Па выніках выбараў дэпутатамі сталі Канапацкая з АГП і Анісім з ТБМ

Лагвінец сьцьвярджае, што на 347-м участку ў Менску выбары не адбыліся

Выніковая лічба тых, хто прагаласаваў, у пратаколе камісіі на 347-м выбарчым участку Сухараўскай выбарчай акругі № 101 гораду Менску і падлікі назіральнікаў не супадаюць.

«Мы кандыдатаў ня ведаем, праграмаў не чыталі», — выбарнікі ў Горадні

Карэспандэнт Свабоды наведаў каля 10 выбарчых участкаў у занёманскіх мікрараёнах Горадні з 11.00 да 14.00. Звычайна гэта час, калі ідуць галасаваць найбольш масава. Але сёньня там і на выбарчых участках, і ў буфэтах былі адзінкі.

Бязьлюдная Кастрычніцкая плошча ў сьвяточнай ілюмінацыі.

У Менску затрымалі назіральніка ад руху «За свабоду»

Намесьнік старшыні руху «За свабоду» Алесь Лагвінец паведаміў Свабодзе, што ў Менску на 347-м выбарчым участку Сухараўскай выбарчай акругі № 101 затрыманы назіральнік ад гэтага руху Пётар Маркелаў.

Начальнік РАУС: Міліцыянтаў у Гомелі пакаралі за рэакцыю на інцыдэнт зь бел-чырвона-белым сьцягам

«Я і ёсьць бандзюган»: на Лябедзьку напаў сябра Сацыяльна-спартовай партыі

На старшыню Абʼяднанай грамадзянскай партыі Анатоля Лябедзьку на выбарчым участку напаў мужчына, які прадставіўся назіральнікам ад Сацыяльна-спартовай партыі і назваў імя: Мікалай Рыгоравіч Бяцешка.

Прагаласавалі дзьве траціны выбарнікаў — ЦВК

Паводле толькі што апублікаваных зьвестак ЦВК, на выбарах у Палату прадстаўнікоў прагаласавала 67,66% выбарнікаў. У лідэрах па-ранейшаму Віцебская вобласьць (74,64%), яе даганяе Магілёўская (74,41%). Найменш прагаласавала ў Менску (56,21%).

Выбары ўжо адбыліся ў 100 са 110 акругаў (яўка перавысіла 50%), у тым ліку па ўсіх акругах Берасьцейскай, Віцебскай і Гомельскай абласьцей. У Менскай жа вобласьці яны адбыліся ў 16 з 17 акругаў.

Кандыдатка ў дэпутаты Палаты прадстаўнікоў па Кастрычніцкай выбарчай акрузе № 97 Менску Тацяна Караткевіч паведаміла Свабодзе, што аднаго з назіральнікаў ад кампаніі «Гавары праўду» міліцыя вывела з выбарчага ўчастку:

«У маёй акрузе на ўчастку, які знаходзіцца ў школе № 62, улады робяць усе намаганьні, каб пазбавіць гэтыя ўчасткі незалежных назіральнікаў. Сёньня мы там пакінулі ў якасьці назіральніка давераную асобу Жану Семянтовіч. Яе толькі што міліцыя вывела з выбарчага ўчастку, абвінаваціўшы ў тым, што яна вяла незаконную відэаздымку. Прычым яна казала, што гатовая паказаць свой тэлефон, што яна насамрэч нічога не здымала. То бок яны робяць усё, каб на падлік галасоў увогуле нікога не засталося зь незалежных назіральнікаў».

У Каліноўскай акрузе галасаваць прыйшлі пэрсанажы «Зорных войнаў»

У Каліноўскай выбарчай акрузе № 108 Менску на выбарчыя ўчасткі прыйшлі два чалавекі, апранутыя як пэрсанажы «Зорных войнаў»: Дарт Вэйдэр і імпэрскі штурмавік.

Ярмошына пра атмасфэру страху на выбарах: «Гэта па частцы апазыцыі»

Старшыня Цэнтравыбаркаму Лідзія Ярмошына аспрэчыла меркаваньне назіральніка Паўла Знаўца пра тое, што на выбарах пануе атмасфэра страху, а датэрміновае галасаваньне суправаджалася запалохваньнем выбарцаў.

Віцебскіх выбарцаў ня вабяць ні галасаваньне, ні буфэт

Назіральнікі адзначаюць невысокую актыўнасьць на выбарчых участках. Ужо з самай раніцы па кватэрах выправіліся групы са скрынямі для галасаваньня, бо на ўчасткі ня дужа сьпяшаўся нават «самы надзейны электарат» — пэнсіянэры.

Выбары амаль адбыліся ў Менску

Паводле толькі што апублікаваных зьвестках ЦВК, на 16:00 на выбарах у Палату прадстаўнікоў прагаласавалі 60,87% выбарнікаў. Цяпер лідэр — Віцебская вобласьць з 67,70%, а найменшая яўка ў Менску, 49,71%.