы камітэт
Сябры Каардынацыйнай рады пададуць заяву ў Сьледчы камітэт на дзеяньні супрацоўнікаў праваахоўных органаў 6 верасьня падчас «Маршу адзінства», гаворыцца на сайце арганізацыі.
«Асаблівая ўвага ў заяве зьвяртаецца на дзеяньні групы невядомых асобаў увечары ў Менску ў раёне дома 3 па праспэкце Пераможцаў. Дадзеныя асобы не насілі форменнай вопраткі і знакаў адрозьненьня, закрылі свае твары маскамі для ўскладненьня ідэнтыфікацыі, не прадстаўляліся і не прад’яўлялі дакумэнтаў, затое адкрыта дэманстравалі розную зброю падчас мірнай акцыі і без абвяшчэньня якіх-небудзь патрабаваньняў ужывалі спэцсродкі, зьбівалі грамадзян», — гаворыцца ў дакумэнце.
У Польшчы стварылі «Цэнтар беларускай салідарнасьці» для дапамогі ўцекачам зь Беларусі
У яго ўвайшлі 13 арганізацый. Пра гэта на прэс-канфэрэнцыі абвясьцілі прадстаўнікі некалькіх ужо дзеючых ініцыятываў, паведамляе reform.by.
«Мы павінны быць гатовыя да таго, што многія вымушаныя будуць пакінуць краіну, таму аб’яднаем намаганьні, каб тыя, хто прыедзе ў Польшчу, атрымалі неабходную юрыдычную, мэдычную, матэрыяльную, псыхалягічную дапамогу, дапамогу ў пытаньнях адукацыі дзяцей», — сказаў на прэсавай канфэрэнцыі выканаўчы дырэктар iSANS (міжнароднай ініцыятывы экспэртаў супраць гібрыдных пагрозаў дэмакратыі) Улад Кобец.
Паводле прадстаўніцы грамадзкай арганізацыі «Праспэкт» Ларысы Караленкі, Цэнтар салідарнасьці ўжо дапамагае пацярпелым беларусам. Цалкам чытайце па спасылцы.
«Падштурхнула палітычная абстаноўка». Чаму студэнты з Горадні падаюць заявы на выхад з БРСМ і прафсаюзу
Студэнты Горадзенскага ўнівэрсытэту імя Янкі Купалы пачалі падаваць заявы аб выхадзе з БРСМ і прафкаму. Ва ўнівэрсытэцкай арганізацыі БРСМ адмаўляюць, што зьява мае масавы характар. Але, як кажуць самі студэнты ГрДУ, ужо сотні маладзёнаў з пачатку навучальнага году выйшлі або падалі заявы на выхад з БРСМ і прафсаюзнай арганізацыі.
Студэнты расказалі Свабодзе, чаму вырашылі выйсьці з гэтых арганізацый менавіта цяпер і чаму не рабілі гэтага раней. Чытайце па спасылцы.
Улады Беларусі шукаюць «зьнешнюю пагрозу», каб расправіцца з пратэстоўцамі, — кіраўнік МЗС Літвы
Міністар замежных спраў Літвы Лінас Лінкявічус у панядзелак абмеркаваў з генэральным сакратаром NATO Енсам Столтэнбэргам сытуацыю ў Беларусі.
Як паведаміў партал baltija.eu са спасылкай на літоўскае МЗС, удзельнікі гутаркі канстатавалі, што вынікі прэзыдэнцкіх выбараў у Беларусі 9 жніўня «былі відавочна сфальсыфікаваныя», а пратэсты пасьля іх гасяцца брутальнай сілай, тысячы пратэстоўцаў былі арыштаваныя, у турмах супраць іх выкарыстоўваецца гвалт.
«Падчас гутаркі мы зьвярнулі ўвагу на неабгрунтаваныя абвінавачаньні беларускіх службовых асобаў на адрас NATO і саюзьнікаў Альянсу з нагоды нарошчваньня вайсковай моцы ў рэгіёне. Ідзе пошук зьнешняй пагрозы як падставы для расправы над пратэстоўцамі», — адзначыў міністар Лінкявічус.
