Афіцыйнага карантыну ў Беларусі не ўвялі, але незалежныя і дзяржаўныя культурныя пляцоўкі пераходзяць онлайн-фармат, каб стварыць бясьпечныя ўмовы для сваіх наведнікаў.
Што прапануюць паглядзець, паслухаць і пачытаць на бліжэйшым тыдні.
«Бясьпечны LIVE» ад «Арт Сядзібы»
Для аматараў жывых канцэртаў «Арт Сядзіба» стварыла «Бясьпечны LIVE», дзе беларускія гурты выконваюць свае акустычныя праграмы. І гэта ня проста онлайн-выступы, а ўзаемадзеяньне з гледачамі.
«Гэта такі цікавы фармат, калі людзі, знаходзячыся дома, слухаюць сапраўдны жывы канцэрт і могуць задаваць пытаньні музыкам, а музыкі адказваюць, — расказвае дырэктар „Арт Сядзібы“ Алесь Сьнег. — Гэта добры фармат, які цяпер паўсюль выкарыстоўваюць, але мы стараемся зрабіць клясную студыю, добрае сьвятло, клясную праграму ад музыкаў, каб яна была ўнікальная, цікавая і адкрытая».
Мінулыя канцэрты і расклад найбліжэйшых выступаў можна паглядзець на адмысловым канале і ў сацыяльных сетках «Арт Сядзібы».
«Mова-чэлендж» у «Інстаграме»
Неўзабаве стартуе другі сэзон «Mова-чэленджу» ад «Арт Сядзібы» — першага інстаграм-шоу па-беларуску, героям якога давядзецца перайсьці на беларускую мову за месяц.
Першы сэзон сабраў 31 героя з розных гарадоў Беларусі і замежжа. Удзельнікі шоў два разы на тыдзень атрымліваюць заданьні па беларускай мове. Шоў будзе трансьлявацца ў фармаце сторыз у інстаграме @artsiadziba, а таксама ў інстаграмах герояў.
Удзельнікаў выбіраюць праз онлайн-кастынг. Заяўку на ўдзел можна падаць да 10 красавіка. Далучыцца ў сваіх сторыз да выкананьня заданьняў можа кожны.
#БудуДома ад той жа «Арт Сядзібы»
Таксама «Арт Сядзіба» запускае рубрыку #БудуДома. Кожны тыдзень — новыя тэмы.
З 6 па 12 красавіка ў instagram @artsiadziba пройдзе першы паэтычны тыдзень.
Кожны дзень прысьвечаны асобнаму паэту.
На сваіх старонках паэты будуць чытаць вершы і гутарыць з публікай.
Love Over Virus ад Беларускага Свабоднага тэатру
З 18 сакавіка «Свабодны тэатар» пайшоў на карантын і жыве онлайн.
«Першае, што мы зрабілі, разумеючы, наколькі цяжка цяпер бацькам з маленькімі дзецьмі, жык гэта запусьцілі праект «Казка на ноч», — апавядае мастацкі кіраўнік тэатру Мікалай Халезін. — Кожны вечар на нашым канале ў YouTube выходзіць новая казка, якую для дзяцей чытаюць нашы акторы і выкладчыкі. Выбар казак самы шырокі, гэтак жа, як і моў. Асноўныя мовы — беларуская і расейская, але раз на 10 дзён гучыць казка па-ангельску ў 20.00 паводле менскага часу. Чытаюць іх вядомыя брытанцы, акторы і пісьменьнікі: Сэм Уэст, Стывен Фрай, Джульет Стывенсан, Уіл Атэнбора. Праект казак мы пакуль разьлічылі на тры месяцы наперад, але ў любы момант можам прыняць рашэньне аб яго падаўжэньні.
Sport over Virus са Станіславай Шаблінскай
Гэта трэнінгі, якія праводзіць акторка Свабоднага тэатра Станіслава Шаблінская па серадах і пятніцах.
