Жаночы чэмпіянат Беларусі ў футболе стартуе 30 красавіка. Такое рашэньне прыняў выканкам Беларускай фэдэрацыі футболу.
Спачатку плянавалася пачаць жаночае першынства 16 красавіка, але старт адклалі ў сувязі з тым, што некалькі футбалістак кантактавалі з магчымымі носьбітамі COVID-19. Аднак праведзеныя тэсты на наяўнасьць вірусу далі адмоўныя вынікі.
29-ы па ліку жаночы чэмпіянат Беларусі пройдзе ў тры этапы і завершыцца 8 лістапада. Апошнія сем гадоў чэмпіёнкамі краіны нязьменна станавіліся футбалісткі «Менску», а больш за ўсё тытулаў у «Бабруйчанкі», якая 12 разоў заваёўвала залатыя мэдалі.
У Беларусі працягваюцца футбольныя чэмпіянаты сярод мужчын — у вышэйшай, першай і другой лігах. У трох дывізыёнах гуляюць 52 каманды. Калі далучацца жанчыны, агулам будзе 60.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
