Праваабаронцы стварылі Міжнародны камітэт па расьсьледаваньні катаваньняў у Беларусі
Беларускія і замежныя праваабарончыя арганізацыі стварылі Міжнародны камітэт па расьсьледаваньні катаваньняў у Беларусі, учыненых супраць удзельнікаў мірных акцый, паведамляе «Прававая ініцыятыва».
«Мы хочам сабраць як мага больш фактаў і доказаў, каб вінаватыя былі прыцягнуты да адказнасьці», — заяўляюць праваабаронцы.
Задачы камітэту:
- шукаць сьведак і сьведчаньні катаваньняў;
- ідэнтыфікаваць падазраваных у катаваньнях і нялюдзкім абыходжаньні;
- разам з адвакатамі рыхтаваць судовыя пазовы і юрыдычнае суправаджэньне для пацярпелых;
- рыхтаваць паведамленьні і скаргі ў міжнародныя органы;
- фармаваць справаздачы для беларускай грамадзкасьці і міжнародных арганізацый.
Пацярпелыя таксама могуць паведаміць пра выпадкі катаваньняў праз гугл-форму.
Лідэра берасьцейскага рок-гурту «Дай Дарогу!» зьмясьцілі ў ізалятар
Затрыманага сёньня ў Берасьці лідэра рок-гурту «Дай Дарогу!» Юрыя Стыльскага зьмясьцілі ў ізалятар часовага ўтрыманьня Ленінскага РАУС Берасьця, паведаміў БелаПАН праваабаронца Ўладзімер Вялічкін.
За апошнія дні гэта другое затрыманьне Стыльскага: першы раз быў 15 жніўня, калі Стыльскі ўдзельнічаў у акцыі прыхільнікаў перамен у Берасьці. Пасьля першага выхаду з ізалятара Стыльскі сказаў людзям, якія яго сустракалі, што яму далі 12 сутак адміністрацыйнага арышту.
«16 жніўня Стыльскага выпусьцілі на свабоду, таму што яго затрыманьне выклікала вялікі грамадзкі рэзананс. Сёньня ўлада пачала зноў закручваць гайкі, і Стыльскага, хутчэй за ўсё, затрымалі адбываць суткі», — сказаў праваабаронца.
Затрымалі старшыню страйкаму МАЗу Яўгена Бахвалава.
Ён затрыманы супрацоўнікамі міліцыі, абставіны пакуль высьвятляюцца. Пра гэта будзе паведамлена пазьней, — заявіла Tut.by афіцыйная прадстаўніца ГУУС Менгарвыканкаму Натальля Ганусевіч.
На плошчы Незалежнасьці ў Менску працуе «вольны мікрафон»
Каля 20-й гадзіны на плошчы Незалежнасьцi ў Менску сабралася ўжо каля дзьвюх тысяч чалавек. Каля помнiка Ленiну працуе «вольны мiкрафон»: можа выказацца кожны ахвотны.
Каля 21-й гадзіны, калі пачало цямнець, людзі запалілі ліхтарыкі на тэлефонах.
У Бараўлянах рыхтуюць зварот за адкліканьне мясцовага дэпутата. А міліцыянту крычалі «Mаладзец!»
Паўтысячы чалавек сабраліся на сход у Бараўлянах перад будынкам сельсавету. У Бараўлянах на 22 выбарчых участках афіцыйна перамагла Ціханоўская. Сёньня жыхары заклікалі ўлады сельсавету прыйсьці на сустрэчу і выступілі з патрабаваньнямі спыненьня міліцэйскага гвалту, правядзеньня новых сумленных выбараў, адстаўкі прэзыдэнта і забесьпячэньня працы органаў мясцовага самакіраваньня.
Намесьнік старшыні сельсавету Сяргей Кандрашын заявіў, што выбары адбыліся, што затрыманьняў на тэрыторыі сельсавету не было, але зазначыў, што патрэбнае расьсьледаваньне фактаў гвалту. Далей ён стаў казаць пра мясцовыя праблемы, людзі з гэтым не пагадзіліся, і ён сышоў пад словы «Ганьба».
