Лукашэнка гаворыць — мы цытуем. Што было ў штогадовым пасланьні да беларускага народу

Пра цэны на жыльлё

Лукашэнка прапанаваў формулу цэнаўтварэньня ў будаўніцтве жыльля:

«Цэны на жыльлё — 500 даляраў за мэтар, больш за цяперашні сярэдні заробак па краіне. Неабходна выраўняць гэтыя парамэтры, інакш галіна заваліцца. Ня будзе мэтар даражэй за прыбыткі людзей».

Ніякіх рэформаў!

Ніякай прыватызацыі, ніякага банкруцтва нерэнтабэльных прадпрыемстваў. Ніякіх рэформаў. Выкарыстоўваць дзяржаўную мадэрнізацыю. Кантроль за цэнамі. Прымусіць працаваць 350 тысяч «дармаедаў», выкарыстоўваючы савецкі досьвед, бо яны — патэнцыяльныя злачынцы.

Ніякай лібэралізацыі. Карацей, нічога новага. Выхад людзей на вуліцы нічому не навучыў Лукашэнку. Выйсьце — не ў эканамічных, а ў адміністрацыйных захадах. У нас створана сыстэма, трэба прымусіць яе працаваць. Пытаньне, чаму 20 гадоў не атрымліваецца, ня ставіцца.

Пра рост тарыфаў ЖКГ

Лукашэнка заявіў, што аплата ЖКГ з часам будзе без субсыдыяў дзяржавы:

«Узяць пад жорсткі кантроль сытуацыю з камунальнымі тарыфамі. Прашарсьціць усе службы, якія беспадстаўна падвышаюць плянку, бо там, дзе людзі плацяць 65%, ужо ўсе 85. Кожны год падвышаем на 5 даляраў і самі выйдзем на 100%, людзі ўжо прызвычаіліся».

Пра цэны і лібэралізацыю

Лукашэнка прызнаў значны рост цэнаў у Беларусі:

«Кантроль за цэнамі будзе працягнуты, папярэджваю. Неабгрунтаванага росту быць не павінна. Нашы грамадзяне мусяць быць абароненыя. Ніякія рэфарматары, ніякія МВФ вам не загад. Ня слухайце нікога, хто будзе пераконваць у неабходнасьці лібэралізацыі. Гэта добра гаварыць таму, у каго ёсьць грошы. Якая неабходнасьць?»

Пра заробак у 500 даляраў

Лукашэнка настойвае на пастаўленай ім задачы дасягнуць сярэдняга заробку па краіне ў 500 даляраў:

«Няма ліквіднага тавару — няма заробку. Але пастаўлена задача: заробак — ня меней за 1000 рублёў. Хто ня можа забясьпечыць — час сыходзіць на іншую працу. Тэрмінова вырашыць кадравыя праблемы!»

Пра дэкрэт № 3

Лукашэнка настойвае, што людзей трэба прымушаць працаваць, на што накіраваны ягоны дэкрэт № 3:

«Што будзем рабіць з тымі, хто падпадае пад дзеяньне дэкрэту № 3? Яны ствараюць вялізную праблему праваахоўнай сыстэме. А наогул — 500 тысяч, 150 тысяч проста выкрасьлілі. Праблема існуе, як яе вырашаць?

Калі не прымусіш працаваць, то яны і ня будуць. Ім прасьцей на плошчы выйсьці, а там яшчэ і капейку падсунуць. Мэта дэкрэту: кожны мусіць працаваць, вось і ўся філязофія».

Пра працаўладкаваньне

Лукашэнка згадаў свой ранейшы загад уладкаваць на працу беспрацоўных да 1 траўня, які ён выказаў пасьля «маршаў недармаедаў»:

«350 тысяч неканкурэнтаздольных грамадзянаў трэба нечым заняць. Да 1 траўня мусім прапанаваць працу ўсім, хто гэтага рэальна хоча. Часовыя, сэзонныя — як хто захоча».

Пра Чарнобыль

Лукашэнка хваліцца аднаўленьнем вытворчасьці ў радыяцыйна забруджаных рэгіёнах:

«Нацмэны» палохалі Чарнобылем. А тым часам рэгіёны пачынаюць рабіцца квітнеючым краем!"

Пра «парцянкі»

Лукашэнка прызнаў, што беларуская прадукцыя неканкурэнтаздольная:

«Хопіць шыць анучы, трэба нарэшце пераарыентавацца на выпуск канкурэнтаздольнай прадукцыі. У іншым выпадку прыходзіш да высновы, што хтосьці зацікаўлены ў такой сытуацыі».