Менскі гарадзкі суд пакінуў бязь зьменаў прысуд лідэру прафсаюзу РЭП Генадзю Фядынічу і бухгальтару Ігару Комліку. За ўхіленьне ад выплаты падаткаў у буйным памеры яны асуджаныя на 4 гады абмежаваньня волі без накіраваньня ў папраўчую ўстанову (на так званую «хатнюю хімію»). Ім таксама забаронена займаць кіроўныя пасады цягам 5 гадоў.
Менавіта такі прысуд вынес 24 жніўня суд Савецкага раёну Менску. Фядыніч і Комлік падалі скаргу ў суд вышэйшай інстанцыі — гарадзкі суд.
На 10 старонках яны выклалі свае пярэчаньні і аргумэнты:
- паказаньні многіх сьведак былі атрыманыя пад ціскам,
- да паказаньняў Юліі Юхнавец, якія прызналася ў супрацоўніцтве з КДБ, трэба ставіцца крытычна,
- у матэрыялах сьледзтва шмат фіктыўных дакумэнтаў.
Разглядаў скаргу судзьдзя Менскага гарадзкога суду Сяргей Хрыпач. Падтрымаць Фядыніча і Комліка прыйшло больш за 100 чалавек. Сярод іх праваабаронцы, палітыкі Алесь Бяляцкі, Валянцін Стэфановіч, Павал Левінаў, Мікола Статкевіч. Таксама прысутнічалі дыпляматы з амбасадаў ЗША, Вялікай Брытаніі, Літвы, Чэхіі. Зноў пры ўваходзе ў залю былі беспрэцэдэнтныя захады бясьпекі, узмоцнены кантроль. Калі людзі паспрабавалі разгарнуць сьцяг РЭП, іх папрасілі пакінуць залю. Некалькі разоў у залі раздаваліся воклічы «Ганьба!».
І Генадзь Фядыніч, і Ігар Комлік настойвалі, што прысуд ня толькі несправядлівы, а яшчэ і палітызаваны. Фядыніч паведаміў, што па справе было дапытана 814 чалавек.
Адвакатка Людміла Казак сказала, што міжнародная праваабарончая і прафсаюзная супольнасьць расцэньвае крымінальны перасьлед лідэраў РЭП як атаку на незалежныя прафсаюзы. Яна падкрэсьліла, што высновы суду першай інстанцыі не адпавядаюць акалічнасьцям справы, дакладныя і дастатковыя доказы не прадстаўленыя альбо здабытыя з парушэньнем закону.
Другая адвакатка, Натальля Мацкевіч, зьвярнула ўвагу на незаконнасьць разбору, несапраўднасьць выпісак — зь літоўскага, швэдзкага, дацкага банкаў, якія былі прадстаўленыя ў судзе. У справе фігуруюць дзіўныя раздрукоўкі, а ня банкаўскія дакумэнты, кажа адвакатка.
Пракурорка Герасімовіч настойвала на тым, што віна Фядыніча і Комліка цалкам устаноўленая і пацьверджаная доказамі.
Судзьдзя Сяргей Хрыпач падтрымаў бок абвінавачваньня і пакінуў прысуд у сіле.
Паводле Генадзя Фядыніча, зь яго і Ігара Комліка пастанавілі спагнаць каля 50 тысяч даляраў — гэта нібыта нясплачаныя падаткі за 2011 год, індэксацыя і кошт шматлікіх экспэртызаў.
Фядыніч і Комлік зьбіраюцца аспрэчваць прысуд у Вярхоўным судзе і міжнародных інстанцыях.
«Справа РЭП». Што важна ведаць
- Генадзя Фядыніча і Ігара Комліка затрымалі 2 жніўня 2017 году. Комлік заставаўся пад вартай да пачатку кастрычніка 2017 году. Паводле сьледзтва, на літоўскі рахунак Фядыніча і Комліка ў 2011 годзе паступіла больш за 140 тысяч эўра, якія не праходзілі ў фінансавых справаздачах.
- Прафсаюзных актывістаў абвінавацілі ва ўхіленьні ад выплаты падаткаў на 23 тысячы рублёў.
- У межах справы сьледчыя апыталі больш за 800 актывістаў прафсаюзу РЭП па ўсёй краіне.
- 24 жніўня лідэраў незалежнага прафсаюзу РЭП Фядыніча і Комліка асудзілі на 4 гады «хатняй хіміі».
- Фігуранты справы называюць яе «цалкам сфабрыкаванай».
- Праваабаронцы, якія сачылі за судовым працэсам, адзначалі, што многія доказы здабытыя ў межах «таямнічых працэдураў».
- З заявамі пра неабходнасьць адмены абвінаваўчага прысуду Фядынічу і Комліку выступаюць беларускія праваабарончыя і міжнародныя арганізацыі. Так, на думку міжнароднай праваабарончай арганізацыі Front Line Defenders, перасьлед прафсаюзных лідэраў зьвязаны выключна зь іхнай мірнай і законнай працай у галіне абароны правоў чалавека.
- З патрабаваньнем адмяніць пакараньне лідэрам РЭП зьвярнуліся да прэзыдэнта Беларусі Глябальны саюз IndustriALL і Міжнародная канфэдэрацыя прафсаюзаў.
Што такое прафсаюз РЭП і чаму яго перасьледуюць
