У Магілёве затрымалі журналістаў «Белсату»
Затрыманыя журналісты тэлеканалу «Белсат» Аліна Скрабунова і Аляксандар Сідарэўскі, яны пасьпелі адправіць сыгнал SOS, паведамляе Праваабарончы цэнтар «Вясна» ў Тэлеграме. Паводле БАЖ, журналісты былі ў Магілёве.
Ініцыятыва «Сумленныя людзі»: пратаколы выбарчых камісій указваюць на фальсыфікацыю
Такія высновы агучыла ініцыятыва «Сумленныя людзі» паводле папярэдніх дадзеных грамадзянскага кантролю на 15:00 11 жніўня. Больш за 400 атрыманых пратаколаў яшчэ не апрацаваныя, гаворыцца ў прэс-рэлізе ініцыятывы.
Валянтэры «Сумленных людзей» сабралі і прааналізавалі зьвесткі з 749 выбарчых участкаў па ўсёй Беларусі.
Таксама яны зафіксавалі 8406 парушэньняў, якія ўключалі нядопуск назіральнікаў і неразьмяшчэньне пратаколаў у агульнадаступным месцы: людзі зьбіраліся каля ўчасткаў, але камісія пакідала будынкі з АМАПам праз чорны выхад. Таксама зафіксавалі неаднаразовыя адмовы чальцоў выбаркамаў падпісваць фальсыфікаваныя пратаколаў.
У Кіеве на дронах запусьцілі вялізны бел-чырвона-белы сьцяг. ВІДЭА
Украінская прыватная кампанія DRONARIUM, якая займаецца аэраздымкамі і надае паслугі дронаў, правяла сваю акцыю салідарнасьці зь Беларусьсю. Вялікі бел-чырвона-белы сьцяг сёньня лунаў над Дняпром і Ўладзімірскай горкай у Кіеве.
«Гэта мінімум таго, што мы, ва Ўкраіне, можам зрабіць для Беларусі. Мы зрабілі тое, што ўмеем. І гэта выйшла прыгожа. Найбліжэйшым часам мы правядзем яшчэ некалькі такіх акцый ужо ў іншых градах Украіны», — сказаў Свабодзе кіраўнік кампаніі Руслан Бяляеў.
Чэрачань падаў скаргу ў ЦВК і падтрымаў ад'езд Ціханоўскай
Былы кандыдат у прэзыдэнты Беларусі, старшыня партыі «Грамада» Сяргей Чэрачань падаў скаргу ў ЦВК на вынікі выбараў. У інтэрвію Свабодзе ён камэнтуе падзеі апошніх двух дзён і ад’езд Сьвятланы Ціханоўскай у Літву.
— Як вы ацэньваеце вынікі выбараў і свой вынік у іх?
— На сёньняшні момант сіламі нашых назіральнікаў за маім подпісам мы падалі скаргу ў ЦВК і Генэральную пракуратуру аб тым, што выбары былі праведзеныя са шматлікімі парушэньнямі, і што дадзены вынік не дазваляе нам іх прызнаць.
— Як вы пракамэнтуеце ўчорашні ад’езд Сьвятланы Ціханоўскай у Літву?
— У дадзеным выпадку гэта была вымушаная мера. Яна цудоўна разумела, што яе могуць арыштаваць, і пад пэўным ціскам яна, на мой погляд, зрабіла для сябе апраўданы выбар і прыняла правільнае рашэньне.
На скрыжаваньні праспэкту Пушкіна і Прытыцкага затрымалі каля дзясятка чалавек
На скрыжаваньні праспэкту Пушкіна і Прытыцкага станцыя мэтро закрытая, усе ўваходы атачыў АМАП і ўнутраныя войскі ў поўнай экіпіроўцы (шчыты, дубінкі, шаломы). На падыходах да станцыі мэтро сілавікі затрымалі каля дзясятка чалавек, іх утрымліваюць каля крамы «Кветкі», у адкрытай кавярні, у атачэньні сілавікоў. Працягваюць затрымліваюць. Таксама затрымалі раварыста, пасадзілі ў грузавік.
