Дзеячы расейскай культуры выступілі са зваротам да прэзыдэнта Ўладзіміра Пуціна, заклікаўшы кіраўніка дзяржавы памілаваць украінскага рэжысэра Алега Сянцова.
Зварот апублікаваны на сайце радыёстанцыі «Эхо Москвы».
У ім падкрэсьліваецца, што «віна Сянцова не настолькі вялікая, каб за яе давалі 20 гадоў». Сянцоў, на думку тых, хто падпісаўся пад зваротам, шчыры і сумленны ў сваіх перакананьнях — яго бестэрміновая галадоўка гэта даказвае. «Неабходна праявіць міласэрнасьць, каб выратаваць чалавечае жыцьцё. Нам трэба зьмякчаць палітычны клімат у краіне, мірыцца з суседзямі. Памілуйце Алега Сянцова, мы просім Вас», — рэзюмуюць аўтары пэтыцыі.
Зварот падпісалі 13 чалавек. Сярод іх рэжысёры Андрэй Зьвягінцаў, Аляксандар Сакураў і Аляксандар Сакураў, акторка і кіраўніца дабрачыннага фонду «Падары жыцьцё» Чулпан Хаматава, мультыплікатар Юры Нарштэйн, тэлевядучыя Ўладзімір Позьнер і Ксенія Сабчак.
«Грамадзкі рэзананс ніякім чынам не можа паўплываць на рашэньне суду РФ, якое ўступіла ў сілу», — заявіў прэсавы сакратар прэзыдэнта Расеі Дзьмітры Пяскоў, камэнтуючы зварот. Пяскоў адзначыў, што Сянцоў сам павінен ініцыяваць вырашэньне пытаньня аб памілаваньні. «Для памілаваньня прадугледжаная працэдура, якая ініцыюецца самім асуджаным», — патлумачыў прадстаўнік Крамля.
Украінскі рэжысэр Алег Сянцоў, асуджаны ў Расеі на 20 гадоў паводле абвінавачаньня ў падрыхтоўцы тэрактаў у Крыме, сваёй віны не прызнаў. 14 траўня ён абвясьціў галадоўку з патрабаваньнем выпусьціць з расейскіх турмаў усіх украінскіх палітвязьняў, якую не спыняе да гэтага часу. Сянцоў неаднаразова заяўляў, што будзе трымаць яе «да канца».
