У Крычаве затрыманая загадчыца дзіцячага садка № 19 Ала Пастухова, якая ў 2014 годзе не дазваляла падначаленым гутарыць з журналістамі пра абрынаньне мясцовай гімназіі.
62-гадовую Алу Пастухову затрымалі на працоўным месцы і вывелі з садка ў кайданках. Яе вінавацяць у злоўжываньні службовымі паўнамоцтвамі і хабарніцтве. У Сьледчым камітэце Свабодзе пацьвердзілі інфармацыю пра затрыманьне Пастуховай.
«Так, заведзеная крымінальная справа паводле прыкмет ч. 2 арт. 426 Крымінальнага кодэксу Беларусі. Падазроная знаходзіцца пад вартай», — паведамілі Свабодзе ва ўправе Сьледчага камітэту па Магілёўскай вобласьці.
Незаконна завалодала 6 тысячамі далярамі
Паводле папярэдніх зьвестак, яна незаконна завалодалі 6 тысячамі даляраў — нібыта выплачвала прэміі сваім падначаленым, якія потым забірала і выкарыстоўвала на свой розум. Яе ўтрымліваюць у сьледчым ізалятары магілёўскай турмы № 4.
Садок, якім кіравала Пастухова, у Крычаве лічыўся прывілеяваным. Пра ягоныя дасягненьні пісала дзяржаўная прэса. У публікацыях дашкольную ўстанову і называлі «перадавой», яна неаднойчы станавілася пераможцам раённых спаборніцтваў, апошні раз — у 2018 годзе.
Узначальвала выбарчую камісію
Пастухова мела ганаровую грамату Магілёўскага аблвыканкаму, нязьменна старшынявала ва ўчастковых выбарчых камісіях. Была на раённай дошцы гонару.
29 жніўня 2014 году Пастухова выгнала з тэрыторыі садка журналістаў, якія спрабавалі пагутарыць зь яе падначаленымі пра абрынаньне будынку гімназіі. Гэтая навучальная ўстанова побач з садком.
Крычаўскі журналіст Сяргей Няроўны кажа, што арышт Пастуховай стаў рэзананснай падзеяй для 25-тысячнага райцэнтру.
«Вядома ж, падставы для яе зьняволеньня ёсьць і пастанова вывесьці загадчыцу на вачах у падначаленых у кайданках прымалася на абласным узроўні. Яна не шараговы чалавек і лічыла сябе недатыкальнай», — выказваецца Сяргей Няроўны.
З гісторыі арыштаў крычаўскіх службоўцаў
Апошні раз падобным чынам у Крычаве затрымалі ў 2013 годзе генэральнага дырэктара акцыянэрнага таварыства «Крычаўцэмэнташыфэр» Леаніда Скоцкага.
Скоцкаму інкрымінавалася злоўжываньне службовымі паўнамоцтвамі і хабарніцтва. Суд над ім быў паказальным, працэс праходзіў у Крычаве.
Скоцкаму, які незадоўга да арышту паказваў Аляксандру Лукашэнку прадпрыемства, далі дзесяць гадоў калёніі ўзмоцненага рэжыму. Паводле сьледзтва, былы кіраўнік незаконна завалодаў 214 мільёнамі недэнамінаваных рублёў. Затрымалі яго ў момант перадачы яму 40 мільёнаў.