Усё перакрытае аўтобусамі ўнутраных войскаў.
Машыны гудзяць. Людзі абураюцца. Транспарт ходзіць.
Агароджа вакол станцыі мэтро, дзе 10 жніўня загінуў чалавек, упрыгожаная кветкамі. Кветкі таксама ляжаць на праезнай часткі.
У мэтро супрацоўнікаў папярэдзілі, што будзе адключаная сувязь.
Па цэнтры Менску езьдзіць хуткая, якой кіруюць людзі ў масках. ФАТАФАКТ
Каля Палацу Рэспублікі ў Менску заўважаная хуткая дапамога, якой кіруюць людзі ў масках. Фотаздымак, які гэта пацьвярджае, мы атрымалі ад чытача.
У панядзелак увечары сьведкі пратэсту каля ўнівэрсаму «Рыга» паведамілі Свабодзе, што калі прысутныя запусьцілі ў кола некалькі машын хуткай дапамогі і людзі раступіліся, каб прапусьціць гэтыя 3 машыны, адтуль з вокнаў выкінулі пакеты зь невядомым зьмесьціва і паехалі далей.
Цэнтар Менску ачэплены
Цэнтар Менску (праспэкт Незалежнасьці вакол Кастрычніцкай) ачэплены. Стуль выпускаюць, туды не прапускаюць, паведамляе «Наша Ніва».
У Менску закрылі 7 станцый мэтро
У Менску сем станцый мэтро закрытыя на ўваход і выхад: «Кастрычніцкая», «Плошча Леніна», «Купалаўская», «Няміга», «Фрунзенская», «Маладзёжная», «Пушкінская», паведамляюць «Наша Ніва» і KyKy.org у Тэлеграме. Цягнікі на іх не спыняюцца.
Кіраўнік МЗС Літвы пра ад’езд Ціханоўскай: у яе не было асаблівага выбару
Сьвятлана Ціханоўская знаходзіцца ў бясьпецы разам са сваімі дзецьмі, паведаміў міністар замежных спраў Літвы Лінас Лінкявічус на прэс-канфэрэнцыі ў Вільні.
Па словах Лінкявічуса, яна прыехала ў Літву пасьля ціску з боку ўладаў Беларусі, а службовыя асобы гэтай краіны «не перашкаджалі ад’езду, нават дапамаглі». «(...) у яе не было асаблівага выбару, як толькі пакінуць краіну», — сказаў Лінас Лінкявічус.
Міністар дадаў, што ў Ціханоўскай была нацыянальная літоўская віза, а яе дзеці прыехалі ў Літву яшчэ раней.
«У яе была нацыянальная віза Літвы, гэта значыць, што яна можа знаходзіцца ў Літве на працягу году без абмежаваньняў, і, мабыць, гэта вызначыла яе выбар зьехаць у Літву», — сказаў міністар.
Паводле ягоных словаў, Ціханоўская знаходзіцца ў выдзеленым дзяржавай жыльлі, ёй далі ахову. Па словах Лінкявічуса, у Літву разам з кандыдаткай прыехала кіраўніца яе штабу Марыя Мароз, яе дзеці таксама ў Літве.
Затрыманых пратэстоўцаў вывозілі з Наваполацку і Полацку, бо не было дзе трымаць
Два дні запар у Наваполацку і Полацку ідуць акцыі пратэсту. Вось што расказаў Радыё Свабода адзін са сьведкаў разгону ўвечары 10 жніўня.
— Акцыі былі мірныя, выходзіла ня толькі моладзь, але і старэйшыя людзі, нават людзі зь дзецьмі, але супраць людзей ужылі сьвятлашумавыя гранаты.
АМАП перакрыў цэнтральную плошчу, і пачаў выцясьняць людзей з навакольлья. Пратэстоўцы нічога ня кідалі ў ампаўцаў, але тыя некалькі разоў пачыналі кідаць сьвятлашумавыя гранаты ў людзей.
