Росту колькасьці сканфіскаванай зброі ў параўнаньні з 2017 годам памежнікі не зафіксавалі. Пры гэтым Лукашэнка загадаў узмацніць кантроль на мяжы з Укріанай менавіта праз кантрабанду зброі.
Аляксандар Лукашэнка 24 верасьня на сустрэчы зь дзяржаўным сакратаром Савету бясьпекі Станіславам Засем і старшынём Дзяржаўнага памежнага камітэту Анатолем Лапо заявіў пра неабходнасьць умацаваць беларуска-ўкраінскую мяжы. Гэты крок ён абгрунтаваў патрэбай спыніць нелегальны перавоз зброі.
Свабода спытала ў Памежным камітэце, колькі незаконна перавезенай зброі было сканфіскавана на мяжы з Украінай у 2018 годзе.
110 адзінак зброі і 1200 боепрыпасаў
Афіцыйны прадстаўнік Дзяржаўнага памежнага камітэту Беларусі Антон Бычкоўскі назваў агульную лічбу выяўленай на мяжы і сканфіскаванай памежнікамі зброі, якую спрабавалі нелегальна перавезьці.
«У 2018 годзе на мяжы было выяўлена і сканфіскавана 110 адзінак зброі і больш за 1200 боепрыпасаў. Гэта меней за 2017 год, што сьведчыць пра пільнейшую працу беларускіх памежнікаў і лепшае супрацоўніцтва з калегамі з суседніх краін», — сказаў Антон Бычкоўскі.
Асобна зьвестак зь беларуска-ўкраінскай мяжы палкоўнік Бычкоўскі не назваў.
Павялічыцца штат памежнікаў, але невядома, наколькі
Антон Бычкоўскі заявіў, што захады дзеля выкананьня задачы ўзмацненьня беларуска-ўкраінскай мяжы плянуецца рэалізаваць да канца 2018 году, і гэтая праца ўжо пачалася.
Паводле Бычкоўскага, рашэньні ўзмацніць беларуска-ўкраінскую мяжу цяпер знаходзяцца «ў стадыі прапрацоўкі», і пакуль немагчыма дакладна адказаць на пытаньне пра павелічэньне там штату супрацоўнікаў.
«Мы зыходзім са словаў кіраўніка дзяржавы: наколькі будзе патрэба, настолькі і павялічаць штатную колькасьць памежнай службы Беларусі. Дакладна сказана, што гэта адбудзецца праз пераразьмеркаваньне ў сілавых ведамствах. То бок агульная колькасьць штатных адзінак у сілавым блёку не павялічыцца, але частка зь іншых ведамстваў будзе перададзеная памежнікам. У залежнасьці ад патрэбаў і тых умоваў, якія фармуюць выклікі і пагрозы».
На мяжы зьявяцца манэўраныя групы
Як сказаў Свабодзе Антон Бычкоўскі, у штат тэрытарыяльнай памежнай службы (гэта памежныя атрады і памежныя групы) вернуць манэўраныя групы колькасьцю ад 60 да 80 чалавек.
«Гэта такія рэзэрвы камандзіра памежнага атраду ці групы, якія ён можа выкарыстоўваць на розных кірунках у сувязі са зьменамі сытуацыі на дзяржаўнай мяжы», — патлумачыў Бычкоўскі.
Паводле яго, манэўраныя групы зьявяцца па ўсёй ахоўванай мяжы Беларусі, але найперш на ўкраінскім адрэзку.