За адкліканьне дэпутата Гайдукевіча сабралі 700 подпісаў. Але не дапамагло
Выбарцы Каліноўскай выбарчай акругі № 108 за 1,5 дня сабралі 700 подпісаў пад лістом аб тым, што «страцілі давер да дэпутата Гайдукевіча». Людзі лічаць, што Алег Гайдукевіч «бязьдзейнічаў і не абараніў інтарэсы выбарцаў», не адрэагаваў на факты парушэньняў падчас прэзыдэнцкіх выбараў, а таксама на гвалт і бесчалавечнае стаўленьне да затрыманых пасьля выбараў.
У прэзыдыюме Менскага гарадзкога савету дэпутатаў, куды па працэдуры накіроўваецца зварот аб сходзе з мэтай адкліканьня дэпутата, палічылі шматлікія прэтэнзіі грамадзян да Гайдукевіча недастатковымі і не прызначылі сход зь ягоным удзелам.
«Дэпутацкія паўнамоцтвы не даюць права ўмешвацца ў дзейнасьць праваахоўных органаў і даваць ім ацэнку», — гаворыцца ў адказе. Артыкул цалкам чытайце па спасылцы.
Латвія адмаўляецца прымаць хакейны чэмпіянат у пары зь Беларусьсю
Латвія адмовіцца праводзіць Чэмпіянат сьвету па хакеі-2021, калі ён будзе праходзіць і ў Беларусі. Такую выснову можна зрабіць са зьместу ліста, адпраўленага ўрадам Латвіі ў Міжнародную фэдэрацыю хакею.
«Прэзыдэнцкія выбары ў Беларусі, якія прайшлі 9 жніўня, не адпавядаюць міжнародным абавязаньням, прынятым у сьвеце дэмакратычным прынцыпам і нормам права, яны не былі свабоднымі і справядлівымі. Рэпрэсіўныя дзеяньні беларускіх уладаў і прымяненьне гвалту ў дачыненьні да прадстаўнікоў грамадзянскай супольнасьці і незалежных СМІ парушаюць міжнародна прызнаныя правы чалавека і дэмакратычныя прынцыпы.
На думку ўраду Латвійскай Рэспублікі, такія дзеяньні несумяшчальныя з каштоўнасьцямі Міжнароднай хакейнай фэдэрацыі і, такім чынам, несумяшчальныя са статусам краіны — арганізатара ЧС-2021». У сувязі з гэтым урад Латвіі заклікае «перадаць статус галоўнага арганізатара чэмпіянату сьвету па хакеі з шайбай 2021 году нейкай іншай краіне» Цалкам чытайце па спасылцы.
«Мы будучыня Беларусі, і ў гэтай будучыні няма месца Лукашэнку». Washington Post дае голас беларускай моладзі
«Удзел у антыўрадавых дэманстрацыях стаў звыклым для многіх беларускіх студэнтаў, у тым ліку і для мяне», — піша ў амэрыканскай газэце Washington Post Аліса Сітнікава, студэнтка Менскага дзяржаўнага лінгвістычнага ўнівэрсытэту.
Яна апісвае, як за яе аднакурсьнікамі гнаўся АМАП, а адміністрацыя іх ВНУ зачыніла дзьверы і не ўпусьціла сваіх студэнтаў, каб схаваць іх ад сілавікоў. Як потым адміністрацыя абвінаваціла іх у «парушэньні навучальнага працэсу» і дала зразумець, што без ваганьняў запусьціць у будынак амапаўцаў. І кажа, што гэты эпізод — толькі адзін з прыкладаў рэпрэсіяў, а моладзь «хоча адчуваць сябе абароненай». Цалкам чытайце па спасылцы.
Дваровыя чаты: каму гэта патрэбна і чаму варта думаць пра бясьпеку
Апошнімі днямі масава пачалі стварацца тэлеграм-чаты па дварах, мікрараёнах — і ў Менску, і ў рэгіёнах. Зьявілася мапа, якую зрабілі валянтэры, дзе кожны можа лёгка знайсьці свой лякальны чат.
Пагаварылі з грамадзкім актывістам і юрыстамі, навошта такія чаты патрэбныя, а таксама пашукалі «падводныя камяні» — наколькі бясьпечна ўдзельнічаць у такіх чатах. Чытайце па спасылцы.
Украінскі амбасадар вярнуўся ў Менск, але двухбаковыя адносіны застаюцца «на паўзе»
Амбасадар Украіны ў Беларусі Ігар Кізім вярнуўся ў Менск пасьля кансультацый у Міністэрстве замежных спраў Украіны, паведамілі Радыё Свабода ў амбасадзе Ўкраіны ў Менску.