Было два аўтобусы людзей у спэцыяльнай экіпіроўцы, і некалькі мікрааўтобусаў зь людзьмі ў чорным і людзьмі ў цывільным. Былі затрыманыя дзясяткі людзей.
Беларускія «сэнатары» назвалі дзеяньні міліцыі адэкватнымі
Чальцы Савета Рэспублікі і дэпутаты Палаты прадстаўнікоў Беларусі выступілі з заявай, у якой «катэгарычна асуджаюць спробы нешматлікіх ангажаваных груп раскалоць грамадзтва і дэстабілізаваць абстаноўку ў краіне», паведамляе БелТА.
«Нельга дапусьціць, каб моладзь Беларусі стала разьменнай манэтай у жаданьні разгайдаць сытуацыю. Кожны грамадзянін абавязаны выконваць законы, а дзяржава — забясьпечваць правапарадак і спакой. Дзеяньні праваахоўных органаў адэкватныя правакацыям удзельнікаў несанкцыянаваных акцый. Шлях гвалту не прымальны для беларускага народа», — гаворыцца ў заяве па выніках прэзыдэнцкіх выбараў.
Затрыманым у Гомлі прысуджаюць па 10–15 дзён арышту, на суды не пускаюць, інфармацыю сваякам не даюць
Затрыманым у Гомлі 10 жніўня даюць па 10-15 дзён арышту, кажуць родныя. Суды праходзяць у выязным рэжыме ў будынках РАУС, ІЧУ і СІЗА. На суды нікога не дапускаюць.
Сваякам ані ў міліцыі, ані ў судзе не даюць ніякай інфармацыі. Толькі некаторыя сваякі здолелі даведацца пра тэрміны арышту. Адбываць арышт людзей развозяць па розных ІЧУ вобласьці.
«Сыну далі 12 сутак. У гомельскім ІЧУ адмаўляюцца казаць, дзе ён. Сказалі — шукайце яго ці ў Каленкавічах, ці ў Брагіне. Гэта поўнае беззаконьне!» — пракамэнтаваў Свабодзе жыхар Гомля Анатоль.
Іншым сваякам, якія чакаюць зьвестак пра сваіх блізкіх пад СІЗА, міліцыя адказвае так: «Усім — ад 10 да 15 сутак». Натальлі ў Цэнтральным РАУС паведамілі, што яе сын атрымаў прысуд на 7 сутак. А ў канцылярыі суду Цэнтральнага раёну сказалі, што на 15.
«Гэта нейкі жах, сваволя, бязьмежжа, я ў шоку. Ён проста ішоў да сваёй дзяўчыны», — абураецца Натальля. Яе сыну 18 гадоў. Ён вучыцца ў адным з каледжаў.
Арцыбіскуп Кандрусевіч заклікаў спыніць гвалт у Беларусі, сесьці за стол перамоваў
Мітрапаліт Менска-Магілёўскі арцыбіскуп Тадэвуш Кандрусевіч 11 жніўня выдаў адмысловы зварот у сувязі са «складанай грамадзка-палітычнай сытуацыяй у Беларусі», піша «Наша ніва».
Кандрусевіч піша, што апошнія дні ў Беларусі назіралася «нябачаная дагэтуль напружанасьць», адбыліся сутыкненьні, «пралілася першая кроў, і ёсьць пацярпелыя з абодвух бакоў».
«Упершыню ў сучаснай гісторыі Беларусі брат падняў руку на брата», — заяўляе Кандрусевіч. Ён нагадвае біблейскую гісторыю пра Каіна, які забіў брата Абэля.
Арцыбіскуп заклікаў усе бакі спыніць гвалт у «імя Бога бязьмежнай міласэрнасьці, любові і супакою».
