Штатных карэспандэнтаў тэлеканала «Настоящее время» (праект Радыё Свабода) – Ірыну Рамалійскую, Юрыя Баранюка і Івана Грабянюка выслалі зь Беларусі, паведамляе тэлеканал. Ім забаронены ўезд на тэрыторыю Беларусі тэрмінам на 10 гадоў.
Журналістаў затрымалі ў пятніцу ўвечары ў гатэлі «Менск» супрацоўнікі міліцыі. Прычынай назвалі працу без акрэдытацыі.
Рамалійская і Грабянюк зьяўляюцца грамадзянамі Ўкраіны, Баранюк – грамадзянін Расеі. Грамадзянаў Украіны адправілі рэйсам у Адэсу.
«Затрыманыя журналісты прафэсійна выконвалі сваю працу па асьвятленьні выбараў прэзыдэнта Рэспублікі Беларусь. Тэлеканал «Настоящее время» своечасова запрасіў акрэдытацыю для сваіх журналістаў перад прэзыдэнцкімі выбарамі, але яна ім не была дадзена, – заявіла часова выкакаўца абавязкаў прэзыдэнта мэдыякарпарацыі Радыё Свабода / Радыё Свабодная Эўропа Дэйзі Сіндэлар. – Адмова ўладаў Беларусі своечасова акрэдытаваць нашых журналістаў – яшчэ адзін прыклад пагарды да правоў свабоднай прэсы і права грамадзян Беларусі на інфармацыю без цэнзуры».
«Мы абураныя затрыманьнем нашых журналістаў і патрабуем выкананьня ўладамі прызнанага ва ўсім сьвеце права журналістаў на ажыцьцяўленьне сваёй прафэсійнай дзейнасьці», – сказала Сіндэлар.
Тэлеканал «Настоящее время» ўжо некалькі тыдняў асьвятляе выбары ў Беларусі і напярэдадні правёў чатырохгадзінны спэцэфір з сарванага мітынгу Сьвятланы Ціханоўскі. Толькі ў сацсетках яго паглядзелі больш за паўмільёна разоў.
