Генэральны пракурор Беларусі Аляксандар Канюк 4 чэрвеня расказаў журналістам аб працы камісіі Генпракуратуры пасьля скаргаў на дзеяньні супрацоўнікаў міліцыі ў Магілёве. Як перадае Tut.by, Канюк паабяцаў, што «мы ўсё разгледзім».
«Што самае цікавае, няма ніводнай скаргі з цыганскага асяродзьдзя, — сьцьвярджаў Аляксандар Канюк. — Я быў тыдзень таму ў Магілёве. Удакладняў, як працуе група».
Ён прызнаўся, што не сустракаўся з цыганамі, а толькі з працоўнай групай пракурораў — маўляў, «мы ня сталі бударажыць людзей». Пракурорская праверка мае працягнуцца прыблізна месяц.
16 траўня ў Магілёве ў межах расьсьледаваньня крымінальнай справы па факце меркаванага забойства супрацоўніка ДАІ Яўгена Патаповіча міліцыянты масава затрымлівалі грамадзянаў цыганскай нацыянальнасьці. Людзі скардзіліся журналістам на зьбіцьцё і жорсткае абыходжаньне.
Толькі ў Магілёве ў месцах кампактнага пражываньня цыганоў затрымалі каля 100 чалавек: жанчын, непаўналетніх дзяцей і мужчын. Частку зь іх пазьней вызвалілі, а каля 50 мужчын затрымалі на трое сутак. Адносна іх пазаводзілі адміністрацыйныя справы за нібыта дробнае хуліганства. Затрыманьні адбываліся таксама ў Гомлі і па ўсёй краіне.
Міністар унутраных спраў Ігар Шуневіч заявіў, што ў яго «няма ні прычыны, ні падстаў прасіць прабачэньня ў цыганоў», але пазьней перад імі выбачылася кіраўніца адміністрацыі Лукашэнкі Натальля Качанава.