«З даўніх часоў наш народ вырашаў складаныя пытаньні на агульных сходах, якія ў старажытных славянаў называліся вечам, — нагадаў ён. — З улікам гэтага каштоўнага досьведу, дзеля хутчэйшага пераадоленьня крызісу ў грамадзтве і спыненьня гвалту прапаную неадкладна склікаць адмысловы круглы стол, каб за ім, а не на барыкадах, вырашаць далейшы лёс нашай Бацькаўшчыны».
Прэзыдэнт Літвы: відэазапісы Сьвятланы Ціханоўскай былі зробленыя пад ціскам
Прэзыдэнт Літвы Гітанас Наўседа ўпэўнены, што відэазапісы кандыдаткі ў прэзыдэнты Беларусі Сьвятланы Ціханоўскай, якія зьявіліся ў аўторак, былі зробленыя пад ціскам, паведамляе delfi.lt.
«Ніводзін чалавек у здаровым розуме не паверыць, што відэа Ціханоўская запісала добраахвотна. Гэта толькі яшчэ адзін доказ таго, якія мэтады выкарыстоўваюць, каб зламаць чалавека і дух народу. Мы на працягу апошніх некалькіх тыдняў назіралі гэтыя спробы», – пісаў у фэйсбуку Наўседа.
Кіраўнік Літвы акцэнтуе, што цяпер Ціханоўскай трэба ачуняць пасьля перажытага шоку і фізычных выпрабаваньняў.
«Літва заўсёды даць прытулак сілам, гатовым ствараць свабоду і дэмакратыю. Гэтую сытуацыю і новыя падзеі ў Беларусі я сёньня абмяркую з старшынём Эўрапейскай рады Шарлем Мішэлем», — сказаў ён.
Улады выштурхалі Ціханоўскую за мяжу. Ці дапаможа гэта зьбіць хвалю пратэсту?
Беларусь уступіла ў пэрыяд вострага палітычнага крызысу з элемэнтамі грамадзянскай вайны. І прычына яго вельмі банальная, такое адбывалася шмат дзе ў сьвеце. Аўтарытарны лідэр, прайграўшы выбары, адмаўляецца саступаць уладу пераможцу. Паводле ацэнак штаба Сьвятланы Ціханоўскай, на тых участках, дзе галасы палічылі сумленна, яна набрала 60-70%, піша палітычны аглядальнік Свабоды Валер Карбалевіч.
Сьцісла:
- Пратэсты маюць шырокі ахоп. Паводле ацэнак МУС, у ноч з 9 на 10 жніўня пратэстныя акцыі адбыліся ў 33 гарадах.
- Пратэст моцна радыкалізаваўся. Ягоныя удзельнікі ўступалі у жорсткія сутычкі з супрацоўнікамі МУС.
- Нягледзячы на затрыманьне ў першую ноч каля 3 тысяч чалавек, гэта не зьбіла пратэстную хвалю на наступны дзень.
- Няма канкрэтнага суб’екту, які б рэпрэзэнтаваў патрабаваньні абуранага народу.
- У беларускім расколатым грамадзтве няма палітычных сілаў, якія б паспрабавалі узяць на сябе ролю пасярэднікаў, прапанавалі мэханізм мірнага вырашэньня крызысу.
«Ня дай бог апынуцца перад выбарам, перад якім апынулася я». Пасьля ад’езду Ціханоўская апублікавала відэазварот
11 жніўня кандыдатка ў прэзыдэнты Беларусі Сьвятлана Ціханоўская апублікавала ў Youtube відэазварот да беларусаў. З раніцы стала вядома, што яна зьехала ў Літву.
На відэа Ціханоўская выглядае даволі прыгнечанай і ўсхваляванай. Дзе і пры якіх абставінах запісаны відэазварот, невядома.
Тэкст звароту цалкам:
«Вы ведаеце, я думала, што ўся гэтая кампанія мяне вельмі моцна загартавала і надала мне столькі сіл, што я вытрымаю ўсё.
