Прэзыдэнт ЗША Дональд Трамп заявіў пасьля чарговага ракетнага запуску ў КНДР, што «магчымыя ўсе варыянты».
Паўночная Карэя «прадэманстравала грэбаваньне сваімі суседзямі, усімі членамі ААН і мінімальнымі стандартамі прымальных міжнародных паводзінаў, — гаворыцца ў заяве Трампа, якую апублікавала прэс-служба Белага дому. — Пагрозы і дэстабілізуючыя дзеяньні толькі ўзмацняюць ізаляцыю паўночнакарэйскага рэжыму ў рэгіёне і сярод усіх краінаў сьвету. Магчымыя ўсе варыянты».
Паўночная Карэя прадэманстравала грэбаваньне мінімальнымі стандартамі прымальных міжнародных паводзінаў.
Ракета, запушчаная КНДР у аўторак раніцай, праляцела над тэрыторыяй Японіі, прыкладна празь 10 хвілінаў пасьля запуску падзялілася на тры часткі і ўпала ў Ціхі акіян, на ўсход ад вострава Хакайда, паведамляе ўрад Японіі.
Прэзыдэнт ЗША Трамп пасьля запуску пагутарыў па тэлефоне з кіраўніком японскага ўраду Сіндзо Абэ, адзначыўшы, што КНДР уяўляе «сур’ёзную і ўзрастаючую непасрэдную пагрозу» для абедзьвюх краінаў.
Запуск ракеты паклаў канец месячнаму перапынку ў ракетных выпрабаваньнях КНДР, які амэрыканскія ўлады трактавалі як «праяву стрыманасьці». Прэзыдэнт ЗША ў сувязі з гэтым на мінулым тыдні заявіў, што паўночнакарэйскі лідэр Кім Чэн Ын «пачынае нас паважаць».
