Абраны прэзыдэнт Украіны Ўладзімір Зяленскі запісаў відэа, у якім заклікаў дэпутатаў Вярхоўнай Рады прызначыць інаўгурацыю на 19 траўня, гэта значыць праз 9 дзён.
Гэта, паводле яго, неабходна зрабіць, каб «ня даць уладзе, якая сыходзіць, зьдзяйсьняць неабдуманыя кадравыя перастаноўкі» у апошнія дні знаходжаньня на пасадзе. Відэазварот паказаў украінскі тэлеканал NewsOne, таксама яго разьмясьціла ў сацсетках каманда Зяленскага.
«Ён мне нагадвае турыста ў эгіпэцкім гатэлі, які заўтра зьедзе дадому і трымае ў кішэні дзьве дулі, — заўважыў Зяленскі аб дзеючым прэзыдэнце Парашэнку. — Забірае з сабой ручнікі, пантофлі і ўсё запар са швэдзкага стала».
Зяленскі заявіў, што пакуль Рада зацягвае працэс яго інаўгурацыі, а дэпутаты «трасуцца за свае мандаты», дзейны прэзыдэнт Парашэнка «зьдзяйсьняе незваротныя рэчы». У прыватнасьці, ён спрабуе пасьпець прызначыць ляяльных сабе людзей у дзяржаўныя структуры:
- праводзіць актыўныя перастаноўкі ў вышэйшым камандаваньні арміі,
- спрабуе прызначыць свайго кіраўніка Нацыянальнага рады па тэлебачаньні і радыёвяшчаньню,
- прызначае ляяльных сабе судзьдзяў у Вярхоўны суд,
- «раздае званьні генэралаў»,
- дае Героя Ўкраіны кіраўніку Службы бясьпекі Ўкраіны Васілю Грыцаку (гэта адбылося 9 траўня).
«Я вас вельмі прашу: здайце ключ і расплаціцца за міні-бар, — зьвярнуўся Зяленскі да Парашэнкі. — І едзьце: вам яшчэ мытны і пашпартны кантроль праходзіць».
«На бліжэйшым пасяджэньні вы павінны прызначыць дату інаўгурацыі на 19 траўня, — кажа Зяленскі ў відэа, зьвяртаючыся да дэпутатаў Рады. — Гэтага патрабую ня я, гэтага патрабуе народ Украіны, у інтарэсах якога вы прымалі прысягу, чые словы я вам нагадваю. Але пакуль што вы дзейнічаеце ў сваіх інтарэсах. Вы павінны спыніць гэтыя палітычныя сутаргі кульгавай качкі».
Зяленскі раней ужо напісаў ліст сьпікеру Вярхоўнай Рады Андрэю Парубію з прапановай правесьці інаўгурацыю 19 траўня, патлумачыўшы гэта неабходнасьцю пазьбегнуць «вакууму ўлады». Але дата цырымоніі дагэтуль не прызначаная. Магчымымі варыянтамі прывядзеньня Зяленскага да прысягі называліся 28 траўня і пачатак чэрвеня.
