Тацьцяна Яфрэмава зь Віцебску была першай грамадзянкай Беларусі, у якой знайшлі новую інфэкцыю.
Дызайнэрка зь Віцебску Тацьцяна Яфрэмава даведалася пра хваробу неўзабаве пасьля вяртаньня з Італіі, дзе была ў камандзіроўцы. Дыягназ ёй паставілі 2 сакавіка. Хвароба працягвалася роўна два тыдні. Тацьцяна расказала Свабодзе, што 15 сакавіка яе ўжо прызналі здаровай.
«Тэсты маіх аналізаў ужо адмоўныя, сёньня мне паведамілі, што каранавірусу ў мяне ўжо няма, — сказала Свабодзе Тацьцяна. — Што будзе са мной далей, як доўга прабуду ў шпіталі, пакуль ня ведаю. Думаю, мне скажуць пра гэта неўзабаве. Пра хваробу шмат расказаць не магу. Падазраю, што ў мяне быў аблегчаны варыянт. Кашаль, закладзены нос, запаленьне вачэй. Цяпер нармальна пачуваюся».
Жанчына параўноўвае каранавірус са звычайнай прастудай. Аднак адзначае, што, нягледзячы на гэта, добра разумее мэдыкаў, якія папярэджваюць пра небясьпеку інфэкцыі.
«Я магу гаварыць толькі пра сытуацыю, якая была са мной, — дадае Тацьцяна. — У мяне быў адзін зь першых выпадкаў, і мяне тут даглядалі. Мяркую, панікаваць нельга ні ў якім выпадку. Але неабходна берагчы сябе, сачыць за сваім здароўем і здароўем сваіх блізкіх. Пра гэта гаворыць і прыклад краін, якія цяпер закрываюцца на карантын».
Пасьля выяўленьня каранавірусу ў Тацьцяны лекары абсьледавалі таксама яе родных. Ні ў кога зь іх захворваньне не пацьвердзілася, аднак ім давялося адбыць карантын.
«Пасьля ўсяго гэтага ты разумееш, што пад пагрозай такога невядомага вірусу можа знаходзіцца твая сямʼя, вялікая колькасьць людзей з твайго атачэньня, — гаворыць жанчына. — Вядома, гэта накладае свой адбітак. Дзякуй Богу, мая сямʼя ўжо дома, вынікі іх аналізаў на каранавірус былі адмоўныя. Я буду прымаць захады, рабіць ўсё, што магчыма, каб хвароба нас не закранула. У навучальных установах, дзе вучацца дзеці, яшчэ карантын. Пакуль я не ведаю на 100%, што будзе далей. Але ўсе санітарныя патрабаваньні мы будзем выконваць. Легкадумнасьць тут не да месца, усе павінны парупіцца за сябе».
На раніцу 16 сакавіка ў Беларусі ўжо 36 афіцыйных выпадкаў захворваньня на каранавірус. Раніцай Міністэрства адукацыі паведаміла пра намер абмежаваць доступ у школы і ВНУ для вучняў і студэнтаў. Гаворкі пра ўвядзеньне поўнага карантыну пакуль няма, аднак межы Беларусі ўжо фактычна перакрытыя, свабоднае перамяшчэньне празь іх немагчымае.
«Я магу меркаваць з таго, што ўсе краіны, нават дзе выяўленыя ўсяго некалькі выпадкаў каранавірусу, ідуць на ўвядзеньне карантыну, — дадае Тацьцяна. — Такія захады дазваляюць скараціць масавую колькасьць заражэньньняў і неяк спыніць пашырэньне эпідэміі. Таму я ня супраць такіх мераў».
Што трэба ведаць пра новы каранавірус COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