«Грэх было б не выкарыстоўваць яе ўменьні, бо Стася — чэмпіёнка сьвету па каратэ сярод юніёраў і даўно практыкуе групавыя заняткі як з нашымі акторамі, так і зь іншымі групамі».
24 онлайн-спэктаклі ад Свабоднага тэатра
У гонар свайго 15-годьдзя «Свабодны тэатар» запусьціў цыкль трансьляцый запісаў спэктакляў за ўсе гады свайго існаваньня. 24 спэктаклі за тры месяцы — па 2 на кожных выходных. Іх можна паглядзець на канале тэатру, а таксама ў сацыяльных сетках. Трансьляцыі спэктакляў не застаюцца ў адкрытым доступе, паглядзець іх можна толькі на працягу сутак пасьля паказу.
«Наперадзе яшчэ некалькі праектаў, якія мы цяпер распрацоўваем. Адзін зь іх — онлайн-спэктакль, які граюць у жывым эфіры, і акторы знаходзяцца не на адной сцэне, а ў розных месцах. Гэта зусім новая форма, і мы зможам паказаць гэты спэктакль неўзабаве, калі скончыцца рэпэтыцыйны пэрыяд. Яшчэ адзін праект зьвязаны з кулінарыяй, і ён таксама адрозьніваецца зусім новым падыходам да кулінарных шоў».
«Усе гэтыя праекты мы аб’ядналі адной кампаніяй — Love Over Virus! На наш погляд, толькі любоў адзін да аднаго можа правесьці нас праз гэты складаны час зь мінімальнымі стратамі».
Юбілейны канцэрт РСП Гурт
«Разьбітае сэрца пацана» 10 красавіка адзначыць свой 15-ы дзень народзінаў. У гонар падзеі павінен быў адбыцца канцэрт у клюбе «Бруге», але яго перанесьлі на 26 верасьня. А сьвяткаваць усё адно будуць, толькі ўжо ў онлайн-рэжыме. Трансьляцыю правядзе VOKA TV.
Онлайн-фэстываль дакумэнтальнага кіно ад BelarusDocs
7 красавіка стартуе трэці онлайн-фэстываль беларускага дакумэнтальнага кіно BelarusDocs. За фэстывальны тыдзень можна будзе ўбачыць сем фільмаў сямі беларускіх аўтараў. Кожны фільм будзе даступны для онлайн-прагляду на працягу сутак (ад 00.00 да 23.59 паводле менскага часу) на сайце. Усе фільмы будуць з ангельскімі субтытрамі.
- 7 красавіка — «Трэнэр» (рэж. Вольга Абрамчык)
- 8 красавіка — «Дэбют» (рэж. Настасься Мірашнічэнка)
- 9 красавіка — «Лебедзі» (рэж. Галіна Адамовіч)
- 10 красавіка — «Перазімаваць» (рэж. Ева-Кацярына Махава)
- 11 красавіка — «Цар гары» (рэж. Андрэй Куціла)
- 12 красавіка — «Фальклёр і жыцьцё» (рэж. Юры Цімафееў)
- 13 красавіка — «Полацкі вальс» (рэж. Вольга Дашук)
Сёлета онлайн-фэстываль ўпершыню абвяшчае нефармальную ўзнагароду найлепшаму фільму — прыз глядацкіх сымпатый. Чальцом журы можа стаць кожны: дастаткова запоўніць анкету, паглядзець усе фільмы праграмы і ацаніць іх.
Магілёўскі тэатар пакажа Стрындбэрга і Талстога
Як вядома, дзяржаўныя пляцоўкі не ідуць на карантын, але спрабуюць адаптавацца пад новыя ўмовы і пераходзяць у онлайн.
Цікавая сытуацыя ў Магілёўскім драматычным тэатры, які перавялі на «рэпэтыцыйны рэжым працы».
