Пандэмія каранавіруснай інфэкцыі перапыніла кругасьветнае падарожжа на матацыкле беларускі, 34-гадовай Кацярыны Дубаневіч. Яна выправілася ў дарогу з жніўні 2018 году, праехала на матацыкле Эўразію, Аўстралію, Паўночную Амэрыку, частку Паўднёвай Амэрыкі, наперадзе была Афрыка і вяраньне ў Менск сёлета ў траўні. Цяпер Кацярына знаходзіцца ў маленькім гарадку ў Аргентыне непадалёк ад мяжы з Бразыліяй і Парагваем, чакае адкрыцьця межаў і карэктуе свой маршрут.
«Адправіць матацыкл прасьцей, паколькі ён, хоць і блізкі сябар для мяне, але ніяк не пераносчык вірусу»
Яшчэ месяц назад ніхто не ўяўляў, наколькі сур’ёзнай катастрофай можа стаць гэты вірус, кажа Кацярына:
— У свой час мы перажылі сьвіны і птушыны грып, Эболу, і неяк гэта ўсё было было далёка, незаўважна і ў іншым сьвеце. Але пандэмія каранавірусу ўнесла сурʼёзныя карэктывы ў жыцьці людзей на ўсёй плянэце. Для падарожнікаў, і мяне ў тым ліку, гэта выявілася ў закрыцьці межаў і неабходнасьці хуткага прыняцьця рашэньняў аб скасаваньні далейшых перасоўваньняў альбо іх радыкальнай зьмене.
Першапачатковы плян кругасьветнай падарожніцы быў наступны — выправіцца ў Гішпанію, адтуль у Афрыку, дзе вывучыць частку кантынэнту, пасьля чаго пасьпяхова вярнуцца ў Менск пры канцы траўня. Але на сёньняшні дзень гэта немагчыма, канстатуе Кацярына Дубаневіч:
— Я знаходжуся ў маленькім гарадку на мяжы з Бразыліяй і Парагваем. Тут практычна нікога няма, ціха, спакойна. Няма перабояў з прадуктамі, можна рыбачыць і гуляць па беразе ракі. Усё мясцовае транспартнае злучэньне замарожанае, аэрапорт закрыты і няма ніякіх шляхоў, каб вярнуцца назад у Буэнас-Айрэс. Для адпраўкі матацыкла праблем значна менш, паколькі ён, хоць і блізкі сябар для мяне, але ніяк не пераносчык вірусу, таму грузавыя перавозкі больш даступныя. Але рухацца далей мы будзем толькі разам.
Каранавірус у Беларусі і ў сьвеце. Як разьвіваюцца падзеі >>
«Я перажыла ўкусы павука і дзьве ліхаманкі. Думаю, што мой арганізм зможа справіцца з каранавірусам, але хварэць ня хочацца»
Падарожніца каля месяца знаходзіцца ў Аргентыне. Паводле Кацярыны, улады гэтай краіны дзейнічаюць хутка і жорстка — скасаваныя ўсе авіярэйсы, закрытыя ўсе межы, усе нацыянальныя паркі, скасаваныя масавыя мерапрыемствы:
— На дарогах паліцэйскія патрулі, якія літаральна займаюцца паляваньнем на турыстаў і адпраўляюць іх на карантын. Гатэлі і ўладальнікі нерухомасьці не прымаюць замежнікаў, а некаторыя проста выганяюць пастаяльцаў на вуліцу. У гарадах ужо забаронена выходзіць з дому, гэта можна зрабіць толькі для таго, каб зрабіць пакупкі ў супэрмаркетах і аптэках. Жорсткае выкананьне гэтых правілаў моцна адрозьніваецца ў залежнасьці ад рэгіёну. Падчас гэтага падарожжа я перажывала ўкусы павука ў Аўстраліі, дзьве ліхаманкі ў Паўднёвай Амэрыцы. Думаю, што мой арганізм зможа справіцца з каранавірусам, але хварэць, канечне, ня хочацца.
Таму Кацярына Дубаневіч выконвае правілы гігіены і знаходзіцца ў мінімальным кантакце зь людзьмі. Калі сытуацыя крыху стабілізуецца, яна плянуе адправіць сябе і мой матацыкл Генры ў Турэччыну, адтуль паедзе праз Грузію і Расею дадому. «Тэрміны непрадказальныя, але намеры па-ранейшаму цьвёрдыя», кажа падарожніца.
Такім меўся быць маршрут кругасьветнага падарожжы Кацярыны
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
