Свабода паразмаўляла зь сябрам выбарчай камісіі настаўніцай Дар’яй Мама, якая не падпісала выніковы пратакол, у якім колькасьць галасоў за Ціханоўскую была заніжаная прыкладна на 130.
Дар’я Мама выкладае хімію ў 23-й беларускамоўнай гімназіі. Яна была сябрам выбарчай камісіі на ўчастку № 65 Савецкага раёну Менску.
«Хтосьці ідзе на барыкады, хтосьці ідзе на забастоўку, а я павінна рабіць тое, што магу»
Дарья Мама ў відэазвароце кажа, што пры падліку галасоў у асноўны дзень галасаваньня яна налічыла 352 бюлетэні за Сьвятлану Ціханоўскую. Пры пераліку бюлетэняў высьветлілася, што сябры камісіі памыліліся, на самой справе бюлетэняў за Ціханоўскую ў гэтым стосе было на 30 больш — гэта значыць, разам 382. Калега, які лічыў побач з Дар’яй, налічыў 206 бюлетэняў за Ціханоўскую. Значыць, за Ціханоўскую прагаласавалі 588 выбарнікаў.
Як сьцьвярджае Дар’я, усім сябрам камісіі і назіральнікам агучылі іншыя выніковыя лічбы — 450 галасоў за Ціханоўскую, то бок на 138 менш. Менавіта таму яна не падпісала пратаколу.
Настаўніца яшчэ знаходзіцца ў адпачынку, яна зьехала зь Менску. Кажа, пакуль ніякіх наступстваў яна не адчувае.
«Калі я запісвала гэта відэа, вядома, шмат чаго перадумала, было цяжка, але ўрэшце вырашыла: хтосьці ідзе на барыкады, хтосьці ідзе на забастоўку, а я павінна рабіць тое, што магу.
Мне тут тэлефануюць сябры, калегі з працы, прапануюць дапамогу, падтрымліваюць. Можа, кіраўніцтва паміж сабой і абмяркоўвае, але да мяне ніякай інфармацыі не даходзіла. Я разумею, што могуць быць наступствы, але пакуль я не адчуваю.
Безумоўна, і калі я запісвала зварот, і на гэты момант яшчэ спадзяюся, што ён не застанецца незаўважаным і людзі задумаюцца і зробяць тое, што павінны зрабіць, нават калі напачатку пазыцыя ў іх была крыху іншая. Можа, гэта і іх натхніць на што-небудзь», — спадзяецца Дарʼя.
«У нас на ўчастку не „зрабілі“ вялікага адрыву»
У камісіі было 13 чалавек, адна настаўніца была хворая з падазрэньнем на каранавірус. Прозьвішчаў сяброў камісіі Дар’я не называе прынцыпова.
«Гэта сумленная пазыцыя кожнага, хто браў удзел у працы камісіі, вы ж самі можаце паглядзець, хто ў нас быў старшынёй. І гэта не дырэктарка гімназіі. Безумоўна, кіруе працэсам старшыня.
Калі агучвалі пратакол, быў такі эмацыйны момант! Хтосьці пачаў ужо там плакаць — на самім падліку галасоў, праўда, было вельмі цяжка. Мяне саму ўжо калаціла знутры», — прызнаецца жанчына.
У выніковым пратаколе на ўчастку № 65 за Лукашэнку было зафіксавана, прыкладна на 100 галасоў больш, чым за Ціханоўскую.
«У нас на ўчастку не „зрабілі“ вялікага адрыву. Магчыма таму, што я адразу сказала, што ня буду падпісваць сфальсыфікаванага пратаколу, Таму, думаю, і не адважыліся зрабіць вялікі адрыў.
Да таго ж у нас даволі стары раён (плошча Якуба Коласа, самы цэнтар праспэкту Незалежнасьці), там жыве шмат людзей пажылога веку. І яшчэ калі ішло датэрміновае галасаваньне, і на пачатку дня асноўнага галасаваньня я думала, што адрыў будзе значна большым. Раней, каб прагаласаваць на даму, нам прыходзіла да 140 заявак, а тут было толькі 13. То бок людзі ў любым стане ішлі галасаваць. Шмат людзей былі зь белымі стужкамі», — кажа Дар’я Мама.
Што да датэрміновага галасаваньня, ніякіх «укідаў» лішніх бюлетэняў не было. І назіральнікі сачылі, і сябры камісіі лічылі колькасьць людзей, перакананая Дар’я Мама.