На пытаньне Свабоды, як будуць надалей будавацца адносіны паміж Кіевам і Менскам, Ігар Кізім адказаў:
«Як ужо адзначыў міністар замежных спраў Украіны Дзьмітрый Кулеба, афіцыйныя кантакты паміж нашымі краінамі ў цяперашні час „прыпыненыя“. У той жа час далейшае разьвіцьцё ўкраінска-беларускіх адносін будзе залежаць ад шматлікіх фактараў, у тым ліку ад разьвіцьця сытуацыі непасрэдна ў Беларусі, а таксама ад інтэграцыйных працэсаў у рамках Саюзнай дзяржавы Беларусі і Расеі». Цалкам чытайце тут.
Беларуса, які скончыў МГУ і Сарбону, вінавацяць у арганізацыі беспарадкаў
Менчука Юрыя Стрыжака затрымалі 20 жніўня як удзельніка несанкцыянаванай вулічнай акцыі, прысудзілі яму 15 сутак арышту, але на волю ён так і ня выйшаў. Днямі яго з Жодзінскага ізалятара зноў перавялі ў ізалятар на Акрэсьціна.
Бацька затрыманага Юры Мікалаевіч Стрыжак, калі прыйшоў з працы ўвечары 7 верасьня, пабачыў, што дзьверы кватэры ўзламаныя. Паводле яго, у доме правялі ператрус, забралі вінчэстэры кампутараў. Ніякай паперы аб правядзеньні ператрусу няма, сьведак, верагодна, таксама не выклікалі — ва ўсялякім выпадку, Юрыю Стрыжаку пра гэта нічога не вядома.
Паводле Юрыя Стрыжака, ягонага сына падазраюць у арганізацыі масавых беспарадкаў. Падставай, на думку бацькі, могуць стаць паказаньні былога крымінальніка, допыт якога міліцыянты выклалі ў інтэрнэт. На відэа мужчына з зацемненым тварам апавядае пра тое, як яму нібыта прапаноўвалі грошы за ўдзел у пратэставай акцыі. Гісторыю Юрыя Стрыжака цалкам чытайце па спасылцы.
Журналістку Насту Захарэвіч асудзілі на 7 сутак арышту
Журналістку «Зялёнага парталу» Насту Захарэвіч асудзілі на 7 дзён арышту, паведамляе Беларуская асацыяцыя журналістаў.
Агулам праваабаронцам «Вясны» вядомыя імёны 19 асуджаных на арышт за 7 верасьня, яшчэ 5 імёнаў аштрафаваных. Агулам праваабаронцам вядома пра 55 судоў над затрыманымі з палітычных прычын
Выкраданьне Марыі Калесьнікавай – сьведчаньне поўнага прававога свавольля
Выкраданьне Марыі Калесьнікавай, зьнікненьне і іншых чальцоў Каардынацыйнай рады — вельмі яскравы сымптом новай прававой сытуацыі ў краіне, мяркуе палітычны аглядальнік Свабоды Валер Карбалевіч.
Не сказаць, што і дасюль у краіне існавала прававая дзяржава. Але хоць закон, асабліва адносна палітычных апанэнтаў рэжыму, ня дзейнічаў, усё ж існавалі нейкія пэўныя правілы ці «паняцьці», якіх прытрымліваліся і ўлады, і, у пэўным сэнсе, апазыцыя, нават незалежныя мэдыя. Напрыклад, кандыдатам у прэзыдэнты дазвалялася праводзіць сваю кампанію, і толькі пасьля выбараў іх садзілі ў турму.
Але з пачаткам сёлетняй выбарчай кампаніі паступова, крок за крокам усе мінулыя правілы і паняцьці былі адкінутыя. А пасьля таго як зьявіліся забітыя, катаваныя і скалечаныя, мяжа дазволенага зьнікла зусім. Калі рэпутацыя рэжыму зьнішчаная ўшчэнт, то можна жыць, нічога не саромеючыся. Можна выганяць грамадзян Беларусі за мяжу краіны, біць вокны ў кафэ, выкрадаць людзей. Як у Дастаеўскага: калі Бога няма, то ўсё дазволена. Баюся, што мы напярэдадні страшных адкрыцьцяў пра беларускую ўладу.