Беларускія сілавікі працягваюць звальняцца са службы і паведамляюць пра гэта ў сацыяльных сетках.
З шэрагаў унутраных войскаў звольніўся старшы лётнік верталётнага атраду Аляксандар Ісачэнка.
«Лічу недапушчальным удзел у дзеяньнях па дасягненьні ўлады гвалтоўнымі мэтадамі з выкарыстаньнем Узброеных Сілаў Рэспублікі Беларусі», — напісаў ён у рапарце аб звальненьні, які выклаў у Інстаграм разам з фатаздымкам службовага пасьведчаньня.
Падаў рапарт старшы лейтэнант юстыцыі Мікіта Старажэнка, ён быў супрацоўнікам Сьледчага камітэту.
«У апошні час у маю галаву пачалі закрадацца сумневы: служу я народу ці не? Я прыйшоў да высновы, што не. Я спрабаваў звольніцца яшчэ да выбараў прэзыдэнта, але атрымаў адмову, — піша Мікіта Старажэнка. — Я не хачу адпраўляць у архіў матэрыялы праверак, якія павінны быць крымінальнымі справамі. Сумленных супрацоўнікаў у нашых органах шмат, але яны заціснутыя рамкамі загадаў і даўгоў перад дзяржавай».
У званьні падпалкоўніка звольніўся Аляксандар Ахрэмчык, які праслужыў у міліцыі 14 гадоў.
«Маё сумленьне не дазваляе мне быць у так званым страі. Я заўсёды добрасумленна ставіўся да сябе, да навакольных і да іх службы. Але надышоў момант, калі я проста не змагу шчыра, у першую чаргу перад сабой, выконваць сваю працу. Я ўсьвядоміў, што фактычна прадаю свае маральныя прынцыпы», — напісаў ён.
Пасьля 11 гадоў службы ва Ўзброеных Сілах звольніўся і Аляксей Грыгор’еў.
«Гэтае рашэньне было прынята не спантанна, а ўзважана, да гэтага я ішоў год і нарэшце магу спакойна ўдыхнуць грудзьмі „цывільнае“ паветра», — напісаў Аляксей Грыгор’еў.
