Былы галоўны ўрач Горадзенскага клінічнага абласнога шпіталя Сьвятаслаў Савіцкі атрымаў 4 гады зьняволеньня ў калёніі ўзмоцненага рэжыму без канфіскацыі маёмасьці за незаконнае налічэньне прэмій супрацоўнікам. Прысуд абвясьцілі ў судзе Ленінскага раёну Горадні 23 студзеня. Ён яшчэ не ўступіў у сілу і можа быць абскарджаны.
Паводле абвінавачваньня, Сьвятаслаў Савіцкі налічыў каля 423 мільёнаў недэнамінаваных рублёў незаконных прэмій.
Былога кіраўніка шпіталя абвінавачвалі таксама ў тым, што ён схаваў сьляды выбуху ў шпіталі, ад якога памерлі два сьлесары-сантэхнікі.
Тады ён адразу не паведаміў пра здарэньне свайму начальству і ў адказныя органы, загадаў вынесьці з памяшканьня, дзе ішоў рамонт, балён з газам ды іншае абсталяваньне, якое стала прычынай выбуху. Адказваць за гэта Савіцкі ня будзе, бо мінуў пяцігадовы тэрмін даўнасьці.
Справу расьсьледавалі каля пяці гадоў. Газ на тэрыторыі шпіталя выбухнуў у ліпені 2013 году. Справу завялі ў студзені 2014 году, да суду яна дайшла ў верасьні 2018-га.
Сьвятаславу Савіцкаму 56 гадоў. На пасадзе галоўнага ўрача Горадзенскага абласнога шпіталя працаваў з 2002 году. Зь лютага 2014 году выкладаў у Горадзенскім мэдыцынскім унівэрсытэце на катэдры ўнутраных хваробаў. Паходзіць з Ваўкавыскага раёну. Жанаты, мае дарослых дзяцей.
Гэтая публікацыя падрыхтаваная з выкарыстаньнем інфармацыі БелаПАН.
