Амаль 875 тысяч сырыйцаў, у асноўным жанчыны і дзеці, пакінулі свае дамы на кантраляваным паўстанцамі паўночным захадзе краіны пасьля наступу сырыйскіх урадавых войскаў пры падтрымцы Расеі, паведамляе агенцтва Reuters са спасылкай на Арганізацыю аб’яднаных нацый. Толькі за апошнія чатыры дні каля 40 тысяч чалавек пакінулі свае дамы.
Прэсавы сакратар Офісу ААН па каардынацыі гуманітарных пытаньняў Дэйвід Суонсан паведаміў, што сярод перамешчаных асобаў каля паўмільёна дзяцей.
Тым часам сырыйскі ўрад абвясьціў, што ўзяў пад кантроль дзясяткі гарадоў у правінцыі Алепа на паўночным захадзе Сырыі і будзе працягваць кампанію вынішчэньня ваяўнікоў «дзе б яны ні знаходзіліся».
