Пра намер павялічыць колькасьць авіярэйсаў паміж дзьвюма краінамі і адкрыць новыя маршруты заявіў міністар замежных спраў Турэччыны Мэвалют Чавушаглу падчас сустрэчы 28 жніўня ў Менску са сваім беларускім калегам Уладзімерам Макеем.
«Колькасьць турыстаў, якія лётаюць зь Беларусі ў Турэччыну і наадварот, павялічваецца. Нам патрэбна дадаць новыя рэйсы і дывэрсыфікаваць маршруты», — сказаў кіраўнік зьнешнепалітычнага ведамства Турэччыны.
Беларускі амбасадар у Турэччыне Андрэй Савіных сказаў Свабодзе, што раней цягам тыдня самалёты ляталі ў Турэччыну і Беларусь пяць разоў. Цяпер робіцца па сем вылетаў на тыдзень.
«Дзьве дзяржаўныя кампаніі — „Турэцкія авіалініі“ і „Белавія“ — хочуць дадаць яшчэ некалькі рэйсаў. Будзе і наўпроставы рэйс зь Менску на Анкару. Пакуль у сталіцу Турэччыны з сталіцы Беларусі можна трапіць толькі зь перасадкай», — падкрэсьліў дыплямат.
Турэччына — на другім месцы па папулярнасьці ў беларусаў
Паводле Нацыянальнага статыстычнага камітэту, летась самай прывабнай краінай для беларускіх турыстаў стаў Эгіпет. На другім месцы — Турэччына. На трэцім — Украіна.
