Лукашэнка: у Беларусі каля 90 чалавек на штучнай вэнтыляцыі лёгкіх

17 красавік 2020, 22:09 абноўлена 17 красавік 2020, 22:16

Рэанімацыйнае месца з апаратамі ШВЛ, ілюстрацыйнае фота

Аляксандар Лукашэнка заклікаў беларусаў не спрабаваць перанесьці хваробу на нагах, займаючыся самалячэньнем. Прамову Лукашэнкі падчас паездкі ў Горадзенскую вобласьць паказалі ў эфіры тэлеканалу «Беларусь 1».

Што сказаў Лукашэнка?

У Беларусі каля 90 чалавек знаходзіцца на апаратах штучнай вэнтыляцыі лёгкіх.
У Беларусі 2,5 тысячы апаратаў ШВЛ.
Пры першых прыкметах хваробы трэба зьвярнуцца да ўрача. «Той, хто адразу зьвярнуўся, праз тыдзень здаровы».
У сыстэме МУС — каля 20 хворых на каранавірус. Паводле Лукашэнкі, яны заразіліся ў санаторыі ведамства.

ГЛЯДЗІЦЕ ТАКСАМА:

У бацькі рэжысэра Курэйчыка каранавірус. Ён адпачываў у санаторыі для міліцыянтаў

«Шмат тэстуем, але яшчэ павінен вам адкрыта сказаць, што я выявіў, зыходзячы з гэтай інфармацыі, і ўжо ня толькі я: [расейскія] тэсты — ні к чорту. Нават тут вось абсьледавалі расейцаў (на атамную станцыю прыехалі), усіх 15 чалавек пралячылі, дасьледавалі расейскімі тэстамі — усё станоўча. Зноў кладзі ў бальніцу і лячы. Адмовіліся ад расейскіх тэстаў, узялі свае, кітайскія — адзін толькі чалавек аказаўся каранавірусны».
«Таму ня парцеся асабліва наконт гэтай хваробы, занадта шмат невядомага — новы вірус, занадта шмат памылак».
«Самае страшнае, каб у нас хапіла лекараў і месцаў там, дзе мы лечым. У нас каля 10 тысяч, мы загадзя падрыхтавалі такія месцы».

ГЛЯДЗІЦЕ ТАКСАМА:
Лукашэнка сказаў, што масты на шашы важнейшыя за каранавірус

ГЛЯДЗІЦЕ ТАКСАМА:
Палітыка Лукашэнкі да каранавірусу гуманная і асэнсаваная, — прафэсар Ёфэ

ГЛЯДЗІЦЕ ТАКСАМА:
Ці моцна рызыкуе Лукашэнка, адмаўляючы праблему каранавірусу

Што трэба ведаць пра новы каранавірус, які выклікае COVID-19

Невядомы раней вірус выявілі ў кітайскім горадзе Ўхань у сьнежні 2019 году.
Афіцыйнай назвай хваробы ад новага каранавірусу з Кітаю стала COVID-19 (coronavirus disease).
Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.