Лукашэнка гаворыць — мы цытуем. Што было ў штогадовым пасланьні да беларускага народу

Пра скарачэньне чыноўнікаў

Лукашэнка патлумачыў прычыны «аптымізацыі» чыноўнікаў, якую ён ініцыяваў:

Наша краіна не такая багатая, каб рабіць памылкі. Распачатая мной аптымізацыя накіраваная на тое, каб узьняць прэстыж дзяржаўнага служачага. Гэтыя людзі павінны стаць апорай краіны. Павесіў пагоны дзяржслужбоўца — будзь гатовым да подзьвігаў.

Электронны ўрад ва ўмовах дыктатуры — відовішча для багоў

Электронны ўрад азначае кантроль грамадзтва за ўладай. Лукашэнка ж разумее гэта так, што грамадзяне будуць мець магчымасьць скардзіцца начальніку толькі ўжо у электронным выглядзе. Мяняецца толькі форма «чалабітнай» і ня больш.

Пра прычыны адмовы ад рэформаў

Лукашэнка заяўляе, што Эўразьвяз і ЗША, якія пастаянна навязваюць Беларусі сваю мадэль:

«Ужо самі адмаўляюцца ад лібэралізму, шукаюць новую форму дзяржаўнага разьвіцьця. Дзе ўлада слабая, там заняпад.

Я яшчэ саплівым прэзыдэнтам казаў: няма грошай у нас, каб рызыкаваць і ісьці на рэформы. Таму заўсёды быў акуратным, каб ня кідацца бяздумна на нейкія сьвежыя ідэі».

Пра электронны ўрад

Лукашэнка заклікаў да інфарматызацыі ўсіх сфэраў жыцьця, у тым ліку выкананьня праграмы «Электронны ўрад»:

«Мы ствараем „лічбавую краіну“. Сёньня наш ПВТ вядзе абагульненьне лепшай усясьветнай практыкі ў ІТ-галіне. Янчэўскі нямала патраціў дзяржаўных грошай на паездкі, мусіць адпрацаваць».

Аб праверках і кантралёрах

Лукашэнка заявіў, што галоўныя кантралёры — Камітэт дзяржаўнага кантролю, а таксама прэзыдэнт і дэпутаты:

«Няма патрэбы пастаянна правяраць прадпрыемствы, якія нармальна працуюць. Сумленна працуеш — працуй, ніхто цябе чапаць не павінен. Беспадстаўна правераць — будзем разьбірацца жэстачайшэ ўжо з кантралёрамі».

Лібэралізацыя народзіць хаос

Лукашэнка кажа пра актывізацыю дзелавой ініцыятывы. Асабліва паказальна гэта гучыць на фоне нядаўніх пасадак прадпрымальнікаў, якія нават пачасьціліся ў апошнія тыдні.

«Трэба 12 працэдур, каб адкрыць невялікую кавярню». Цікава, і хто гэта ўсё стварыў, калі гэты самы прэзыдэнт кіруе ўжо 23 гады. Лукашэнка паведаміў, што рыхтуюцца дакумэнты пра лібэралізацыю бізнэсу, але шчыра прызнаецца, што баіцца страціць кіраваньне дзяржавай, эканомікай, «спарадзіць хаос».

Пра бюракратычныя перашкоды

Лукашэнка заклікае спрыяць разьвіцьцю бізнэсу:

«Каб атрымаць дазвол на будаўніцтва, трэба чакаць паўтара года. „Кафэшку“ адкрыць — таксама. Хопіць зьдзекавацца зь людзей».

Пра бізнэс і пра багатых людзей

Лукашэнка выказаў сваё стаўленьне да жаданьня займацца бізнэсам:

«Актывізацыя дзелавой ініцыятывы. Кожны са школьнай парты бачыць сябе багатым і таўстасумам. Але ў нашым грамадзтве заможных ня вельмі любяць. Добра падумай, ці гатовы пайсьці ў бізнэс».