Юліі Сахарук, маці чацьвярых дзяцей з Пружаны, тэрмінова патрэбная рэабілітацыя. Ад стрэсу пры затрыманьні мужа яна перанесла ішэмічную атаку галаўнога мозгу і інсульт.
З прычыны каранавірусу Берасьцейскі абласны шпіталь праводзіць рэабілітацыю толькі хадзячым хворым, а Юлія — ляжачая.
Моцны стрэс прывёў да інсульту
Амаль тры тыдні Юлія Сахарук правяла ў рэанімацыі Берасьцейскага абласнога шпіталя на апараце штучнай вэнтыляцыі лёгкіх. Мэдыкі зьвязваюць яе цяжкі стан з моцным стрэсам, перажытым 10 жніўня. 31 жніўня Юлію перавялі з рэанімацыі ў звычайную палату. У маладой жанчыны паралізаваная левая частка цела (рука, нага), запаволеная гаворка. Калі падлучалі да апарата ШВЛ, выдалілі 8 зубоРказваючы гэтую гісторыю, муж Юліі Анатоль Сахарук ня можа стрымаць сьлёз.
«Мая жонка — вельмі моцны чалавек. Усе, хто яе ведаюць, адзначаюць, што ў яе вельмі цьвёрды характар, яна моцная духам, вельмі актыўная па жыцьці. Чаму зь ёй так здарылася, у маёй галаве не ўкладаецца. Але загадчык аддзяленьня нэўрахірургіі Берасьцейскага абласнога шпіталя, дзе цяпер Юля праходзіць лячэньне, пацьвердзіў, што ў такім узросьце менавіта стрэс справакаваў інсульт», — кажа Анатоль.
Людзей затрымлівалі супрацоўнікі аддзелу аховы ў форме АМАПу
10 жніўня ў Анатоля, аўтасьлесара станцыі тэхабслугоўваньня з Пружаны, быў дзень народзінаў — яму споўнілася 35.
А 8-й вечара ён з жонкай Юліяй і сябрам ішлі ў кавярню, каб адзначыць сьвята. Прычым ішлі не па цэнтральнай вуліцы і далёка ад плошчы. Мэтраў за 100 ад іх спыніўся аўтобус з АМАПам. Выскачылі людзі ў чорным, узброеныя шчытамі і дубінкамі.
«Хто быў на вуліцы, разьбегліся, пабег і наш сябар. А мы проста стаялі з жонкай, трымаючыся за рукі. Пружана — гарадок невялікі, людзі адзін аднаго ведаюць. Свайго АМАПу ў Пружане няма, у чорную ўніформу пераапранулі супрацоўнікаў аддзелу Дэпартамэнту аховы. Прычым Пружанскі райаддзел міліцыі мае дамову на абслугоўваньне службовага аўтатранспарту са станцыяй тэхабслугоўваньня, дзе я працую. Да таго ж да мінулага году ў аддзеле аховы працаваў Юлін брат. То бок і мяне, і Юлю ўсе ведаюць. Гучыць каманда „Грузі ў аўтазак“. Міліцыянт падбягае да нас, разьбівае рукі сваімі пальчаткамі, хапае мяне і цягне ў аўтазак. Каманду даваў Дзьмітры Фамянюк», — расказвае Анатоль Сахарук.
Ён не супраціўляўся, казаў, што пойдзе сам. Запытваўся ў міліцыянтаў, за што яго затрымліваюць, пераконваў, што нічога не парушаў, не крычаў, проста ішоў з жонкай па вуліцы. Папрасіў перадаць жонцы ключы ад дому і тэлефон.
«Пасадзілі мяне ў аўтазак, я зноў тлумачу, што нічога процізаконнага не рабіў. Да таго ж у мяне чацьвёра непаўналетніх дзяцей, малодшай дачцэ 3 гады. Адзін міліцыянт, які мяне ведае, пытаецца, што рабіць. Яны параіліся паміж сабой і вырашылі мяне адпусьціць.
А Юлія вельмі перапалохалася. Калі мяне нарэшце выпусьцілі, мы адышлі ўбок, агледзеліся — на руках сінякі.
Позна ўвечары Юлія сказала, што чуецца так сабе. Мы крыху пагулялі на вуліцы, падыхалі сьвежым паветрам», — працягвае свой расповед Анатоль.
Анатоль паказаў перапіску ў мабільным тэлефоне Юліі з братам, які раней служыў у аддзеле аховы. Юлія напісала, што кіраваў затрыманьнямі Аляксандар Кунда і начальнік пашпартнага стала. І што яе па руках біў асабіста Аляксандар Кунда.
Юліі неабходная тэрміновая рэабілітацыя
На наступны дзень, 11 жніўня, Юліі стала зусім дрэнна. Выклікалі хуткую дапамогу, яе забралі з падазрэньнем на інсульт спачатку ў рэанімацыю Пружанскай раённай бальніцы. Потым перавялі ў Берасьцейскую абласную бальніцу. Амаль 3 тыдні Юлія прабыла ў рэанімацыі, толькі два дні таму яе перавялі ў нэўрахірургічнае аддзяленьне. У яе паралізаваныя левая рука і левая нага.
Юліі Сахарук 32 гады, у сям’і чацьвёра дзяцей. Старэйшаму сыну 15 гадоў, малодшай дачцэ — 3. Анатоль на працы браў адпачынак, трэба было і дзяцей даглядаць, і да жонкі ў Берасьце езьдзіць. Толькі ў аўторак выйшаў на працу. Кажа, што не было часу падаць заяву са скаргай на дзеяньні міліцыі. Сёньня зьбіраецца заключыць дамову з адвакатам, каб юрыст запатрабаваў усе мэдычныя заключэньні і даведкі пра стан жонкі.
У Пружане створаная Каардынацыйная рада, якая дапамагае пацярпелым. Яна падтрымлівае сям’ю Сахарукоў і матэрыяльна, і маральна.
«Юлія цяпер у Берасьцейскім абласным шпіталі. Ёй патрэбна рэабілітацыя, але з прычыны каранавірусу рэабілітацыя праводзіцца толькі для хадзячых хворых, а Юлія — ляжачая. Мы зьвяртаемся да мэдычных цэнтраў, шукаем, хто можа дапамагчы жанчыне стаць на ногі. У яе ж чацьвёра дзетак», — кажа старшыня Каардынацыйнай рады Ганна Баран.
Пружанская міліцыя не камэнтуе
Свабода зьвязалася з намесьнікам начальніка аддзелу ўнутраных спраў Пружанскага райвыканкаму па ідэалягічнай працы і кадравым забесьпячэньні падпалкоўнікам Юрыем Неміровічам з пытаньнямі, чым былі выкліканыя жорсткія затрыманьні 10 жніўня ў Пружане. І чаму супрацоўнікі аддзелу аховы былі ў той вечар у форме АМАПу. Юры Анатольевіч паведаміў, што «грамадзяне Анатоль і Юлія Сахарукі 10 жніўня міліцыяй не затрымліваліся. Скаргаў ад іх на стан здароўя не паступала. Усё астатняе — без камэнтароў».
Што да іншых пытаньняў, у тым ліку пра выкарыстаньне форму АМАПу супрацоўнікамі аддзелу аховы — параіў зьвяртацца ў пісьмовай форме.
