Урад Японіі 19 сакавіка прыняў рашэньне зьмяніць шэраг законаў аб абароне правоў дзяцей пасьля гучных выпадкаў сьмерці праз пакараньні бацькамі. Законы, якія парлямэнт пачне распрацоўваць зараз, набудуць моц у красавіку 2020 года.
- Бацькам, у тым ліку прыёмным, і сацыяльным работнікам забароняць караць дзяцей фізычна. Пры гэтым новы закон не прадугледжвае пакараньня для парушальнікаў. У цяперашнім законе гвалтам называюцца «фізычны напад» і «непрыстойныя дзеяньні». Што тычыцца выхаваньня дзяцей, у існуючым законе толькі гаворыцца, што людзі павінны абдумана ажыцьцяўляць свае бацькоўскія правы.
- Новыя законы таксама дадуць больш правоў сацыяльным службам «умешвацца» ў справы гвалту над дзецьмі. Напрыклад, адказнасьць супрацоўнікаў сацслужбаў падзеляць: адзін чалавек будзе займацца дзіцем, другі — бацькамі. Цяпер бацькі могуць адмовіцца ад умяшаньня сацыяльных службаў.
- Новыя законы абавяжуць школы, адукацыйныя ўстановы і цэнтры абароны дзяцей захоўваць ананімнасьць ахвяр. Японскія СМІ спасылаюцца на выпадак 10-гадовай Міі, якую знайшлі мёртвай у сваім доме. Дзяўчынка загінула, як мяркуецца, ад рук бацькі. Міа напісала кіраўніцтву школы запіску аб хатнім гвалце, школа перадала гэтую запіску бацьку дзяўчынкі. У СМІ пішуць, пасьля гэтага гвалт над Міяй, верагодна, стаў больш жорсткім.
У 2018 году японская паліцыя расьсьледавала рэкордныя 1380 выпадкаў гвалту над дзецьмі. У параўнаньні з 2017 годам гэтая статыстыка вырасла на 21,3%.
