На Гомельшчыне супрацоўнікаў шпіталёў пакаралі за «недаўкладваньне» ежы

07 верасень 2018, 10:04 абноўлена 07 верасень 2018, 11:41

Парушэньні ў арганізацыі харчаваньня пацыентаў лякарняў у Гомлі і Лельчыцах выявіў Камітэт дзяржкантролю, піша БелаПАН.

Дзе парушалі?

Гомельскія гарадзкія шпіталі № 3 і № 4.
Лельчыцкі раённы шпіталь.

Што парушылі?

У правераных шпіталях харчы закуплялі праз пасярэднікаў, таксама зьмянялі ўмовы дамоваў на закупку — кошт «неабгрунтавана павялічвалі».

Гомельскі шпіталь № 3 у 2016 годзе заключыў дамову на пастаўку скумбрыі з прыватнай структурай: за год цану закупкі павялічылі на 43% пры павелічэньні цэнаў на 33%.
Гомельскі шпіталь № 4 заключыў дамову на пастаўку хлеба з райпа. За 2016 год кошт закупкі жытняга хлеба павялічыўся на 35,2%, пшанічнага — на 46,2%, пры гэтым рост цэнаў на сыравіну падняўся на 8,1% і 9,9% адпаведна.

ГЛЯДЗІЦЕ ТАКСАМА:

Што цягнуць кухары зь дзіцячых сталовак? Усё

Не выконваліся штодзённыя нормы набору прадуктаў пры арганізацыі харчаваньня пацыентаў.

У гомельскім шпіталі № 3 не выконвалі нормы 11 з 26 найменьняў прадуктаў у 2016 і 2017 гадах. Напрыклад, у шніцэлі доля хлеба, наяўнасьць якога не дапускаецца, складала 20%. У бульбяным супе з рыбай колькасьць тлушчу складала 55% ад нормы, сухіх рэчываў — 91,7%.
Цягам двух гадоў не закуплялі сокі і садавіну для радзільнага аддзяленьня.

Як пакаралі?

8 фізычных і 2 юрыдычныя асобы аштрафавалі агулам на 2446 рублёў.
15 чалавек прыцягнулі да дысцыплінарнай адказнасьці, зь іх аднаго звольнілі.

На пачатку верасьня дзяржкантроль Магілёўскай вобласьці выявіў парушэньні у арганізацыі харчаваньня пацыентаў Быхаўскай цэнтральнай раённай лякарні. У ліпені ў Менскім абласным судзе пачаўся працэс па справе аб карупцыі ў Менгарвыканкаме. Начальніка галоўнага ўпраўленьня спажывецкага рынку Менгарвыканкаму Сяргея Барысевіча і дырэктары камбінатаў школьнага харчаваньня раёнаў Менску.

«Справа мэдыкаў». Што важна ведаць

Што здарылася. У чэрвені 2018 году стала вядома пра масавыя затрыманьні ў мэдыцынскай галіне. У дачыненьні да 37 службовых асобаў былі ужытыя розныя меры стрыманьня за злачынствы, прадугледжаныя трыма артыкуламі Крымінальнага кодэксу

430 («Атрыманьне хабару»),
431 («Даваньне хабару»)
243 («Ухіленьне ад выплаты сумаў падаткаў і збораў»)

Усяго ў «справе мэдыкаў» фігуруюць звыш 90 чалавек. Усе яны, як сьцьвярджаюць у КДБ, неаднаразова атрымлівалі незаконныя грашовыя ўзнагароды за садзейнічаньне ў пастаўцы мэдабсталяваньня і мэдыцынскіх прэпаратаў па завышаных цэнах. Усім прыцягнутым да крымінальнай адказнасьці, за выключэньнем апошніх затрыманых, выстаўленыя абвінавачаньні паводле названых крымінальных артыкулаў.

11 чэрвеня 2018 году стала вядома пра затрыманьне дырэктара Цэнтру экспэртыз аховы здароўя Аляксандра Сталярова, а таксама ягонага намесьніка (за стварэньне для «сваіх пастаўшчыкоў» прывабных умоў паставак імпартнага мэдычнага абсталяваньня ў дзяржаўныя шпіталі і паліклінікі).
18 чэрвеня «Ежедневник» паведаміў пра «масавыя затрыманьні ў структурах Мінздароўя» — больш за 10 чалавек — у межах апэрацыі аб пастаўках у беларускія мэдычныя ўстановы абсталяваньня па завышаных цэнах, паводле відавочна ашуканскіх схемаў. Сярод затрыманых аказаўся кіраўнік мэдыцынскай службы Міністэрства абароны Аляксей Яськоў.
19 чэрвеня МУС паведаміла пра затрыманьне галоўнага патолягаанатама Мінздароўя, кіраўніка гарадзкога клінічнага патолягаанатамічнага цэнтру Аркадзя Пучкова (за хабар цягам 10 год на суму каля 200 тысяч даляраў).
25 чэрвеня старшыня КДБ Валер Вакульчык паведаміў, што затрыманыя і ўзятыя пад варту 33 службовыя асобы, а ўсяго трапіла пад увагу больш за 50 чалавек. Фактычна ўсе яны віну прызналі і супрацоўнічаюць са сьледзтвам.
Паводле намесьніка генпракурора Беларусі Аляксея Стука, сфэра аховы здароўя лідзіруе па колькасьці карупцыйных злачынцаў: 114 за пяць месяцаў 2018 году.
21 ліпеня быў звольнены затрыманы раней намесьнік міністра аховы здароўя Ігар Ласіцкі. Курыраваў пытаньні звароту мэдычных вырабаў у Беларусі і ліцэнзаваньня, за спрыяльнае вырашэньне пытаньняў, паводле КДБ, браў хабар «ад 2500 да 10 тысяч даляраў».
21 жніўня агучаны першы вырак у справе мэдыкаў-карупцыянэраў: былы намесьнік галоўнага лекара па тэхніцы Менскай абласной дзіцячай клінічнай бальніцы Аркадзь Патапаў асуджаны да 6 гадоў пазбаўленьня волі ў калёніі ўзмоцненага рэжыму за карупцыйныя злачынствы.
11 верасьня Аляксандар Лукашэнка заявіў, што па «справе мэдыкаў» распачатыя 95 крымінальных спраў, дзе фігуруюць «дзясяткі мільёнаў даляраў», амаль 100 чалавек трапілі пад сьледзтва.
30 студзеня 2019 году стала вядома Камітэт дзяржаўнай бясьпекі вядзе папярэдняе сьледзтва па 4 крымінальных справах, у межах якіх 93 чалавекі маюць працэсуальныя статусы абвінавачаных і падазраваных: 30 службовых асобаў сыстэмы аховы здароўя і 63 асобы — уласьнікі (заснавальнікі), кіраўнікі і працаўнікі камэрцыйных структураў. У гэты час ужо ішоў шэраг судоў па карупцыйных справах у мэдыцыне.