У Офісе прэзыдэнта Ўкраіны паведамілі, што жонка Ўладзіміра Зяленскага Алена знаходзіцца на амбуляторным лячэньні ў сувязі з пацьверджаным COVID-19.
Каранавірус у Беларусі і ў сьвеце. Як разьвіваюцца падзеі >>
«Першая лэдзі пачувае сябе добра і ня мае ніякіх сымптомаў захворваньня. Цяпер яна знаходзіцца на амбуляторным лячэньні, ізаляваная ад іншых членаў сям’і», — гаворыцца ў паведамленьні.
У сувязі з гэтым тэставаньне прайшла ўся сям’я — Уладзімір Зяленскі і дзеці. У іх вынікі адмоўныя.
У Офісе прэзыдэнта падкрэсьлілі, што Алена Зяленская ўвесь час выконвала ўсе патрабаваньні карантыну і рэкамэндацыі Міністэрства аховы здароўя, а таксама рэгулярна праходзіла тэставаньне. Вынікі папярэдніх аналізаў на пачатку чэрвеня былі адмоўныя.
«Дзе і калі магло адбыцца заражэньне — пакуль невядома. Праводзіцца эпідэмічнае расьсьледаваньне. Усім кантактным асобам паведамілі пра патэнцыйную пагрозу інфікаваньня і рэкамэндавалі пайсьці на самаізаляцыю і па магчымасьці таксама прайсьці тэставаньне», — гаворыцца ў паведамленьні.
Зяленскі сам хацеў захварэць
Некалькі дзён таму Ўладзімір Зяленскі ў інтэрвію інтэрнэт-выданьню «Українська правда» паведаміў, што хацеў наўмысна заразіцца каранавірусам, каб на ўласным прыкладзе паказаць людзям, што «гэта страшна».
«Я хацеў прайсьці гэты этап. Каб было лягчэй людзям. Я прапанаваў нашым: „Давайце я захварэю, мяне адразу ізалюем на Банкавай (на гэтай вуліцы знаходзіцца Офіс прэзыдэнта Ўкраіны. — РС). І пражыву гэта нармальна. Каб людзі зразумелі — гэта страшна, ты можаш захварэць, табе кепска. І я празь сябе гэта прапушчу, пакажу“. Вырашылі, што занадта шмат. Перабор», — сказаў Уладзімір Зяленскі.
Ён дадаў, што гэтага яму не даравала б сям’я:
«Яны б сказалі, што я вар’ят. І, у прынцыпе, яны мелі б рацыю».
Паводле Цэнтру грамадзкага здароўя, за 11 чэрвеня ва Ўкраіне дыягнаставана 683 новыя выпадкі COVID-19, вылечыліся 426 чалавек, 16 памерлі ад ускладненьняў. За ўвесь час эпідэміі каранавірус пацьвердзілі ў 29 753 жыхароў Украіны, вылечыліся больш за 13,5 тысячы чалавек, памерлі 870.
Пасьля дыягнаставаньня першых трох выпадкаў каранавірусу ва Ўкраіне ад 12 сакавіка ўвялі жорсткія карантынныя абмежаваньні, у тым ліку была спыненая дзейнасьць прадпрыемстваў, апроч крытычнай інфраструктуры, закрытыя межы, спынены грамадзкі транспарт і міжнародная авіязлучэньне. З 11 траўня ва Ўкраіне паэтапна аслабляюць карантынныя захады.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
