Шакаляд утрымлівае ў сабе больш здаровую сумесь тлушчаў у параўнаньні зь мясам, але ці азначае гэта, што шакаляд можна есьці з мэтай палепшыць здароўе? Адказ на гэтае пытаньне ў газэце The New York Times дае Роні Кэрын Рабін.
Аматары чорнага шакаляду часта пытаюцца, ці насычаныя тлушчы ў шакалядзе нагэтулькі ж шкодныя, як тлушчы зь мяса?
Доктарка Аліса Ліхтэнштайн, зь якой пагутарыла Роні Кэрын Рабін, кажа, што насычаныя тлушчы з шакаляду не такія шкодныя, як тлушчы зь мяса.
Асноўны тлушч шакаляду складаецца з масла какава, якое, у сваю чаргу, складаецца ў роўных частках з алеінавай кіслаты (карысны для сэрца монаненасычаны тлушч, які прысутнічае і аліўкавым алеі), а таксама стэарынавай і пальмітынавай кіслот.
Апошнія дзьве — гэта формы насычаных тлушчаў, якія зьвязваюць з хваробамі сэрца. Але стэарынавая кіслата не павышае ўзровень халестэрыну ў крыві, а пальмітынавая кіслата складае толькі траціну ўсіх тлушчаў у шакалядзе. Напрыклад, у ялавічыне пальмітынавага тлушчу значна больш.
Разам з тым, какава-бабы багатыя на фляваноіды — гэта пажыўныя рэчывы, якія ўтрымліваюцца ў многіх гатунках садавіны і гародніны. Фляваноіды абараняюць расьліны ад таксынаў і, як антыаксыданты, аднаўляюць выкліканыя свабоднымі радыкаламі пашкоджаньні ў клетках.
Фляваноіды, якія ўтрымліваюцца ў какава-бабах і шакалядзе, называюцца флаваноламі. Яны здольныя зьмяншаць крывяны ціск, паляпшаюць кровазварот у мозгу і сэрцы, а таксама зьніжаюць верагоднасьць утварэньня трамбацытаў.
Падчас аднаго нядаўняга дасьледаваньня, спонсарам якога была кампанія Mars, высьветлілася, што пажылыя людзі, якія на працягу трох месяцаў пілі багаты на флаванолы какавы напой, паказалі лепшыя вынікі ў тэстах на памяць.
Але ня варта есьці шакаляд з мэтай палепшыць здароўе, бо гэта, усё ж, вельмі калярыйны прадукт. Трэба памятаць пра памяркоўнасьць ва ўсім. Порцыя ад 50 да 100 грамаў шакаляду ў дзень будзе для большасьці з нас цалкам бясшкоднай.