Выступіў начальнік Бараўлянскага РАУС Валер Салаўёў. Яго людзі віталі воклічам «Маладзец!».
Ён сказаў, што на тэрыторыі Бараўлянскага сельсавету не было інцыдэнтаў і затрыманьняў. Адзін з прысутных, які быў назіральнікам на ўчастку № 6, заўважыў, што калі назіральнікі зафіксавалі на ўчастку ўкід 390 бюлетэняў, то выклікалі міліцыю, але міліцыя не прыехала. Цалкам чытайце па спасылцы.
У Жабінцы зладзілі вечар памяці берасьцейца, які загінуў падчас пратэстаў
У Жабінцы зладзілі вечар памяці берасьцейца Генадзя Шутава, які загінуў падчас пратэстаў. Ён памёр 19 жніўня ў менскім вайсковым шпіталі ад агнястрэльнага раненьня ў галаву — у яго ва ўпор са сьпіны стралялі сілавікі.
«Сабралася шмат людзей, прыехалі байкеры, тут фатаздымкі, кветкі», — кажа адна з удзельніц вечара.
Дачка сказала Свабодзе, што цела бацькі сваякам дагэтуль не аддалі, таму дзень пахаваньня пакуль невядомы. У Сьледчым камітэце ёй сказалі, што да панядзелка дакладна не аддадуць, маўляў, яшчэ будуць нейкія экспэртызы. «Я не разумею, чаму яго там трымаюць, бо апэрацыі былі зробленыя і было бачна і зразумела, што і як зь ім адбывалася», — кажа Наста. Цалкам чытайце па спасылцы.
БелТА: Макей падзякаваў ЗША за падтрымку незалежнасьці Беларусі
З ініцыятывы амэрыканскага боку адбылася тэлефонная размова міністра замежных спраў Беларусі Ўладзімера Макея з намесьнікам дзяржаўнага сакратара ЗША па палітычных пытаньнях Дэвідам Гэйлам, паведамляе БелТА са спасылкай на прэсавую службу МЗС.
«Суразмоўцы абмеркавалі сытуацыю ў Беларусі, якая склалася пасьля выбараў, а таксама абмяняліся думкамі адносна пэрспэктыў далейшага двухбаковага ўзаемадзеяньня», — сказалі ў міністэрстве.
Паводле прэсавай службы МЗС, Уладзімер Макей падзякаваў амэрыканскаму боку за нязьменную падтрымку сувэрэнітэту і незалежнасьці Рэспублікі Беларусь.
«Злачынны загад, не злачынны… Мы — людзі ваенныя», — «НН» працытавала закрыты выступ міністра абароны перад афіцэрамі
Выданьне піша, што атрымала запіс сустрэчы міністра абароны Віктара Хрэніна з кіраўнікамі структурных падразьдзяленьняў Мінабароны, Генштабу і Ўзброеных сіл, якая адбылася 19 жніўня ў Цэнтральным доме афіцэраў у Менску.
«Тыя паліттэхнолягі, што пішуць тэксты Ціханоўскай, ставяць пытаньне: армія, вы з народам ці будзеце вы страляць супраць народу? Нас заклікаюць, у тым ліку і Ціханоўская, якая кажа: не выконвайце злачынных загадаў. Гэтая жанчына нас заклікае да здрады, парушэньня закону — не выконваць загады. Злачынны ён, не злачынны… — мы людзі ваенныя. Дзяржаўная сыстэма не разваленая, працуе, прэзыдэнт выбраны».
Натальля Гаўрусік, прадстаўніца прэсавай службы Міністэрства абароны, на запыт Радыё Свабода паведаміла, што ёй не вядома пра такі выступ міністра. Паводле яе, інфармацыю на гэты конт можна будзе атрымаць 21 жніўня.
Горадня: на несанкцыянаваны мітынг сабралася каля тысячы чалавек
У Горадні пачаўся несанкцыянаваны ўладамі мітынг на плошчы Леніна. Сабралася каля тысячы чалавек. На плошчу заехаў міліцэйскі аўтамабіль, праз узмацняльнік міліцыянты з машыны паведамілі, што мітынг не дазволены.
