Падзеі 11 лістапада ў беларускай і сусьветнай гісторыі.
Дата дня
11 лістапада 1928 году на Гарадзеншчыне нарадзіўся Алесь Белакоз, беларускі настаўнік, краязнаўца, музэязнаўца. Белакоз амаль усё жыцьцё пражыў у вёсцы Гудзевічы Мастоўскага раёну, працуючы настаўнікам беларускай мовы і літаратуры. Стварыў унікальны Гудзевіцкі дзяржаўны літаратурна-гістарычны музэй, які ўзначальваў болей за 30 гадоў.
Заслужаны настаўнік Беларусі, заслужаны дзяяч культуры, адным зь першых быў ушанаваны мэдалём імя Францішка Скарыны. Ляўрэат прэміі «За свабоду думкі».
Таксама ў гэты дзень
1918 – скончылася Першая сусьветная вайна.
1923 – прэзыдыюм Рады БНР пераехаў з Коўна ў Прагу.
1999 — з Аршанскай калёніі выйшаў на свабоду двойчы герой сацыялістычнай працы Васіль Старавойтаў.
2004 — Літва першай з краінаў Эўразьвязу ратыфікавала ўстаўную дамову ЭЗ.
У гэты дзень нарадзіліся
1821 — Фёдар Дастаеўскі, расейскі пісьменьнік, продкі якога паходзяць зь Беларусі.
1903 — Аляксандар Ільінскі, беларускі актор, народны артыст Беларусі.
1909 — беларускі архітэктар Георгій Заборскі, аўтар сярод іншага будынкаў Музэя Якуба Коласа і зруйнаванага нядаўна Музэю Вялікай айчыннай вайны.
1929 — Леанід Сушчэня, беларускі вучоны заоляг і біёляг.
У памяці
1975 — Пётар Савачкін, беларускі гісторык.
2004 — Ясір Арафат, кіраўнік Палестынскай аўтаноміі.
