Нацыянальны акадэмічны тэатар імя Янкі Купалы праводзіць першы музэйна-тэатральны онлайн-фэстываль «Паўлінка на Купальле». Фэстываль пачаўся сёньня, 6 ліпеня, а 20-й гадзіне і завершыцца 12 ліпеня.
Паўдзельнічаць у віртуальным фэстывалі можна па спасылцы. Ён даступны на трох мовах: беларускай, ангельскай і расейскай.
Відэасюжэты разьбітыя на тры тэматычныя часткі: «Папараць-кветка», «Паўлінка» і «Сьвята».
«Папараць-кветка»
Гледачам пакажуць экскурсію па Вязынцы, дзе нарадзіўся Янка Купала.
Акторка Купалаўскага Марта Голубева правядзе майстар-кляс па пляценьні купальскага вянка.
«Паўлінка»
Гледачам прапануюць зазірнуць у закулісныя лябірынты Купалаўскага тэатру і «пабачыць шматлікія купалаўскія таямніцы». Экскурсію па тэатры правядуць актрысы Зоя Белахвосьцік, якая выконвала ролю Паўлінкі з 1982 да 2000 году, і Крысьціна Дробыш. Яны раскажуць пра гісторыю тэатру, пакажуць бутафорскі цэх, грымёркі, пульт памочніка рэжысэра, патлумачаць, хто і як прымае ўдзел у стварэньні кожнага спэктакля, прадставяць унікальную падборку афіш «Паўлінкі» з 1913 па 2013 гады.
Тут жа можна будзе паглядзець спэктакль «Паўлінка».
«Сьвята»
У сюжэце «Лявоніха з Паўлінкай і Адольфам Быкоўскім» гледачоў навучаць танцаваць «Лявоніху». А таму, хто потым здыме і выкладзе самую хвацкую лявоніху ў сацыяльных сетках з хэштэгам #паўлінканакупалле, абяцаюць падарунак.
Аркестар тэатру зайграе выбраныя кампазыцыі са спэктакляў Купалаўскага.
У межах онлайн-фэсту «Паўлінка на Купальле» гледачы трапяць у студыю легендарнага калектыву «Песьняры», створанага музыкам Уладзімерам Мулявіным у далёкім 1969 годзе.