У пратэстоўцаў няма апаратуры. Людзі выступаюць адвольна без мікрафона. Скандуюць лёзунгі.
«Не магу рабіць выгляд, што нічога не адбываецца», — віцэ-прэзыдэнтка FIDE Анастасія Сарокіна
Кіраўніца Беларускай фэдэрацыі шахматаў, віцэ-прэзыдэнтка FIDE Анастасія Сарокіна ў інтэрвію The Telegraph выказала думку пра падзеі ў Беларусі.
«Я не магу больш рабіць выгляд, што нічога не адбываецца. Я доўгі час падтрымлівала гэтую ўладу, бо бачыла: многае зроблена для разьвіцьця спорту. Але той факт, што выбар людзей ня быў прызнаны, стаў для мяне пунктам невяртаньня», — сказала Анастасія Сарокіна.
Раней яна падпісала ліст, у якім больш за 250 вядомых спартоўцаў і супрацоўнікаў галіны выступілі з патрабаваньнямі паўторных выбараў прэзыдэнта Беларусі і спыніць гвалт сілавікоў над жыхарамі краіны.
На плошчы Незалежнасьці ў Менску зноў сабраліся людзі
Каля 19-ай гадзіны на плошчы Незалежнасьцi ў Менску сабралася пару соцен чалавек. Людзі стаяць каля помнiку Ленiна. Пакуль усё цiха. Народ працягвае падыходзіць на плошчу.
У 19.25 на праспэкце Незалежнасьцi сабралася ўжо каля тысячы чалавек. Людзi скандуюць «МТЗ», «Перамен!», «Кожны дзень». Некаторыя сьпяваюць Купалiнку.
На Паўла Севярынца, якога заўтра чакалі на волі пасьля 75 сутак арышту, завялі крымінальную справу
Жонцы Паўла Севярынца Вользе сёньня патэлефанавалі са Сьледчага камітэту і паведамілі, што на яго «заведзеная крымінальная справа паводле артыкулу № 108 Крымінальна-працэсуальнага кодэксу. Ён затрыманы на 72 гадзіны і знаходзіцца ў ІЧУ на Акрэсьціна». Адвакат патлумачыў Вользе, што яе мужа падазраюць па артыкуле 293 КК аб падрыхтоўцы да масавых беспарадкаў, як у многіх іншых палітвязьняў.
Вольга заўтра зьбіралася сустракаць Паўла пасьля 75 сутак адміністрацыйнага арышту.
«Самае брыдкае, што на яго заводзяць крымінальную справу пасьля вялікага тэрміну арышту, у апошнюю хвіліну, калі ён ужо рыхтаваўся выйсьці на волю, ён там нямыты, няголены і вось яго не выпускаюць нават на суткі, каб ён сям’ю пабачыў, так яго баяцца, што ён тут рэвалюцыю арганізуе», — сказала Свабодзе Вольга Севярынец.
У Жлобіне выступ Калесьнікавай спрабаваў сарваць вайсковы камісар Гомельскай вобласьці
Каля 1000 чалавек прысутнічае на сустрэчы ў Жлобіне з чальцом Каардынацыйнай рады для перадачы ўлады Марыяй Калесьнікавай.
Яна заявіла, што прыехала падтрымаць рабочых Беларускага мэталюргічнага заводу, дзе ўжо часткова перапынялі вытворчасьць на знак пратэсту супраць фальсыфікацыі выбараў і гвалту сілавікоў. «Я вамі ганаруся. Яны спрабуюць нас запалохваць, але нас шмат, вы – неверагодныя», – сказала Калесьнікава.
Калесьнікавай перашкаджае выступаць гомельскі ваенком, які знаходзіцца тут жа на плошчы каля ДК Мэталюргаў. Ваенком распавядае, што заводы павінны працаваць, інакш ня будзе грошай у бюджэце.
«Давайце паслухаем мяне! Толькі што сказалі, што народ Беларусі запалохваць, падыміце рукі, каму пагражалі звальненьнем», – кажа ён. Людзі Крычаць у адказ «Верым! Можам! Пераможам!» і «Сыходзь!»
