Газэта Адміністрацыі прэзыдэнта «СБ. Беларусь сегодня» апытала чыноўнікаў пра ўжываньне нядаўна прынятай Канцэпцыі інфармацыйнай бясьпекі. Свабода каротка перадае некаторыя цікавыя выказваньні.
Паводле чыноўнікаў, Канцэпцыя будзе выкарыстоўвацца, каб:
- «людзі атрымлівалі больш дакладнай і пазытыўнай інфармацыі» (намесьнік дзяржаўнага сакратара Савету бясьпекі Ўладзімер Арчакоў);
- «на вуліцах і надалей не разгульвалі экстрэмісты і нэанацысты, не гучала нацысцкіх вітаньняў» (ён жа);
- «у кампутар ня ўлазілі чарвякі-вымагальнікі» (ён жа);
- «даваць адэкватны адказ на спробы расхістаць дзяржаву» да таго, як «вірус хаосу запушчаны ў сеціва» (прарэктар Акадэміі кіраваньня, прафэсар Аляксандар Іваноўскі);
- «палепшыць імідж праваахоўных органаў» (намесьнік міністра ўнутраных справаў Аляксандар Барсукоў);
- «больш выразна і эфэктыўна рэагаваць» на дзеяньні «асобных прадстаўнікоў інтэрнэт-супольнасьці», якія «спрабуюць маніпуляваць грамадзкай сьвядомасьцю, фармаваць зьняважлівае стаўленьне да міліцыі праз кампрамэтуючыя выпады ў адрас супрацоўнікаў органаў унутраных справаў» (ён жа).
Наконт апошніх Барсукоў дадаў: такія выказваньні «агулам не ўплываюць на грамадзкую думку, але дэструктыўны раздражняльны фон ствараюць».
Якія менавіта «выпады» маюцца на ўвазе, ён не ўдакладніў, але на мінулым тыдні міністар унутраных справаў Ігар Шуневіч абяцаў выявіць крыніцы працёкаў «пэўнай інфармацыі зь міліцэйскіх зводак» аб «надзвычайных здарэньнях з асабовым складам».
Інфармацыя зь міліцэйскіх зводак неаднойчы публікавалася на тэлеграм-канале NEXTA. Потым яе пацьвярджалі ў Міністэрстве ўнутраных справаў.
- У студзені на гэтым канале зьявілася інфармацыя пра тое, што ў Магілёўскім раёне інспэктар ДАІ з Чэрыкава насьмерць зьбіў пэнсіянэра і ўцёк зь месца здарэньня.
- Потым блогер распаўсюдзіў у Telegram інфармацыю пра меркаванае затрыманьне опэрупаўнаважанага Шклоўскага РАУС, у якога пры асабістым ператрусе знайшлі І сканфіскавалі асабліва небясьпечнае псыхатропнае рэчыва.
- Таксама NEXTA першым паведаміў, што Мсьціслаўскі раённы аддзел Сьледчага камітэту завёў крымінальную справу па факце ўжываньня гвалту супрацоўнікам міліцыі супраць двух грамадзянаў.
- Паводле блогера, у Мазыры супрацоўнікі ДАІ затрымалі міліцыянта з Калінкавіцкага аддзелу дэпартамэнту аховы, які «з прыкметамі алькагольнага ап’яненьня кіраваў асабістым „Фольксвагенам“».
- Ён жа паведаміў пра зьнікненьне кіраўніка магілёўскага аддзяленьня мэдычнай службы дэпартамэнту фінансаў і тылу МУС Сяргея Максімава.
У рэйтынгу адкрытасьці асноўных дзяржаўных ведамстваў і арганізацыяў, які склала Беларуская асацыяцыя журналістаў, Міністэрства ўнутраных справаў займае перадапошняе месца: журналісты прызналі МУС адным з самых закрытых для СМІ.
