Цягам апошніх трох гадоў у Менску колькасьць ВІЧ-інфэкцыяваных жыхароў Менску вырасла на 60%, агулам па Беларусі — на 30%, піша БелаПАН са спасылкай на сталічную санітарна-эпідэміялягічную службу.
На 1 чэрвеня бягучага году ў Менску жылі 4313 чалавек зь ВІЧ, з пачатку году было выяўлена 239 новых выпадкаў. Год таму ў Менску быў 3821 чалавек з ВІЧ, тры гады таму — 2557.
Мужчыны складаюць дзьве траціны інфэкцыяваных, сярэдні ўзрост выяўленых хворых на ВІЧ склаў 36 год (роўна палова ва ўзросьце 30–39 год), амаль дзьве траціны заразіліся палавым шляхам, больш за траціну — пры іньекцыйным увядзеньні наркотыкаў.
Вясковы ВІЧ: небясьпечны вірус вандруе па «мядзьведжых кутках» Беларусі
Ва ўсёй краіне жывуць 19,5 тысячы чалавек зь ВІЧ-пазытыўным статусам. Год таму іх было 17,6 тысячы, тры гады таму — 15 тысяч, у 2010-м — 11,3 тысячы. За ўвесь пэрыяд назіраньня (прыкладна за 30 гадоў) у Беларусі зарэгістравана 24 164 выпадкі ВІЧ-інфэкцыі.
Мэдыкі мяркуюць, што траціна ВІЧ-інфэктаваных ня ведае свайго статусу. Прыблізна кожны чацьвёрты інфэкцыяваных хворы на СНІД.
ВІЧ і СНІД не адно і тое ж. Усё, што трэба ведаць пра вірус і хваробу
Вірус імунадэфіцыту чалавека (ВІЧ) пашкоджвае жывыя клеткі (лімфацыты) і разьвіваецца ў іх. Жывыя клеткі выкарыстоўваюцца як «інкубатар», у якім вірусы дзеляцца і размнажаюцца. Памеры ВІЧ вельмі малыя: на лініі даўжынёй 1 сантымэтар можа разьмясьціцца каля 100 тысяч вірусных часьцінак. Вірус выклікае павольнае захворваньне з доўгім інкубацыйным пэрыядам (ад заражэньня да зьяўленьня прыкмет хваробы). Могуць прайсьці гады, перш чым разаўецца захворваньне СНІД.
Тым часам, паводле зьвестак Усясьветнай арганізацыі здароўя, Беларусь перайшла з 2 на 27 месца ў рэйтынгу спажываньня алькаголю, але выйшла на 5-е ў сьвеце месца па водле колькасьці суіцыдаў на душу насельніцтва.
