Краіны павінны даслаць запісы прамоваў сваіх лідэраў, працягласьцю ня больш за 15 хвілін, за 5 дзён да пачатку работы сэсіі.
Каранавірус у Беларусі і ў сьвеце. Як разьвіваюцца падзеі >>
Старшыня Генасамблеі ААН Тыджані Мухамад-Бандэ зьвярнуўся да краін, якія ўваходзяць у арганізацыю, з прапановай правесьці заплянаваную на 22-29 верасьня сэсію Генэральнай асамблеі ў онлайн-рэжыме. Пра гэта гаворыцца ў ягоным лісьце, разасланым у сераду, 10 чэрвеня, у краіны-ўдзельніцы, інфармуе агенцтва AFP.
Мяркуецца, што ў зале Генасамблеі пакажуць загадзя запісаныя выступы без асабістага ўдзелу лідэраў дзяржаў у пасяджэньні.
«Я думаю, што абмежаваньні на міжнародныя паездкі і правядзеньне маштабных сустрэч пры непасрэдным удзеле лідэраў дзяржаў з прычыны пандэміі COVID-19, магчыма, у той ці іншай ступені ўсё яшчэ будуць дзейнічаць у верасьні 2020 году», – напісаў Мухамад-Бандэ.
Паводле яго, краіны павінны даслаць запісу прамоваў сваіх прэзыдэнтаў, прэм'ер-міністраў ці іншых прадстаўнікоў, працягласьцю ня больш за 15 хвілін, за пяць дзён да пачатку работы сэсіі.
Асабіста прысутнічаць на сэсіі Генасамблеі змогуць быць адзін або два дыпляматы ад кожнай дэлегацыі.
Генэральная Асамблея ААН зьяўляецца найбольшым дыпляматычнымі сходам у сьвеце і ўключае ў сябе сотні паралельных мерапрыемстваў і двухбаковых або шматбаковых сустрэч сусьветных лідэраў.
Яна ніколі не адмянялася з часоў заснаваньня ААН у 1945 годзе, але пераносілася ў 2001-м з прычыны тэрактаў 11 верасьня ў ЗША і ў 1964-м празь фінансавы крызіс.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
