Дакумэнт пад назвай «Марыюпальскі плян» прадугледжвае вяртаньне Януковіча ў якасьці «рэгіянальнага лідэра Данецкай і Луганскай абласьцей» Украіны, з магчымым прыцягненьнем «цяперашніх лідэраў сэпаратыстаў».
22 лютага ў размове з карэспандэнтам Радыё Свабода ў Кіеве Крыстафэрам Мілерам Кілімнік таксама распавёў, што ў 2016 годзе, падчас перадвыбарнай кампаніі ў ЗША, ён «інфармаваў Манафорта пра сытуацыю ва Ўкраіне кожныя некалькі месяцаў». Паводле словаў Кілімніка, апошні раз ён размаўляў з Манафортам «некалькі тыдняў назад». Канстанцін Кілімнік сьцьвярджае, што Манафорт «ня быў зьвязаны» з распрацоўкай «Марыюпальскага пляну». Пры гэтым ён дапусьціў, што Манафорт можа вярнуцца ва Ўкраіну, дзе ён апошні раз быў у 2015 годзе, у выпадку «зьяўленьня сур’ёзнага праекту, які мог бы прынесьці мір у гэтую краіну».
З 2005 году Пол Манафорт працаваў ва Ўкраіне кансультантам алігарха Рыната Ахметава, а пасьля паліттэхнолягам ў перадвыбарным штабе Віктара Януковіча на прэзыдэнцкіх выбарах 2009 году. У гэты ж пэрыяд Кілімнік быў перакладчыкам Манафорта, а пасьля стаў адным зь яго найбліжэйшых памочнікаў, фактычна узначаліўшы кіеўскі офіс паліттэхноляга. Як паведамляла выданьне Financial Times, Манафорт ўзяў Кілімніка ў сваю каманду з прычыны бліскучага веданьня ангельскай мовы. Кілімнік, паводле дадзеных Finacial Times, yарадзіўся ў 1970 годзе і ў ліку іншага прайшоў навучаньне ў маскоўскім Інстытуце вайсковых перакладнікаў, які ў савецкія часы курыравалі КДБ і ГРУ. У інтэрвію Радыё Свабода Кілімнік адхіліў якую-небудзь сувязь з расейскай разьведкай або іншымі спэцслужбамі.
Пол Манафорт сышоў у адстаўку з пасады кіраўніка выбарчага штабу Дональда Трампа 19 жніўня летась. Чатырма днямі раней кіраўнік Нацыянальнага антыкарупцыйнага бюро Ўкраіны Арцём Сытнік заявіў, што ведамства валодае сьпісамі людзей, якія атрымлівалі грошы з касы ўкраінскай «Партыі Рэгіёнаў» з 2007 па 2012 год. У іх ліку, паводле словаў Сытніка, быў і Манафорт, які атрымаў ад партыі Януковіча ў выглядзе «канфідэнцыйных выплат наяўнымі» амаль 13 мільёнаў даляраў. Сам 67-гадовы паліттэхноляг і лабіст, які пачынаў сваю кар’еру ў адміністрацыі прэзыдэнта ЗША Рональда Рэйгана, адмаўляе гэта.
Амэрыканскія СМІ сьцьвярджаюць, што Манафорт — адзін з трох былых супрацоўнікаў штабу цяперашняга, прэзыдэнта ЗША, магчымыя сувязі якіх з Расеяй расьсьледуе ФБР. Сам Манафорт адмаўляе любыя сувязі з Расеяй. У адміністрацыі Дональда Трампа ён не атрымаў ніякай пасады.
20 лютага газэта The New York Times паведаміла пра іншы плян мірнага ўрэгуляваньня ва Ўкраіне, які нібыта перадаў у адміністрацыю Трампа дэпутат Вярхоўнай Рады Ўкраіны ад Радыкальнай партыі Андрэй Арцёменка. Гэты плян, у прыватнасьці, прадугледжвае «правядзеньне рэфэрэндуму аб перадачы Крыму ў арэнду Расеі на тэрмін ад 50 да 100 гадоў, зьняцьце санкцый з Масквы і вывад расейскіх войскаў з Данбасу». Арцёменка не адмаўляе наяўнасьць такога пляну, але кажа, што не кантактаваў з прадстаўнікамі амэрыканскага прэзыдэнта. Украінскія ўлады назвалі яго ініцыятыву «антыканстытуцыйнай», а парлямэнцкая фракцыя Радыкальнай партыі прыняла рашэньне выключыць Арцёменку са свайго складу.
