Расейская ЛГБТ-сетка (найбуйнейшая міжрэгіянальная арганізацыя ў Расеі, якая з 2006 году займаецца абаронай правоў ЛГБТ) пацьвердзіла паводле сваіх крыніц, што з канца сьнежня 2018 гадоў у Чачэніі ідзе новая хваля затрыманьняў і мужчын, і жанчын з прычыны іхнай меркаванай ці рэальнай сэксуальнай арыентацыі.
Першай пра новую хвалю затрыманьняў на пачатку студзеня паведаміла «Новая газета», а тэлеканалу «Настоящее время» ўдалося пацьвердзіць зьнікненьні людзей праз свае крыніцы ў рэгіёне.
Паводле інфармацыі расейскай ЛГБТ-сеткі, з канца сьнежня 2018 гадоў у Чачэніі было затрымана каля 40 чалавек, як мужчын, так і жанчын, пры гэтым два чалавекі былі забітыя ў выніку катаваньняў. Абставіны іх сьмерці арганізацыя не раскрывае.
Дырэктар праграм расейскай ЛГБТ-сеткі Ігар Качаткоў адзначае, што затрыманьні праводзяцца супрацоўнікамі праваахоўных органаў, а пацярпелых незаконна ўтрымліваюць у Аргуне. Гэты ж населены пункт згадвае ў сваіх матэрыялах і «Новая газэта».
Прэс-сакратар кіраўніка Чачэніі Рамзана Кадырава Альві Карымаў у студзені адпрэчваў інфармацыю пра новы перасьлед геяў у рэспубліцы.
«Усё гэта, калі казаць літаратурнай мовай, хлусьня і дэзынфармацыя. У Чачэнскай Рэспубліцы няма ніякіх турмаў і месцаў пазбаўленьня волі, якія б не ўваходзілі ў сыстэму ФСВП», — заявіў Карымаў.
Паводле інфармацыі ЛГБТ-сеткі, у гэты раз перасьледы ў Чачэні пачаліся з затрыманьня адміністратара групы ў сацыяльнай сетцы «УКантакце», дзе размаўлялі гомасэксуальныя мужчыны з рэспублік Паўночнага Каўказу: гэта адбылося ў канцы сьнежня 2018 году. Пасьля гэтага затрыманьня былі і іншыя. Аднак расейская ЛГБТ-сетка не раскрывае, ці былі ўсё затрыманыя ў групе або іх маглі раскрыць па іншых каналах.
Прадстаўнікі ЛГБТ-сеткі адзначаюць, што чачэнская паліцыя робіць усё магчымае для таго, каб людзі, якіх падазраюць у прыналежнасьці да ЛГБТ, не маглі выехаць з Чачэніі або пасьля дабівацца абароны ў судзе. Паводле зьвестак праваабаронцаў, як і раней, у іх адбіраюць дакумэнты, пагражаюць фальсыфікаваць крымінальныя справы ў дачыненьні іх або іхных блізкіх, прымушаюць падпісваць пустыя блянкі.
Праваабаронцы і журналісты пачалі атрымліваць інфармацыю пра перасьлед (незаконнае ўтрыманьне, катаваньні, забойствы) гомасэксуальных, бісэксуальных і трансгендерных людзей у Чачэніі, пачынаючы зь вясны 2017 году. Да гэтага часу расейскія ўлады не правялі эфэктыўнага расьсьледаваньня гэтых паведамленьняў, а ўлады Чачэніі адмаўляюць, што перасьледы мелі і маюць месца.
Адкрыта расказаць пра незаконнае затрыманьне адважыўся на гэты момант толькі Максім Лапуноў, які зьехаў з Расеі.
«Новая газета» называла і іншыя імёны. У прыватнасьці, паводле яе, Шато-Шаміль Акаеў і Аюб Ібрагімаў былі забітыя ў сакрэтнай турме, дзе ўтрымліваліся прадстаўнікі ЛГБТ.
20 сьнежня 2018 году быў апублікаваны даклад пра цяжкія парушэньні правоў чалавека ў Чачэнскай Рэспубліцы. Аўтар дакладу змог апытаць ахвяр, сьведак, праваабаронцаў і журналістаў і пацьвердзіў факт сыстэматычных масавых затрыманьняў у Чачэніі, незаконных утрыманьняў у «сакрэтных турмах» і катаваньняў. У прыкладзе таксама канстатуецца ўдзел у перасьледзе сілавых структур Чачэніі.
Расейская ЛГБТ-сетка ў красавіку 2018 году паведамляла, што арганізацыі ўдалося вывезьці з Чачэніі больш за 130 чалавек, які зьвярнуўся да іх па дапамогу, і пераважная большасьць зь іх пакінула межы Расеі.