Ціханоўская зьвярнулася ў МЗС Эстоніі з просьбай падняць перад Радай бясьпекі ААН пытаньне пра пагрозы на адрас членаў Каардынацыйнай рады
Сьвятлана Ціханоўская паведаміла, што 20 жніўня падчас размовы зь міністрам замежных спраў Эстоніі Урмасам Рэйнсалу зьвярнулася да таго з просьбай падняць перад Радай бясьпекі ААН пытаньне пра пагрозы на адрас членаў Каардынацыйнай рады.
«Міжнародная супольнасьць абавязана паважаць правы беларускага народу і абараняць тых, хто мае патрэбу ў абароне, ад магчымых пагроз і незаконнага перасьледу», — цытуе Ціханоўскую яе Тэлеграм-канал «Пул первой».
Дзейнасьць Каардынацыйнай рады для перадачы ўлады стала падставай для пачатку крымінальнай справы паводле артыкулу «аб захопе ўлады», заявіў 20 жніўня журналістам генэральны пракурор Аляксандар Канюк.
Яшчэ чацьвёра афіцэраў падалі рапарты аб звальненьні
Беларускія сілавікі працягваюць звальняцца са службы і паведамляюць пра гэта ў сацыяльных сетках.
З шэрагаў унутраных войскаў звольніўся старшы лётчык верталётнага атраду Аляксандар Ісачэнка. «Лічу недапушчальным удзел у дзеяньнях па дасягненьні ўлады гвалтоўнымі мэтадамі з выкарыстаньнем Узброеных Сіл Рэспублікі Беларусь», — напісаў ён у рапарце аб звальненьні, які выклаў у Інстаграм разам з фатаздымкам службовага пасьведчаньня.
Падалі рапарты і старшы лейтэнант юстыцыі Мікіта Старажэнка (ён быў супрацоўнікам Сьледчага камітэту), Аляксандар Ахрэмчык, які праслужыў у міліцыі 14 год і звольніўся ў званьні падпалкоўніка, і Аляксей Грыгор’еў (падаў рапарт пасьля 11 год службы ва Ўзброеных Сілах). Падрабязьней чытайце тут.
Міліцыянты спынілі сьпевы ля філярмоніі ў Менску
Супрацоўнікі міліцыі сарвалі «Сьпеўны сход» каля філярмоніі ў Менску, на які сабраліся каля дзьвюх соцень чалавек. Артысты, якія стаялі на прыступках філярмоніі, прасьпявалі «Пагоню» пад акампанэмэнт музыкаў, потым разам з прысутнымі некалькі разоў выгукнулі «Жыве Беларусь!».
Людзі ўздымалі знак вікторыі, некаторыя трымалі бел-чырвона-белыя сьцягі. Аднак гімн «Магутны Божа» дасьпяваць да канца не дазволілі супрацоўнікі міліцыі ў цывільным і ў форме, якія ў мэгафон пачалі папярэджваць, каб людзі разыходзіліся і іх дзеяньні незаконныя. Людзі ў адказ пачалі скандаваць: «Сыходзь!».
Артысты, сьпяваючы, сышлі з прыступак за будынак філярмоніі, прысутныя адышлі ў бок праспэкту. Яны сказалі міліцыянтам, што заўтра зноў прыйдуць сюды сьпяваць. Цалкам чытайце па спасылцы.
З дзяржаўнай газэты «Звязда» усьлед за рэдактарам звольніліся некалькі журналістаў
Супрацоўніца газэты «Звязда» Ірэна Кацяловіч паведаміла Свабодзе пра сваё звальненьне з выданьня, а таксама звальненьне яшчэ некалькіх калег. Заявы былі напісаныя на гэтым тыдні.
«Прычына ў тым, што палітычны крызіс абвастрыў несупадзеньне нашага бачаньня журанлістыкі і дзяржаўнага, і мы паспрабававалі на гэтым тыдні памяняць курс газэты, але ў нас гэта не атрымалася. Нашыя патрабаваньні не знайшлі адэкватнага адказу. Але мы прынамсі паспрабавалі» ,— сказала Кацяловіч.
