Актывісты руху салідарнасьці «Разам» сёньня ў Львове пікетавалі Генэральнае консульства Расеі, патрабуючы спыніць агрэсію супраць Украіны і вызваліць усіх палітычных вязьняў, якія ўтрымліваюцца ў расейскіх турмах, а таксама ўкраінскіх маракоў, захопленых 25 лістапада ў Керчанскай пратоцы.
Традыцыйна штогод у гэтыя дні беларусы разам з украінцамі ладзяць у Львове акцыі ў памяць аб Слуцкім паўстаньні 1920 году — узброенай спробе абараніць беларускую дзяржаўнасьць і незалежнасьць ад савецкіх войскаў.
У сувязі з падзеямі 25 лістапада, калі ў Керчанскай пратоцы расейскія караблі атакавалі ўкраінскія памежныя катэры, арганізатары акцыі зьмянілі праграму акцыі, каб правесьці супольны пікет расейскага консульства.
Удзельнікі акцыі таксама зьвярнуліся да кіраўніка Львоўскай абласной дзяржаўнай адміністрацыі з патрабаваньнем закрыць консульства Расеі як «рэзыдэнцыі шпіянажу, антыўкраінскай прапаганды і тэрарызму».
Будынак генэральнага консульства Расеі ў Львове ахоўвалі супрацоўнікі Нацыянальнай гвардыі і паліцыі Ўкраіны — іхная колькасьць перавышала колькасьць актывістаў, якія ўзялі ўдзел у акцыі.
Вярхоўная Рада Ўкраіны 26 лістапада законам зацьвердзіла ўказ прэзыдэнта Пятра Парашэнкі аб увядзеньні ваеннага становішча ў сувязі з «чарговым актам агрэсіі Расейскай Фэдэрацыі 25 лістапада ў раёне Керчанскай пратокі супраць караблёў Вайскова-марскіх сілаў Украіны».
Згодна з гэтым рашэньнем, якое набудзе моц адразу пасьля публікацыі, праваахоўныя і вайсковыя органы ды фармаваньні краіны пераводзяцца на ўзмоцнены рэжым службы. Таксама ва ўзмоцненым рэжыме будуць ахоўвацца ўсе дыпляматчныя ўстановы ва Ўкраіне.
