Суд Цэнтральнага раёну Гомля пачаў разгляд крымінальнай справы ў дачыненьні да былога начальніка крымінальнай міліцыі Чачэрскага РАУС. Яму інкрымінуецца дзевяць эпізодаў. Сярод злачынстваў — махлярства, падбухторваньне да хабару, падробка дакумэнтаў.
Разам з былым міліцыянтам пад крымінальны перасьлед падпалі яго сястра, грамадзянская жонка і два паляводы зь вёскі Роўкавічы. Сваякі маёра міліцыі працавалі ў райвыканкаме і бальніцы. Паводле абвінавачаньня, яны дапамагалі міліцыянту ў розных махінацыях — дакумэнтальна ўзаконьвалі яго злачынствы.
Паляводы па сутнасьці былі «падстаўнымі асобамі».
36-гадовы Дзьмітры Яўстраценка з 2004 году служыць у міліцыі. З 2011 году ён быў старэйшым упаўнаважаным групы наркакантролю РАУС. Паводле абвінавачаньня, на пасадзе старэйшага опэра наркакантролю Дзьмітры Яўстраценка ад 2014 да 2017 году ўчыніў шэраг злачынстваў.
Пазьбегнуць крымінальнай адказнасьці за наркотыкі — ад 300 да 2400 даляраў
Травень-чэрвень 2014 году. У Чачэрскую раённую лякарню трапіў мясцовы жыхар з прыкметамі наркатычнага атручэньня. Лякарня перадае ў міліцыю зьвесткі пра такі выпадак. Старэйшы апэратыўны упаўнаважаны Яўстраценка праводзіць праверку. Ён прапануе грамадзяніну «вырашыць пытаньне» за 300 даляраў. Столькі каштуе пазьбегнуць крымінальнай адказнасьці і падмяніць вынікі мэдыцынскіх дасьледаваньняў аб знаходжаньні ў крыві наркатычных рэчываў.
Месьціч перадаў Яўстраценку 100 рублёў — нібыта для перадачы ў пракуратуру, і яшчэ 100 — для перадачы «кампэтэнтным асобам» за падмену аналізаў. Больш у яго грошай не было.
Абвінавачаньне кваліфікавала дзеяньні міліцыянта як падбухторваньне да хабару і махлярства — таму што грашамі Яўстраценка завалодаў сам і ні з кім не дзяліўся.
Травень 2016 году. У ізалятар часовага ўтрыманьня трапіў мясцовы жыхар, у якога знайшлі «здробненае рэчыва расьліннага паходжаньня, падобнае на марыхуану». Матэрыялы праверкі разглядае Яўстраценка. Ён пераканаў жонку затрыманага перадаць яму ў агульнай суме 2400 даляраў. На такую суму міліцыянт ацаніў вызваленьне з ІЧУ і адсутнасьць крымінальнага перасьледу для затрыманага.
Дзеяньні кваліфікаваныя як махлярства.
Студзень 2017 году. У затрыманага мясцовага жыхара ў крыві было знойдзена наркатычнае рэчыва. Яўстраценка папрасіў у наркамана 600 даляраў — для перадачы «кампэтэнтным асобам», якія падменяць вынікі аналізаў. Столькі грошай у залежнага не было. Ён перадаў праз палявода 300 даляраў, бутэльку гарэлкі, бутэльку каньяку і цукеркі.
Гэта кваліфікавана як яшчэ адзін эпізод махлярства.
Яшчэ ў аднаго затрыманага Яўстраценка прасіў тысячу даляраў — за адсутнасьць крымінальнай справы. Але той ня меў такіх грошай.
Завалодаць домам, пагражаючы гаспадару сфабрыкаванай справай
Чэрвень 2015 году. Міліцыянт захацеў завалодаць домам у Чачэрску. Не для сябе — для былой цешчы. «Пад пагрозай фальсыфікацыі доказаў захоўваньня наркотыкаў і распаўсюджаньня парнаграфіі прымусіў пацярпелага прадаць былой цешчы ягоны дом». Пацярпелы за свой дом атрымаў 5 тысяч даляраў і патрыманы «Нісан». Сам застаўся без жытла. Цяпер ён на заробках у Расеі і не зьявіўся на суд.
Дзеяньні міліцыянта кваліфікаваныя як перавышэньне ўлады.
Захапіў кватэру псыхічнахворага
Люты 2016 году. Міліцыянт даведаўся, што ў Нісімкавіцкай лякарні сястрынскага дагляду знаходзіцца недзеяздольны псыхічнахворы грамадзянін, які мае кватэру ў Чачэрску. Для псыхічнахворага апэратыўнік падшукаў апекуна — свайго знаёмага палявода зь вёскі Роўкавічы.
Грамадзянская жонка Яўстраценкі, якая працавала ў лякарні, дапамагла «апекуну» напісаць неабходныя заявы і падрыхтавала праект рашэньня аб прызначэньні апекі. Хворага забралі зь лякарні, завалодалі ключом ад яго кватэры ў Чачэрску і перавезьлі жыць у Роўкавічы.
«Кватэрай карысталіся ў сваіх інтарэсах», — зазначыў дзяржаўны абвінаваўца.
Пазьней «апекуны» спрабавалі прадаць кватэру. Але райвыканкам адмовіў ім у гэтым. Гэты эпізод стаў чарговым крымінальным артыкулам для опэра — махлярствам.
Забралі грошы ў недзеяздольнага з дэмэнцыяй
Сакавік 2018 году. Начальнік крымінальнай міліцыі «ўзяў у распрацоўку» састарэлага, які знаходзіўся ў Нісімкавіцкай лякарні сястрынскага дагляду. Састарэлы быў пазбаўлены дзеяздольнасьці праз псыхічнае захворваньне (дэмэнцыю) і знаходзіўся на дзяржаўным утрыманьні. На яго рахунку ў банку было каля 11 тысяч рублёў.
Паводле, абвінавачаньня, міліцыянт дамовіўся са знаёмым паляводам і ягонай грамадзянскай жонкай — каб яны аформілі апеку над старым чалавекам.
Грамадзянская жонка міліцыянта, якая працавала ў раённай лякарні, дала загад аддаць старога чалавека пад дагляд паляводаў, хоць апека не была аформлена.
Кампанія зь міліцыянта і двух паляводаў пасадзілі састарэлага ў аўтамабіль і павезьлі ў банк. Жанчына-палявод у касе банку прадставілася блізкай сваячкай састарэлага і зьняла зь яго рахунку 5 тысяч рублёў.
Затым састарэлага павезьлі да натарыюса ў Буда-Кашалёва. Там злачынная групоўка спрабавала аформіць дамову дарэньня кватэры састарэлага. Натарыюс адмовілася ад зьдзелкі.
Тады састарэлага зноў павезьлі ў банк у Буда-Кашалёва, каб зьняць астатнія грошы — 6 тысяч рублёў. Супрацоўнікі банку адмовіліся выдаць грошы і выклікалі міліцыю. Міліцыя распачала праверку.
Дзьмітры Яўстраценка дамовіўся са сваёй сястрой — кіраўніцай справамі Чачэрскага райвыканкаму, і яна апэратыўна дапамагла — аформіла паперы на апякунства над састарэлым, заднім чыслом.
Дзьмітры Яўстраценка ў судзе цалкам не прызнаў сваю віну. Разгляд крымінальнай справы працягваецца.