Але, напэўна, я так і засталася той слабой жанчынай, якой была першапачаткова. Я прыняла вельмі цяжкае для сябе рашэньне. Гэта рашэньне я прыняла абсалютна самастойна: ні сябры, ні родныя, ні штаб, ні Сяргей ніякім чынам на яго проста не маглі паўплываць.
І я ведаю, што многія мяне зразумеюць, многія мяне асудзяць, а многія і зьненавідзяць. Але, ведаеце, ня дай бог апынуцца перад такім выбарам, перад якім апынулася я.
Таму, людзі, беражыце сябе, калі ласка — ніводнае жыцьцё ня варта таго, што цяпер адбываецца. Дзеці — гэта самае важнае, што ёсьць у нашым жыцьці», — гаворыць Ціханоўская.
МУС ведае, але не называе імя загінулага
«Імя загінулага 10 жніўня падчас пратэстаў у Менску чалавека спэцслужбам вядомае», сказала Свабодзе прэс-сакратарка МУС Вольга Чамаданава.
Аднак яна адмовілася назваць імя, сказаўшы, што працуе сьледча-апэратыўная група. Таксама Чамаданава не паведаміла іншыя падрабязнасьці пра загінулага. Прычыну сьмерці прэс-служба паведамляла на сваім тэлеграм-канале.
Гэта першы афіцыйна пацьверджаны выпадак гібелі ўдзельнікі акцый пратэсту супраць прэзыдэнта Аляксандра Лукашэнкі, якія суправаджаюцца вулічнымі сутыкненьнямі.
Паводле інфармацыі МУС, каля 23.00 на вуліцы Прытыцкага адзін з пратэстоўцаў спрабаваў кінуць неўстаноўленую выбуховую прыладу ў бок спэцназаўцаў. Яна выбухнула ў руцэ, мужчына атрымаў траўмы, несумяшчальныя з жыцьцём. Паводле вэрсіі МУС, натоўп будаваў барыкады для блякаваньня руху.
«Наша Ніва» пісала, што дэманстрантаў у гэты час «масіравана абстрэльвалі» — раней з Прытыцкага неаднаразова паведамлялі пра выбухі сьвятлошумавых гранатаў. «Белсат» перадаваў, што выбухі чуваць і пасьля паведамленьня МУС.
Больш за паўмільёна даляраў сабралі на дапамогу затрыманым і параненым у вулічных пратэстах
Ініцыятыва BY_help 11 жніўня сабрала 540 тысяч даляраў на дапамогу параненым на вулічных пратэстах, а таксама затрыманым.
Грамадзянская кампанія BY_help аплачвае штрафы затрыманым, дапамагае ў рэабілітацыі пацярпелым і затрыманым.
Таксама ініцыятыва шукае ў мэдыягрупу людзей, якія:
- могуць перакладаць на замежныя мовы інфармацыю пра сытуацыю ў Беларусі;
- маюць кантакты супрацоўнікаў мэдыяў, у краінах, дзе яны жывуць.
- By АБ
Першыя выракі за акцыю 9 жніўня ў Магілёве: 10 чалавек асудзілі на 15 сутак
Сталі вядомыя першыя выракі па затрыманых у Магілёве падчас акцыі пратэсту 9 жніўня. 10 чалавек асудзілі на 15 сутак адміністрацыйнага арышту кожнага, судзьдзі — Панасенка і Палякова.
Судзілі затрыманых у ізалятары часовага ўтрыманьня. Фактычна, працэсы былі закрытыя. 10 чалавек асудзілі менш чым за гадзіну.
Родныя асуджаных «з боем» дамагаліся зьвестак пра тое, які вынік разгляду судоў.
У Ленінскім судзе Магілёва 11 жніўня будуць судзіць 37 чалавек, мяркуючы з вывешаных сьпісаў. Колькі будуць судзіць у Кастрычніцкім судзе пакуль невядома: у канцылярыі кажуць, што ня ведаюць, сьпісы адміністратыўных спраў не вывешваюць.