Трохбаковая кантактная група па ўрэгуляваньні сытуацыі на Данбасе абвясьціла чарговы рэжым цішыні з апоўначы 23 сьнежня ў сувязі з навагоднімі сьвятамі.
Пра гэта на заявіў пасярэднік АБСЭ на перамовах у Менску Марцін Сайдзік. Гэта ня новае замірэньне, а працяг сталага і бестэрміновага рэжыму прыпыненьня агню.
На думку прадстаўніка Ўкраіны ў падгрупе па бясьпецы Яўгена Марчука, верагоднасьць яго выкананьня «50 на 50». Яно будзе выканана, калі будзе рашэньне прэзыдэнта Расеі, а Ўкраіна ўжо гатовая яго выканаць.
Таксама на пасяджэньні кантактнай групы было абвешчана пра дамоўленасьць бакоў правесьці абмен палоннымі «да калядных і навагодніх сьвятаў». Дата абмену не называецца. Вядома, што абмен будзе праводзіцца формулай «306 баевікоў з Данецку і Луганску на 74 украінскіх палонных».
18 сьнежня прадстаўніца Ўкраіны ў гуманітарнай падгрупе на Менскіх перамовах і віцэ-сьпікер Вярхоўнай Рады Ірына Герашчанка заявіла, што прадстаўнікі «ЛНР» і «ДНР» падалі дадатковыя сьпісы на абмен палоннымі і гэта можа сарваць працэс.
Прадстаўнік АБСЭ Марцін Сайдзік ад сябе і ўсіх удзельнікаў кантактнай групы падзякаваў Беларусі і кіраўніку МЗС Ўладзімеру Макею за «прадстаўленьне выдатных умоваў для працы».
Наступнае пасяджэньне Трохбаковай кантактнай групы па ўрэгуляваньні сытуацыі на Данбасе адбудзецца 18 студзеня.
У той жа час кіраўнік Мэджлісу крымскататарскага народа Рэфат Чубараў выказаўся за перанос перамоваў Трохбаковай кантактнай групы зь Менску на іншую пляцоўку з-за пазыцыі Беларусі па крымскай рэзалюцыі Генасамблеі ААН.
