Амбасадарка Вялікай Брытаніі Фіёна Гіб 8 жніўня сустрэлася са старшынём Палаты прадстаўнікоў Уладзімерам Андрэйчанкам з нагоды завяршэньня сваёй працы ў Беларусі.
Беларускі сьпікер сказаў, што ён разьвітваецца з амбасадаркай «са шкадаваньнем і сумам». Андрэйчанка прыгадаў, што менавіта пры спадарыні Гіб дэлегацыя парлямэнту Вялікай Брытаніі ўпершыню наведала Менск, упершыню былі падпісаныя два мэмарандумы аб супрацы, на летняй сэсіі 2019 году Парлямэнцкай асамблеі АБСЭ ў Люксэмбургу брытанскія дэпутаты падтрымалі беларускую рэзалюцыю.
«Вы моцна дапамаглі нашаму Андрэю Мікалаевічу, які цяпер сядзіць з намі за адным сталом», — дадаў Андрэйчанка.
Андрэй Навумовіч — гэта дэпутат Палаты прадстаўнікоў, які ў Нацыянальным сходзе ачольвае групу, што займаецца вывучэньнем праблемаў сьмяротнага пакараньня ў Беларусі. Амбасадарка Гіб асабіста была куратаркай праекту распаўсюду ведаў пра адмену сьмяротнага пакараньня ў розных краінах сьвету. Зь яе ініцыятывы Навумовіч лятаў у Лёндан, дзе вывучаў брытанскі досьвед.
Фіёна Гіб асабіста шукала вядомых у сьвеце экспэртаў, якія прыяжджалі ў Беларусь, каб абмеркаваць розныя аспэкты гэтай праблемы. Амбасадарка Гіб шукала сродкі ва няўрадавых арганізацыях для арганізацыі сэмінараў і школаў навучаньня. Яна асабіста ўдзельнічала ў такіх сэмінарах, якія прайшлі ў Менску і ва ўсіх абласных цэнтрах.
Сьмяротнае пакараньне ў Беларусі
- Беларусь застаецца апошняй краінай Эўропы, дзе караюць сьмерцю.
- Усяго за гады незалежнасьці ў Беларусі вынесьлі каля 350 сьмяротных прысудаў (дакладная лічба невядомая).
- Улады Беларусі не паведамляюць пра выкананьне сьмяротных прысудаў. Пра гэта ўдаецца даведацца з паказаньняў іншых сьмяротнікаў або ад праваабаронцаў, якія кантактуюць з роднымі асуджаных.
- Эўразьвяз пэрыядычна заклікае Беларусь адмовіцца ад сьмяротнага пакараньня.
- Нягледзячы на ўсе просьбы міжнароднай супольнасьці, рэжым Лукашэнкі працягвае выносіць сьмяротныя прысуды. 19 кастрычніка 2023 вынесены чарговы зь іх — Аляксандру Таратуту са Слуцку, які забіў 3-гадовае дзіця.
- Дакладная колькасьць памілаваных таксама не вядомая. Раней беларускім праваабаронцам было вядома толькі пра два выпадкі памілаваньня асуджаных на сьмяротнае пакараньне за ўсю гісторыю незалежнай Беларусі. У канцы ліпеня 2024 году Лукашэнка памілаваў асуджанага на сьмяротнае пакараньне грамадзяніна Нямеччыны Рыка Крыгера, пасьля гэтага яго вызвалілі ў рамках вялікага абмену вязьнямі паміж Расеяй і краінамі Захаду.
- Лукашэнка ў 2012 годзе казаў, што за ўсю гісторыю свайго прэзыдэнцтва памілаваў толькі аднаго чалавека (пасьля гэтага, у 2021 годзе, ён памілаваў асуджаных да сьмяротнага пакараньня братоў Косьцевых). Разам з тым МУС Беларусі яшчэ ў 2012-м сьцьвярджала, што за 13 гадоў было памілавана 156 сьмяротнікаў (замена сьмяротнага прысуду на пажыцьцёвае зьняволеньне).
