Booking.com выключыў магчымасьць браніраваньня аб’ектаў разьмяшчэньня для адпачынку ў анэксаваным Крыме.
«На жаль, цяпер на нашым сайце немагчыма забраніраваць пражываньне ў Крыме з мэтай адпачынку», — паведамляе сэрвіс на спробу зарэзэрваваць нумар гатэлю, хостелю або кватэру ў любым пункце паўвыспы. Пры гэтым бізнэс-турысты ўсё яшчэ могуць забраніраваць жытло.
Уладальніца аднаго з хостэлаў у Судаку на сваёй старонцы ў Facebook апублікавала афіцыйны адказ ад сэрвісу на яе запыт. «Кампанія Booking.com заўсёды імкнецца выконваць усе адпаведныя і прыдатныя законы, якія дзейнічаюць на тэрыторыі, дзе яна працуе, — гаворыцца ў адказе. —
Паколькі Booking.com BV месьціцца ў Нідэрляндах, мы павінны выконваць гандлёвыя санкцыі ЭЗ у дачыненьні да Крыму. Згодна з санкцыямі, кампаніі Booking.com не дазволена прапаноўваць якія-кольвечы паслугі, непасрэдна зьвязаныя з турыстычнай дзейнасьцю ў Крыме».
У сьнежні 2016 году створаная на тэрыторыі Ўкраіны «Пракуратура АР Крым» адкрыла крымінальную вытворчасьць у дачыненьні да сайту Booking.com за «гандаль крадзеным». У прыватнасьці адзначалася, што сэрвіс «праводзіць апэрацыі і прадае пражываньне ў санаторыях і гатэлях Крыму, скрадзеных ва Ўкраіны».
У траўні 2017 году Booking.com пазначыў Крым як частку Ўкраіны.
Вярхоўная Рада Ўкраіны афіцыйна абвясьціла 20 лютага 2014 пачаткам часовай акупацыі Крыму і Севастопаля Расеяй. Міжнародныя арганізацыі прызналі акупацыю і анэксію Крыму незаконнымі і асудзілі дзеяньні Расеі. Краіны Захаду ўвялі эканамічныя санкцыі. Расея адмаўляе акупацыю паўвострава і называе гэта «аднаўленьнем гістарычнай справядлівасьці».
