Лукашэнка гаворыць — мы цытуем. Што было ў штогадовым пасланьні да беларускага народу

Пра прычыны адмовы ад рэформаў

Лукашэнка заяўляе, што Эўразьвяз і ЗША, якія пастаянна навязваюць Беларусі сваю мадэль:

«Ужо самі адмаўляюцца ад лібэралізму, шукаюць новую форму дзяржаўнага разьвіцьця. Дзе ўлада слабая, там заняпад.

Я яшчэ саплівым прэзыдэнтам казаў: няма грошай у нас, каб рызыкаваць і ісьці на рэформы. Таму заўсёды быў акуратным, каб ня кідацца бяздумна на нейкія сьвежыя ідэі».

Электронны ўрад ва ўмовах дыктатуры — відовішча для багоў

Электронны ўрад азначае кантроль грамадзтва за ўладай. Лукашэнка ж разумее гэта так, што грамадзяне будуць мець магчымасьць скардзіцца начальніку толькі ўжо у электронным выглядзе. Мяняецца толькі форма «чалабітнай» і ня больш.

Пра скарачэньне чыноўнікаў

Лукашэнка патлумачыў прычыны «аптымізацыі» чыноўнікаў, якую ён ініцыяваў:

Наша краіна не такая багатая, каб рабіць памылкі. Распачатая мной аптымізацыя накіраваная на тое, каб узьняць прэстыж дзяржаўнага служачага. Гэтыя людзі павінны стаць апорай краіны. Павесіў пагоны дзяржслужбоўца — будзь гатовым да подзьвігаў.

Скарачэньне пачынаецца з адміністрацыі прэзыдэнта

«Ад 1 траўня на 30% скарачаецца штат адміністрацыі прэзыдэнта. Ніхто нават не заўважыў. Так і ў райвыканкамах — звольніце 2-3 чалавекі, нічога страшнага не адбудзецца. Разьдзіманьня чыноўніцкага апарату больш ня будзе!»

Пра заразу, якую прыносяць чыноўнікам людзі

«Сам быў дэпутатам, ведаю, што такое працаваць зь людзьмі. Людзі прыходзяць з балячкамі, хварэць пасьля гэтага пачынаеш. Але трэба выпрацаваць імунітэт ад заразы, слухаць людзей і дапамагаць ім. Такая функцыя дзяржаўнага службоўцы».

Пра ахову здароўя і экспарт мэдпаслуг

Паводле Лукашэнкі, Беларусь выходзіць на лідэрскія пазыцыі ў сьвеце паводле якасьці аказаньня мэдычных паслуг:

«Я сам прымаў рашэньні аб стварэньні навукова-практычных цэнтраў, і сёньня ўжо ў абласных шпіталях робяць перасадкі. Найвышэйшы ўзровень! А з чаго пачыналі? З разваленых дыспансэраў... Сёлета ад экспарту мэдычных паслуг плянуем атрымаць 40 мільёнаў даляраў».

Пра паўмільёна інвалідаў

Дадатковае апраўданьне дэкрэту № 3 паводле Лукашэнкі:

«У нас больш за паўмільёна чалавек інвалідаў, і мы павінны стварыць ім магчымасьць ня толькі годна жыць, але і працаваць. Вось вам і яшчэ адна місія дэкрэту № 3. Сьвет вакол такіх людзей мусіць стаць іншым».