Актывіст «Эўрапейскай Беларусі» Алесь Круткін 26 лютага меў выйсьці на волю пасьля 30-дзённага арышту за менскую акцыю пратэсту супраць паглыбленьня інтэграцыі 20 сьнежня, а таксама за расклейваньне ўлётак у Віцебску.
Але выявілася, што яму прысудзілі яшчэ 15 содняў арышту. Акрамя таго, раней Круткіну прысудзілі 1350 рублёў штрафу за ўлёткі «Калгаснай дыктатуры — баста».
Такое пакараньне — 45 сутак — раней прысудзілі лідэрам менскіх пратэстаў Вячаславу Сіўчыку і Паўлу Севярынцу, а большае — 120 сутак — толькі блогеру з Барані Зьмітру Казлову, вядомаму як «Шэры кот».
Сябра Круткіна, прадстаўнік «Эўрапейскай Беларусі» Андрэй Войніч кажа Свабодзе, што спачатку праваахоўнікі толькі «расплывіста» казалі, што Круткін недзе ў Леплі, і пра новы суд не паведамілі нават ягоным бацькам. Толькі пасьля таго як «Эўрпейская Беларусь» паведаміла публічна, што зьвесткі пра Круткіна ўтойваюць, кажа Войніч, патэлефанавалі ягонай маці і сказалі, што ён у Леплі чакае новага суду, аднак іншай інфармацыі не далі і прапанавалі зьвязацца з адвакатам.
У Лепельскім раённым судзе Свабодзе пацьвердзілі, што 26 лютага Алеся Круткіна асудзілі на 15 содняў арышту. Пры гэтым у судзе адмовіліся камэнтаваць, паводле якога артыкулу: «Вы ня ўдзельнікі працэсу, таму ня можам даць такія зьвесткі», — сказала сакратар суду.
«Нас вельмі турбуе, што ён абвяшчаў [на судзе 12 лютага] 15-дзённую галадоўку, — кажа Войніч. — Калі да 30 сутак дадаваць 15, гэта ні ў якія юрыдычныя межы ня лезе. Плюс калі ён трымаў галадоўку, ягоны стан здароўя можа быць вельмі моцна парушаны. Мая думка — чалавека проста паддаюць нейкім катаваньням».
Андрэй Войніч пазьней пераказаў словы маці Круткіна, што сын «адчувае сябе нармальна, асабліва яго ня крыўдзяць».
Але ёй не ўдалося даведацца, за што менавіта асудзілі сына і дзе ён адбывае пакараньне.
На апошнім працэсе Круткіну прапаноўвалі дзяржаўнага адваката, але ён адмовіўся, а ягонага ўласнага адваката ня сталі чакаць на суд. Вядома, што Круткін не даваў паказаньняў.
«Круткін яскрава і адкрыта выступае супраць дыктатуры» Чаму Круткіну прысудзілі столькі ж, колькі лідэрам менскіх пратэстаў? Войніч мае просты адказ:
«Мы жывём у краіне, дзе пануе дыктатура, а Алесь Круткін яскрава і адкрыта выступае супраць гэтага. Дыктатуры гэта не падабаецца, дыктатура спрабуе яго за гэта прыціскаць, караць, пужаць».
Актывістка Натальля Сьпірыдонава, якую затрымлівалі разам з Круткіным з улёткамі і аштрафавалі на 2160 рублёў, кажа Свабодзе, што яе вызвалілі пад падпіску таму, што яна даглядае маці з інваліднасьцю. Што цяпер з Круткіным, яна ведае толькі з інтэрнэту.
«Паглыбленьне інтэграцыі» Беларусі і Расеі. Што важна ведаць
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»
