Як стала вядома Свабодзе, на будоўлі новага заводу беленай цэлюлёзы каля Сьветлагорску ўжо другі месяц нічога ня робіцца. Міністэрства прыродных рэсурсаў і аховы навакольнага асяродзьдзя правяло экалягічную экспэртызу і прыпыніла працы яшчэ 17 студзеня.
У лістападзе 2017 году на заводзе пад Сьветлагорскам, побач зь вёскай Якімава Слабада, пачаліся пусканаладачныя працы. Мясцовыя жыхары тады скардзіліся на смурод ад выкідаў з заводу. 25 сьнежня тут адбыўся стыхійны мітынг супраць заводу. У ім удзельнічала каля 200 чалавек. Яшчэ раней, у 2012 годзе, сьветлагорцы сабралі звыш 10 тысяч подпісаў супраць узьвядзеньня ў горадзе новага хімічнага прадпрыемства.
У сваім адказе жыхарам Якімавай Слабады Мінпрыроды пацьвярджае, што прадпрыемства не змагло забясьпечыць «абясшкоджваньне смуродных пахаў».
Па словах Алены Масьлюковай з праваабарончага цэнтру «Вясна», працы на заводзе не адновяцца, пакуль там ня выправяць усе непаладкі.
«А непаладак там столькі, што ў нас уражаньне, што ён зусім працаваць ня будзе», — сказала Масьлюкова Свабодзе.
У прэс-службе канцэрну «Беллеспаперапрам» Свабодзе сказалі, што непаладкі на заводзе пакуль не выпраўляюць, бо ўся кампанія «Самсе» — генэральны падрадчык з Кітаю — зьехала на сьвяткаваньне кітайскага Новага году. Па словах Ружэны Навіцкай, прэс-сакратаркі канцэрну, гэта традыцыйнае сьвяткаваньне для супрацоўнікаў кампаніі.
«Зараз чакаем іхнага вяртаньня. Спадзяюся, калі яны вернуцца, адновяць працы», — сказала Навіцкая.
Калі дакладна адновяцца працы, невядома. Сёлета па ўсходнім календары Новы год прыпаў на 16 лютага — гэта больш як два тыдні таму.
«Яны нам не паведамляюць, калі вяртаюцца, — сказала Навіцкая. — Яны ж людзі свабодныя, мы ня можам імі кіраваць. Выехалі — абяцалі вярнуцца».
Новы завод меліся адкрыць яшчэ 7 лістапада 2017 году. Але кампанія-падрадчык не выконвае тэрмінаў кантракту. Замоўца — Сьветлагорскі цэлюлёзна-папяровы камбінат (ЦПК) — можа ўплываць на будаўнікоў толькі праз пазовы і штрафныя санкцыі.
Беларускія рабочыя не засталіся бяз працы, хоць завод беленай цэлюлёзы і не працуе. Як патлумачыла Ружэна Навіцкая, новы завод пакуль не перададзены ў эксплюатацыю Сьветлагорскаму ЦПК, і мясцовыя рабочыя тут не ўладкаваныя: яны толькі вучыліся і стажыраваліся.
«Цяпер яны занятыя на старой вытворчасьці. Калі запрацуе новая, яны будуць туды пераведзеныя. Нейкі час будуць працаваць разам з кітайскімі спэцыялістамі. Так робіцца на ўсіх прадпрыемствах. Прынамсі цягам першага году», — сказала Навіцкая.
