Старшыня Пастаяннай камісіі нацыянальнай бясьпекі Палаты прадстаўнікоў Валянцін Міхневіч выказаў спадзеў, што законапраект разгледзяць ужо на гэтай сэсіі.
Апублікаваны праект зьменаў у «наркатычныя» артыкулы Крымінальнага кодэксу
Міхневіч сказаў, што «наркатычны» артыкул ня будзе разглядацца асобна, а будзе разглядацца адначасова са зьменамі ў тры кодэксы — а гэта вельмі цяжка і працаёмка. «Нават запіска, якая прыкладаецца да зьменаў, заняла 45 старонак», — падкрэсьліў старшыня камісіі.
Спадар Міхневіч сказаў, што «мы яго толькі ўчора пачалі вельмі ўважліва вывучаць, пасьля гэтага мы адправім дакумэнт ва ўсе іншыя камісіі Палаты прадстаўнікоў, каб яны выказалі свае думкі, і пасьля гэтага вынесем дакумэнт на пленарнае паседжаньне. Я думаю, што мы пасьпеем разгледзець гэтыя зьмены ў першым чытаньні на цяперашняй сэсіі».
Ён дадаў, што ў тых дакумэнтах, якія атрымала камісія з ураду, ёсьць пэўныя паслабленьні да «наркатычнага» артыкулу. Так, ніжні парог паводле 2-га параграфа, які быў ня меншы за 5 гадоў, цяпер прапануецца скараціць да 3, а паводле 3-га параграфа гэтага ж артыкулу з 8 да 6 гадоў.
На пытаньне журналістаў, ці паўплывала на зьмены, якія прапануюцца, галадоўка жанчын, што выступалі за зьмякчэньне «наркатычнага» артыкулу, старшыня камісіі Валянцін Міхневіч сказаў так:
«Ведаеце, акрамя галадоўкі быў маніторынг, мы вывучалі грамадзкую думку, і мне цяжка сказаць, што тут паўплывала — першае ці другое».
Што важна ведаць пра галадоўку «Маці 328»:
- 27 красавіка актывісты руху «Маці 328» у Калінкавічах на Гомельшчыне і ў вёсцы Востраў на Меншчыне распачалі галадоўку. Акцыя доўжылася 15 дзён. 11 траўня актывісткі пачалі выхад з галадоўкі.
- 10 траўня пачала галадоўку Людміла Лапко зь Ліды і Алена Мікалюк, якая далучылася да яе на выходныя дні. Жанчыны працягваюць галадаць.
- Саўмін накіраваў у Палату прадстаўнікоў законапраект аб зьмене наркатычнага артыкулу.
- Лукашэнка дапусьціў магчымасьць паслабленьняў адказнасьці спажыўцоў наркотыкаў.
- 2 траўня сем галадоўніц руху «Маці 328» з Калінкавіч сустрэліся з прадстаўнікамі адміністрацыі Аляксандра Лукашэнкі. Пасьля сустрэчы яны адмовіліся спыніць галадоўку.
- Удзельнікі галадоўкі патрабуюць перагляду жорсткіх прысудаў, якія выносіліся ад 2013 году паводле 328 артыкула КК кодэксу (ад 5 да 25 гадоў пазбаўленьня волі), а таксама зьменаў у заканадаўства.
