Міністэрства абароны Расеі адмаўляе, што пасьля вучэньняў «Захад-2017» на тэрыторыі Беларусі засталіся расейскія войскі. Прадстаўнік ведамства генэрал-маёр Ігар Канашэнкаў сьцьвярджае, што ўсе часткі вярнуліся ў пункты пастаяннай дысьлякацыі.
Напярэдадні начальнік Генштабу Ўзброеных сіл Украіны Віктар Мужэнка заявіў, што Расея пакінула частку войскаў на тэрыторыі Беларусі і вывела толькі невялікую частку кантынгенту.
З 14 па 20 верасьня Расея і Беларусь правялі вайсковыя вучэньні «Захад-2017». Падчас манэўраў, паводле дадзеных МЗС Літвы, два расейскіх вайскова-транспартныя самалёты ўварваліся ў паветраную прастору краіны. У NATO таксама заявілі, што вучэньні «Захад-2017» сьведчаць аб падрыхтоўцы Расеі «да вялікай вайны».
Масква і Менск сьцьвярджалі, што ў манэўрах удзельнічаюць 12 700 вайскоўцаў дзьвюх краінаў, аднак старшыня Вайсковага камітэту NATO — чэскі генэрал Пэтр Павэл — называў лічбу ў 100 тысячаў.