Некалькі дзён таму зьвяздоўцы агучылі патрабаваньні да ўладаў, папярэдзіўшы, што ў выпадку ігнараваньня 20 жніўня распачнуць страйк. Замест перамоваў 20 жніўня супрацоўнікам прадставілі новага кіраўніка Аляксандра Карлюкевіча. Цалкам чытайце па спасылцы.
Камісія налічыла Ціханоўскай 244 галасы, а выбарцы даслалі 1850 фота бюлетэняў
На сайце сыстэмы «Голас» апублікаваныя вынікі падліку галасоў па розных выбарчых участках. Шмат на якіх зь іх назіральнікам так і не паказалі выніковыя пратаколы — фармальна ўчастковыя і раённыя камісіі спынілі сваю працу. Аднак на тых участках, дзе пратаколы ўсё ж зьявіліся, цікава параўнаць іх вынікі з колькасьцю бюлетэняў, дасланых у падтрымку Сьвятланы Ціханоўскай. «Наша Ніва» зьвярнула ўвагу на некалькі менскіх школаў, дзе розьніца ў выніках галасаваньня анамальная.
Школа № 61 (участак № 42 Першамайскага раёна)
У школе № 61 на вуліцы Кірылы Тураўскага, да якой аднесеныя новыя дамы «Маяка Менска», колькасць выбарнікаў вымяраецца тысячамі.
Камісія на чале з пэдагогам-псыхолягам Аксанай Пятровіч зафіксавала наступныя вынікі:
- Лукашэнка — 745 (67,8%)
- Ціханоўская — 244 (22,2%).
- Агулам удзельнікаў галасаваньня — 1099 чалавек.
Аднак стваральнікі «Голаса» паведамляюць, што маюць з гэтага ўчастка 1850 здымкаў бюлетэняў ад людзей, якія прагаласавалі за Ціханоўскую. Розьніца з афіцыйнымі вынікамі — 1606 галасоў. Далей чытайце па спасылцы.
Вераніка Цапкала: Ціханоўская — абраны прэзыдэнт, загады Лукашэнкі сілавікам — фашысцкія
Чалец аб’яднанага штабу Сьвятланы Ціханоўскай і жонка ўдзельніка прэзыдэнцкай кампаніі Валера Цапкалы Вераніка Цапкала ў інтэрвію «Белсату» расказала, каго лічыць новым прэзыдэнтам Беларусі, і што думае пра абвінавачваньні ў прарасейскасьці.
Адказваючы на пытаньне пра адсутнасьць лідэраў у беларускага пратэсту, Вераніка Цапкала сказала, што «ня трэба шукаць іншага лідэра, чым Сьвятлана Ціханоўская. «У нас лідэр цяпер Сьвятлана ЦІханоўская, яна абраны прэзыдэнт, але яна вымушаная была пакінуць Беларусь», — сказала Цапкала. Паводле яе, беларусы прызвычаіліся да самаарганізацыі, да змаганьня за свае правы, бо «ў нас няма кіраўніка цягам многіх год».
Паводле слоў суразмоўцы, яна працягвае супрацоўнічаць зь Ціханоўскай, узгадняючы свае пазыцыі. Цалкам чытайце па спасылцы.
Віленскі ўнівэрсытэт стварыў стыпэндыю для беларусаў
Віленскі ўнівэрсытэт стварыў стыпэндыю для беларускіх грамадзян, «каб выказаць салідарнасьць з народам Беларусі і падтрымаць яго імкненьні да дэмакратыі». «Стыпэндыя Вялікага Княства Літоўскага» цалкам пакрывае кошт навучаньня, а ў дадатак усе ўхваленыя кандыдаты атрымаюць штомесячна 200 эўра цягам 10 месяцаў.
Адначасна Віленскі ўнівэрсытэт дасьць магчымасьць перавесьціся туды на вучобу беларускім студэнтам, якіх перасьледуюць за грамадзкую ці палітычную дзейнасьць. Падаць заяўку можна тут да 14 верасьня 2020 году.