«У нас сытуацыя такая: у нас адмянілі спэктаклі з 1 па 21 красавіка, ну а там будуць тэрміны разглядаць у залежнасьці ад эпідэміялягічнай сытуацыі. Карантыну ў нас няма, як ва ўсёй краіне. Прапанавана ўсім ахвотным пайсьці ў адпачынак з захаваньнем часткі заробку — гэта дзьве траціны акладу. Хто хоча, той сыходзіць», — тлумачыць загадчыца літаратурна-драматургічнай часткі тэатру Вольга Семчанка.
Працуе ня ўвесь штат тэатру, а толькі некаторыя службы, падразьдзяленьні, адміністратары, вытворчыя цэхі, якія вырабляюць дэкарацыі, рэквізыт. Таксама працягваюцца рэпэтыцыі ў актораў.
«Мы рыхтуем некалькі прэм’ер, паралельна ідуць рэпэтыцыі некалькіх спэктакляў. Калі ўсё складзецца добра, мы думаем іх паказаць ужо ў траўні, ну і там яшчэ пазьнейшыя прэм’еры ў нас заплянаваныя. Але мы будзем бачыць, зразумела, па сытуацыі. Калі сытуацыя ўскладніцца, то, можа, нешта давядзецца пераносіць. А так мы працягваем як бы ў напаўзамарожаным стане існаваць, не да канца мы закрыліся».
Нягледзячы на карантынныя захады, спэктаклі драмтэатру прапануюць паглядзець онлайн ужо на наступных выходных. Трансьляцыі будуць ісьці на тэлеканале «Беларусь 4. Магілёў», а таксама на сайце і групах тэлеканалу ў сацыяльных сетках, прыкладна а 19 гадзіне.
- 11 красавіка — «Крэйцарава саната» паводле Льва Талстога. 12 красавіка — «Фрэкен Жюлі» паводле Аўгуста Стрындбэрга.
Як адзначаюць у тэатры, самай вялікай стратай ад пандэміі стаў адменены форум «М@рт.Контакт»; Магілёўскі драмтэатар паказаў толькі адзін спэктакль з усёй вялікай праграмы.
Онлайн-праект «Купалаўскі дома»
Купалаўскі тэатар запусьціў новы праект «Купалаўскі дома», падчас якога пакажуць спэктаклі з архіва тэатру, творчыя вечары артыстаў, сустрэчы, сьвяточныя імпрэзы і іншыя відэазапісы. Усё можна паглядзець на сайце, а таксама ў сацыяльных сетках тэатру з 18.00 у дзень паказу да 18.00 наступнага дня.
У найбліжэйшыя дні можна ўбачыць: 7 красавіка — творчы вечар заслужанай артысткі Тамары Міронавай; 8 красавіка — спэктакль «Офіс» паводле Інгрыд Лаўзунд (рэж. Кацярына Аверкава); 10 красавіка — спэктакль «Хам» паводле Элізы Ажэшкі (рэж. Аляксандар Гарцуеў).
«Беларусьфільм» штодзень паказвае беларускае кіно
«Беларусьфільм» з 1 красавіка запусьціў акцыю — на працягу трох тыдняў кожны дзень у сацыяльных сетках («ВКонтакте», «Фэйсбук», «Аднаклясьнікі», «Тэлеграм») і на афіцыйным ютуб-канале публікуюць фільмы вытворчасьці кінастудыі. Да кожнага фільма адкрыта абмеркаваньне, дзе можна пакінуць камэнтар і падзяліцца ўражаньнямі.
Як падтрымаць тых, хто робіць цікавай вашую добраахвотную самаізаляцыю
Падтрымаць незалежныя пляцоўкі ў такі складны час можна на краўндфандынгавай пляцоўцы MolaMola пад хэштэгам #АртПроездной у межах глябальнай кампаніі #culturecommute, дзе прапануюць ахвяраваць суму, якая звычайна траціцца на праезд у грамадзкім транспарце.
