Позна ўвечары 14 ліпеня з Цэнтру ізаляцыі правапарушальнікаў, што на вуліцы Акрэсьціна ў Менску, вызвалены супрацоўнік міліцыі Міхаіл Грамыка.
Пра гэта паведаміў сустаршыня Беларускай хрысьціянская дэмакратыі Павал Севярынец. 30 чэрвеня наглядчык адміністратыўнай турмы, у якой перабывалі тысячы апазыцыянэраў, сам стаў у іх шэрагі падчас вахты супраць рэстарана «Поедем поедим» ля Курапатаў.
За ўдзел у несанкцыянаваным пікеце, паводле непацьверджанай інфармацыі, Міхаілу Грамыку прысудзілі 15 сутак арышту.
За шмат гадоў працы турэмным наглядчыкам ён ведаў многіх палітычных вязьняў, у тым ліку Леаніда Кулакова, Зьмітра Дашкевіча, Паўла Севярынца. Знаёмства зь Севярынцам паўплывала на рашэньне прыйсьці ў Курапаты.
Перайшоў зь міліцыі на бок апазыцыі. Што вядома пра турэмніка, асуджанага за ўдзел у вахце ля Курапатаў
14 ліпеня каля рэстарану «Поедем поедим» у Курапатах адбыўся чарговы інцыдэнт. Як паведамілі актывісты, якія пратэстуюць супраць працы рэстарану каля месца масавых растрэлаў, машына з расейскім нумарамі зьбіла актывіста Леаніда Кулакова.
Міліцыя, якая прыехала на месца здарэньня, адмовілася прымаць заявы ад пратэстоўцаў. Замест гэтага міліцыянты вырашылі складаць пратаколы на пратэстоўцаў. Міліцыя таксама ня ўмешвалася, калі ахоўнікі і саўладальнік рэстарану Леанід Зайдэс схапілі і адцягнулі ў бок пратэстоўцаў, якія блякавалі мікрааўтобус.
Што важна ведаць аб пратэстах супраць новай рэстарацыі ў Курапатах
- Рэстаран стаіць за 50 мэтраў ад месца, дзе ў 1930-я адбываліся масавыя расстрэлы. Карнікі НКВД расстралялі тут ад 30 тысяч да 250 тысяч чалавек.
- 28 траўня карэспандэнт Свабоды трапіў на тэрыторыю комплексу, дзе пабачыў падрыхтоўку да хуткага адкрыцьця рэстарацыі.
- Грамадзкія актывісты штодня ад 31 траўня пікетуюць забаўляльны комплекс, патрабуючы яго закрыцьця.
- 1 чэрвеня рэстаран «Поедем поедим» пачаў рэклямавацца ў інтэрнэце.
- Рэстаран «Поедем поедим» у Курапатах меркавана запрацаваў увечары 5 чэрвеня.
- 27 чэрвеня наведніцы рэстарацыі на аўтамабілі зьбілі актывіста Леаніда Кулакова, у яго пералом рукі.
- Старшыня Партыі БНФ Рыгор Кастусёў 13 ліпеня паведаміў пра нейкія дамоўленасьці з уладальнікам рэстарацыі, але якія гэта дамоўленасьці — пакуль не сказаў.
- Будоўля забаўляльнага комплексу пад назвай «Бульбаш-хол» пачалася ў 2012 годзе ў ахоўнай зоне Курапатаў. У 2014-м ахоўную зону зьменшылі.
- Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы. Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.
