Будынак Нацбанку на праспэкце Незалежнасьці, 20 у Менску ачапілі, на месцы працуе АМАП, выехалі машыны МНС. Пра гэта Tut.by паведамілі чытачы.
«На электронную пошту нам паступіла паведамленьне аб мінаваньні будынка, цяпер праводзіцца праверка», — пацьвердзілі Tut.by ў прэс-службе Нацбанку.
Эвакуацыю работнікаў не праводзілі, усе знаходзіліся на сваіх месцах.
У МНС патлумачылі, што ратавальнікі выехалі паводле інструкцыі аб узаемадзеяньні зь міліцыяй.
Сьледчы камітэт завёў крымінальную справу. Паводле ч. 1 арт. 340 за ілжывае паведамленьне аб небясьпецы пагражае да 5 гадоў турмы.
Гэта ня першае паведамленьне аб мінаваньні будынкаў у Менску за апошнія месяцы.
Пад ноч 29 красавіка невядомы паведаміў пра бомбы ў Нацыянальным аэрапорце «Менск», сталічным чыгуначным вакзале і менскім гатэлі Hilton.
6 красавіка «мінавалі» менскі гандлёвы цэнтар «Галерэя». Падчас праверкі выбуховых прыладаў ня выявілі, Сьледчы камітэт распачаў справу па факце фальшывага паведамленьня.
31 сакавіка з прычыны паведамленьняў аб мінаваньні эвакуявалі пасажыраў менскага чыгуначнага вакзала, а таксама наведнікаў гандлёвых цэнтраў «Галілеа» і «Замак». Паведамленьні пра мінаваньні не пацьвердзіліся. Праверка заняла некалькі гадзін. Сьледчы камітэт пачаў крымінальную справу па факце заведама фальшывага паведамленьня аб небясьпецы (ч. 1 арт. 340 КК), ілжэмінэру пагражае да 5 гадоў пазбаўленьня волі.
З пачатку году гэта ўжо 19-я крымінальная справа за «фальшывае паведамленьне пра небясьпеку». Гэта надзвычай шмат: за цэлы мінулы год такіх паведамленьняў было толькі 23. З 19 сёлетніх «фальшывых мінэраў» ужо выяўленыя 12.
